قىرداعى قاۋىرت قيمىل

وبلىس ديقاندارى 4,3 ميلليون گەكتار القاپقا اۋىلشارۋاشىلىق داقىل­دارىن اگروتەحنيكالىق تالاپ­تارعا ساي ورنالاستىرۋدى بەلگىلەپ وتىر. تەرىسكەيگە كوكتەم ەرتە كەلىپ, قىرداعى ەڭبەك ءدۇبىرى جىلداعىدان بۇرىن باستالدى. قىزىلجار اۋدانىنا قاراستى «پەتەرفەلد-اگرو» جشس-ءنىڭ ەگىس تانابىندا باق وكىلدەرىمەن وتكىزگەن بريفينگتە وبلىستىق اۋىل شارۋاشىلىعى باسقارماسىنىڭ باسشىسى قايرات وماروۆ 4,3 ميلليون گەكتار جەرگە ءدان سىڭىرىلەتىنىن, 3,2 ميلليون جەردى ءداندى, بۇرشاقتى, 469 مىڭ گەكتاردى مايلى داقىل­دار قۇرايتىنىن جەتكىزدى. ونىڭ ايتۋىنشا, كوكتەمگى دالا جۇمىس­تارىن ۇيىمشىلدىقپەن وتكەرۋ ءۇشىن 1140 جوعارى ءونىمدى تەحنيكا بىرلىگى قاتىستىرىلادى. اگروقۇرىلىمدار مەن شارۋا قوجالىقتارى 490 مىڭ توننا ءبىرىنشى, ەكىنشى سۇرىپتى تۇقىم قورىمەن, 65 مىڭ توننا ديزەل وتىنىمەن قامتاماسىز ەتىلگەن. 822 مىڭ گەكتار القاپقا 50 مىڭ توننا مينەرالدى تىڭايتقىش سىڭىرىلمەك. ءوڭىر اگرارشىلارى «قازاگرو» اق-تىڭ ەنشىلەس ۇيىمدارى ارقىلى 14 ميلليارد تەڭگە جەڭىلدىكتى نەسيە الۋ مۇمكىندىگىنە قول جەتكىزگەن. ال, وسىمدىك شارۋاشىلىعىن سۋب­سيديالاۋعا 8,4 ميلليارد تەڭ­گە قاراستىرىلعان. ءبىر ءسوز­­بەن ايتقاندا, كوكتەمگى دالا جۇمىس­تارىنا جان-جاقتى ازىرلىك جاسالىپ, باستى نازار جاۋاپتى ناۋقاندى مەرزىمىندە اياقتاۋعا جۇمىلدىرىلعان. اتاپ ايتقاندا, مايلى داقىلداردى 31 مامىرعا, بيدايدى 5 ماۋسىمعا دەيىن سەۋىپ ءبىتىرۋ مىندەتى تۇر. جەرگە ءدان سەبۋ ىسىنە قارقىندى كىرىسكەن اۋدانداردىڭ ءبىرى–مامليۋت. اۋداندا 54 جشس, 183 شارۋا قوجالىعى جۇمىس ىستەيدى. اۋىل شارۋاشىلىعى ءبولىمى باس­شىسى­نىڭ ورىنباسارى ۆاسيلي ليسيچكيننىڭ مالىمدەۋىنشە, دالا جۇمىستارىنا 900 تراكتور, 776 تۇقىم سەپكىش, 24 وسى زامانعى ەگىس كەشەنى قوسىلعان. وسىنداعى ءىرى شارۋا­شى­لىقتاردىڭ ءبىرى سانالاتىن «مامبەتوۆ جانە ك» كومانديتتىك سەرىكتەستىگى استىق ءوندىرىسىن ارتاراپتاندىرۋعا زور كوڭىل ءبولىپ كەلەدى. 19 مىڭ گەكتاردىڭ ەكى مىڭ گەكتارى – مايلى داقىلدار. بيدايدىڭ «ومسكايا 35», «ومسكايا 36», «استانا» سەكىلدى سۇرىپ­تارىن اۋدانداستىرىپ, مول ءونىم جيناپ ءجۇرمىز. ارپانىڭ «بويارچەنكو» سۇرىبى دا وتە ءتۇسىمدى. ناۋقانعا 80 تەحنيكا, 180 ادام تارتىلعان. تۇقىم, جانار-جاعارماي جەتكىلىكتى, دەيدى باس اگرونوم باتىرجان ساۋىتباەۆ. «يشيم-اگرو-نورد» سەرىك­تەس­تىگى بيدايمەن قوسا راپس, زىعىر, كۇنباعىس وسىرۋگە دە مامان­دانعان. شارۋاشىلىق ديرەكتورى ۆلاديمير گراچەۆ ۇكىمەت تاراپىنان زور قامقورلىقتار جاسالىپ جاتقانىن, ماسەلەن, تىڭايتقىشتاردى 50 پايىز جەڭىل­­دىكپەن العاندارىن قۋانا ايتتى. جۇمىس ەكى اۋىسىمدا ۇيىم­­داس­­تىرىلىپ, تاڭ اتقاننان قاراڭ­­عى­لىق تۇسكەنشە ەن دالادا ەڭبەك ىرعاعى ءبىر تىنىم تاپپايدى. ايىرتاۋ اۋدانىندا كوكتەمگى ەگىس ناۋقانىنا 1155 تراكتور, 1153 تۇقىم سەپكىش, 114 ەگۋ كەشەنى, 480-گە جۋىق جۇك كولىگى اتسالىسۋدا. «دوستىق ءدان» جشس-ءنىڭ بازاسىندا جاۋاپتى ناۋقاندى ۇيىمشىلدىقپەن اتقارۋ جانە اگروونەركاسىپ كەشەنىن دامىتۋ جونىندە سەمينار وتكىزگەن ەدىك. وندا ايتىلعان عالىمدار مەن مامانداردىڭ وي-پىكىرلەرىن جەتە ەسكەرۋدىڭ ارقاسىندا اگرو­تەحنيكالىق شارالار قاتاڭ ساقتالۋدا. شارۋاشىلىقتار 44 مىڭ توننا ساپالى تۇقىممەن, 6 مىڭ توننا ديزەل وتىنىمەن تولىق قامتىلدى, دەدى حابار­لاس­قانىمىزدا اۋدان اكىمى اعزام تاستەمىروۆ. وبلىستىق اۋىل شارۋ­اشى­لىعى باسقارماسىنىڭ ماماندارى بەرگەن مالىمەتتەر بويىنشا, وڭىردەگى بارلىق ەگىستىك القاپتىڭ بەستەن بىرىنە ءدان ءسىڭىرىلىپ, ەڭبەك قارقىنى ورىستەي تۇسكەن. ءومىر ەسقالي «ەگەمەن قازاقستان» سولتۇستىك قازاقستان وبلىسى