ەڭ ارزان نان

تاراز دۇكەندەرىنىڭ سورەلەرىنەن تابىلادى نان – توقشىلىق, بارشىلىق بەل­گىسى. داستارقاننىڭ تورىندە تۇرعان نان, ءتىپتى, ناننىڭ ءيىسىنىڭ ءوزى ادامنىڭ كو­ڭى­لىن حوش ەتەدى ەمەس پە؟ «نان بولسا, ءان دە بولادى» دەگەن ءسوز كەشەگى كەڭەس زامانىنان قالسا دا اس اتاسى مول بول­عان سايىن ەلگە جۇت جولاماي­تى­نى انىق. اللاعا شۇكىرشىلىك, ەل ارا­سىن­دا «نان جوق, نان جەتپەي جاتىر» دەگەن اڭگىمە جوق. تەك «نان باعا­سى قىم­­بات­­تاپتى» دەگەندى ەستىپ قالاتى­نى­­مىز راس. ايتسە دە جەرگىلىكتى بيلىك نان با­عا­سىن وسىرمەۋدىڭ بار شاراسىن قاراس­تىرۋدا. نان باعاسىن وسىرمەۋ ءۇشىن جامبىل وبلىسىنىڭ تۇراق­تان­دىرۋ قورىنىڭ ەسەبىنەن بيىلعى جىلدىڭ قاڭتارىندا ارزان باعامەن 3 مىڭ توننا ءبىرىنشى سۇرىپتى ۇن ساتىپ الىنىپ, ونىڭ 2 800 تونناسى ناۋبايحانالارعا ال قالعان 200 تونناسى تۇرعىندارعا كيلوسىن 77 تەڭگەدەن ساتىلۋعا قويىلدى, دەيدى بۇل جونىندە جام­بىل وب­لىستىق اۋىل شارۋا­شىلىعى باس­قارماسىنىڭ باسشىسى نۇرجان نۇر­جىگىتوۆ. بۇل بيىلعى جىلدان باستاپ نان باعاسىن 53,4 تەڭگە كولەمىندە تۇراقتاندىرۋعا مۇمكىندىك بەردى. ەندى نان با­عاسىن تۇراقتاندىرۋ شاراسىن جالعاستىرۋ ماقساتىندا تۇراقتاندىرۋ قورىنا قوسىمشا 2 مىڭ توننا ۇن ساتىپ الۋ جوسپارلاندى. قازىرگى تاڭدا ونىڭ 1000 تونناسى (كيلوسى 78 تەڭگەدەن) ساتىپ الىنىپ, ناۋبايحانالارعا كيلوسى 64 تەڭگەدەن بوساتىلۋدا. مىنە, وسىنىڭ ارقاسىندا جام­بىل وبلىسىنداعى نان باعاسى رەسپۋبليكا بويىنشا ەڭ تومەنگى باعالار قاتارىنا ەنىپ وتىر. جانە بۇل كورسەتكىش سوڭعى 3 جىل بويى تۇراقتى ساقتالۋدا. بۇدان بولەك, اسا مۇقتاج جاندارعا الەۋمەتتىك ناندى تەگىن تاراتۋعا نيەت بىلدىرگەن جامبىل وبلىسىنىڭ جەكە كاسىپكەرلەرىنىڭ دەمەۋشىلىگىمەن, سونداي-اق, وبلىس اكىمدىگى قىزمەتكەرلەرىنىڭ قوسقان جەكە قارجىلارىنىڭ ەسەبىنەن اعىمداعى جىلدىڭ 25 قاڭتارىنان باستاپ تاراز قالاسىنىڭ 5 ءىرى ساۋدا ورىندارىندا جانە كوممۋنالدىق 10 دۇڭگىرشەكتەرىندە كۇنىنە مىڭعا جۋىق ناندى مۇقتاج جاندارعا تەگىن الۋعا مۇمكىندىكتەر جاسالدى. اكتسيا بارىسىندا قۇنى 1,2 ملن. تەڭگەنىڭ 53,4 مىڭ دانا نانى تەگىن تاراتىلدى. ورالحان ءداۋىت, «ەگەمەن قازاقستان» جامبىل وبلىسى