قوستاناي. 27 مامىر. ىبىراي ءالتىنساريننىڭ مەموريالدىق مۋزەيىندە فيلوسوف عالىم, ۇستاز, ەتنوگراف, ىبىرايتانۋشى, مارافونشى, ونەر جاناشىرى قالقامان جاقىپتىڭ 70 جاسقا تولۋىنا وراي, وعان قۇرمەت كورسەتىلدى. بۇل تۋرالى egەmen.kz ءتىلشىسى حابارلادى.
قوستانايدا قالقامان جاقىپتى بىلمەيتىندەر كەم دەپ ايتۋعا بولادى. ول الدىمەن ۇستاز, وبلىستا جوعارى ءبىلىم بەرۋ ءىسىنىڭ دامۋىنا ۇلەس قوسىپ كەلەدى. ول كىسىدەن جۇزدەگەن جاستار ءبىلىم الدى. قالقامان جاقىپتى سونداي-اق, جۇرتشىلىق بەلسەندى سپورتشى دەپ تە تانيدى. جەلاياق تالاي رەت وبلىستىق, رەسپۋبليكالىق مارافوندارعا قاتىستى, ونى ۇيىمداستىرۋدا دا بەلسەندىلىك تانىتتى.
سونىمەن قاتار, ۇلتتىق ۇستانىمى بەرىك عالىم وبلىستاعى بەلگىلى ەتنوگراف رەتىندە دە تانىمال. ونىڭ ىبىرايتانۋ ىلىمىنە قوسقان ۇلەسىن اۋىز تولتىرىپ ايتۋعا بولادى. قوستانايدىڭ ورتالىعىنداعى ءالتىنساريننىڭ ءوزى اشقان مەكتەپ ىرگەتاسىنىڭ كىرپىشىن تاۋىپ, ونى مۋزەيدىڭ جادىگەرى ەتكەن دە قالقامان اعامىز بولاتىن. ونىڭ ۇلى اعارتۋشى ومىرىنەن جازعان ماقالالارى دا ءبىر توبە.
قالقامان جاقىپ مەرەيتويىنىڭ ى.التىنسارين مەموريالدىق مۋزەيىندە ۇيىمداستىرىلۋىنىڭ دا وزىندىك سىرى بار. ول الدىمەن ىبىرايتانۋشى, ەكىنشىدەن جاستاي اتا-انادان جەتىم قالعان قالقامان ۇلى اعارتۋشىنىڭ ءوزى اشقان مەكتەپ-ينتەرناتىندا ءبىلىم الىپ, ەر جەتتى, ساناتقا قوسىلدى. ول قالقاماننىڭ تۋعان ءۇيى سەكىلدى سەزىلەدى.
قوستاناي قالاسى زيالىلارى جينالعان شارادا وبلىستىق مادەنيەت باسقارماسى باسشىسىنىڭ ورىنباسارى روزا تولەشقىزى, قالقامان اعانىڭ ۇستازى, سەكسەننىڭ سەڭگىرىنە شىعىپ وتىرعان قارت ۇستاز جۇماعازى بەكبوسىنوۆ, ناعاشىباي مۇقاتوۆ, جۋرناليست گۇلجىبەك بەكمۇحامەدوۆا جانە باسقالار جىلى تىلەكتەرىن ايتتى.
قارت ۇستاز جۇماعازى بەكبوسىنوۆ: «بالا كەزىنەن قوعامدىق جۇمىستارعا بەلسەندى قاتىسۋشى ەدى. ومىردە دە سولاي بولدى. كوز الدىمدا ەر جەتتى, كوز الدىمدا جاقسى ادام بولىپ قالىپتاستى. قالقاماننان جاس ۇرپاق سالاماتتى ءومىر سالتىن ۇستانۋدى ۇيرەنۋى كەرەك. ۇيرەنۋ ءۇشىن باسقا جاقتان بيىك تۇلعا ىزدەۋدىڭ قاجەتى جوق, جاقسىنىڭ بارلىعى دا جانىمىزدا جۇرگەنىن ۇمىتپايىق», – دەدى.
ۇستاز, عالىم, ەتنوگراف قالقامان جاقىپ: «مەن ۇستازىمنىڭ الدىندا ءوزىمدى ۇستازبىن ايتۋعا قىمسىنىپ تۇرامىن. جۇماعازى اعامىز بالا كەزىمىزدە قاسىنا تۇرعىزىپ قويىپ, ادام بولىڭدار دەپ ۇزاق ۇرساتىن. ەندى بۇگىن ءدال سولاي قاسىنا تۇرعىزىپ قويىپ, ۇزاق ماقتادى. ۇستازىمنىڭ ەڭبەگى ءسال دە بولسا اقتالعان-اۋ دەپ بىلەمىن», – دەدى.
ءنازيرا جارىمبەتوۆا.
دەرەك, فوتو: egەmen.kz.
