باس ۇيىم باعدارلاماسىن قۇتتىقتادى

قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ بىرىككەن ۇلتتار ۇيىمى باس حاتشىسىنىڭ كومەكشىسى, بۇۇ دامۋ باعدارلاماسىنىڭ ەۋروپا جانە تمد ەلدەرى بويىنشا ايماقتىق بيۋروسىنىڭ ديرەكتورى جيحان سۇلتانوعلۋدى قابىلدادى, دەپ حابارلادى سەناتتىڭ ءباسپاسوز قىزمەتى. كەزدەسۋ بارىسىندا ق.توقاەۆ بۇۇ دب وكىلىن وسى قۇرىلىمنىڭ 50 جىلدىعىمەن قۇتتىقتادى. «دامۋ باعدارلاماسى ادامزاتتىڭ ورنىقتى دامۋىن, ونىڭ ىشىندە كەدەي­لىكتى تۇبىرىنەن جويۋ, جۇمىس­پەن قامتۋدى ۇلعايتۋ جانە تۇرعىنداردىڭ ءومىر ءسۇرۋ دەڭگەيىن ارتتىرۋ, ءبىلىم بەرۋ جۇيەسىن جاقسارتۋ, قورشاعان ورتانى قورعاۋ جانە قالپىنا كەلتىرۋدى قامتاماسىز ەتۋدە ورتالىق ءرولدى اتقارادى». جيىرما ءۇش جىل بويى بۇۇ دب قازاقستانداعى رەفورمالار مەن ترانسفورماتسيالاۋعا ەلەۋلى ۇلەس قوسىپ كەلەدى», – دەدى ق.توقاەۆ. توراعا بۇۇ دب جارتى عاسىر­لىق قىزمەتىنىڭ ناتيجەلەرى مەن ور­نىقتى دامۋدىڭ 2030 جىلعا دەيىنگە ماقساتتارىن ىسكە اسىرۋ كەلەشەگى استانا ەكونوميكالىق فورۋمى اياسىنداعى ارناۋلى سەسسيا­دا ىقىلاسپەن تالقىلاناتىنىنا سەنىم ارتتى. سەنات توراعاسى سول كۇنى بۇۇ باس حاتشىسىنىڭ ارناۋلى وكىلى, بۇۇ ورتالىق ازيا ەل­دەرى­نە ارنال­عان پريۆەنتيۆتى ديپ­­لوماتيا ءجو­نىندەگى ايماقتىق ورتا­لىعىنىڭ باسشىسى پەتكو دراگانوۆپەن كەزدەسۋ وتكىزدى. ءجۇز­دەسۋشىلەر ايماقتاعى بۇۇ قىز­مەتىن, ەكو­نو­ميكالىق ىنتى­ماق­تاستىق, تران­سۇلتتىق قاۋىپتەرگە قارسى ءىس-قي­مىل, سونداي-اق, ەكسپو-2017 حال­ىق­ارالىق كورمەسىنە ازىرلىك ماسەلەلەرىن تالقىلادى.