ادەپتەن اسقاندارى نەسى؟

بىرەر باسىلىمنىڭ بەتىندە كوڭىلىمە كىربىڭ تۇسىرگەن ۇجىمدىق حاتتاردىڭ شىعىپ كەتۋى قولىما ەرىكسىز قالام الدىرىپ وتىر. ەڭ اۋەلى ايتارىم, مەن سوڭعى كەزدەرى دەنساۋلىعىما بايلانىستى ەلىمىزدىڭ قارا قازانداي قايناپ جاتقان قىزۋ تىرشىلىگىنە ارالاسا الماي, سىرت قالىپ, شەت جايلاپ جۇرگەن اداممىن. سوعان وراي شىعارماشىلىق بەلسەندىلىگىم دە باسەڭدەگەنىن بايقايمىن. قوعامدا وزەكتى ماسەلەلەرگە قاتىستى بولىپ جات­قان پىكىرتالاستارعا دا دەنساۋلىعىما باي­لانىستى ءۇن قوسا الماعانىم راس. بىراق, بۇل وسى بۇكىل ەلدى تولعاندىرىپ وتىرعان ماسەلەلەر تۋرالى مەنىڭ وزىندىك, ازاماتتىق وي-پىكىرىم جوق دەگەن ءسوز ەمەس. تەك ول پىكىرىمدى, ءوز ءسوزىمدى مەن ءوز اۋزىممەن, ءوز قالامىممەن ءوزىم ايتۋىم كەرەك. بۇل رەتتە ماعان كومەكشى, ءتىلماش قاجەت ەمەس. ايتكەنمەن, جاقىندا ەلباسى اتىنا جولدانعان ۇجىمدىق حاتتىڭ سوڭىنا قول قويعان اۆتورلار­دىڭ ىشىنەن ءوز اتىمدى كورىپ, جۇقا­لاپ ايتقاندا, تاڭ قالدىم. مەن ونداي حاتتى جازعان دا ەمەسپىن, كورگەن دە ەمەسپىن. البەتتە, قول دا قويعان جوقپىن. مۇنداي حات­تارعا كورمەي-بىلمەي قول قويار ءيىسالماستى دا باسقا جاقتان ىزدەڭىز. ويپىرماي دەيمىن, ءبىزدىڭ زيالى دەگەن جىگىتتەرىمىز قانداي بولىپ بارادى؟ تىپتەن, الگى حاتتى كورسەتپەي, وقىتپاي, كەلىسىمىمىزدى الماي, سىرتتان قولىمىزدى قويىپ جىبەرۋىن نە دەۋگە سىيادى. ادەپسىزدىك پە, ارسىزدىق پا؟ مەنىڭ ايتپاعانىمدى ايتتى دەۋگە, جازباعانىمدى جازدى دەپ كور­سەتۋگە قايتىپ داتتەرى بارعان؟ سونى بىلە الماي دالمىن. ەستۋىمشە, قولىن سىرتتان قويىپ جىبەرىپ وت باسىپ ويبايلاپ قالعان پاقىرىڭىز جالعىز مەن عانا ەمەس سياقتى. سوندا جاڭا­عى ۇجىمدىق حاتتارىڭىزدا نە قۇن, قانداي قادىر-قاسيەت قالدى؟ جانە دە حاتتىڭ جازىلۋ مانەرىندەگى دورەكىلىكتى, وكتەمدىكتى, وزبىر­لىقتى كورىپ, حاكىم اباي سياقتى, مەن دە «بەتتى باستىم, قاتتى ساستىم». تەك ادامنىڭ سىرتىنان قول قويعىش ونداي پىسىقاي ادەپسىزدەردەن تۇرا قاشقان جوق­پىن. «ەگەمەن قازاقستان» گازەتى ارقىلى ولاردىڭ وسى كەلەڭسىز قى­لىقتارىن ايتۋعا بەكىندىم. قاراپايىم ادەپتى ۇمىتپايىق­شى, اعايىن. ال قۇرمەتتى وقىرمان­نان سۇرايتىنىم, الگى دۇمبىلەز حاتتاردىڭ اۆتورلارى ىشىندە مەنى جوق دەپ ساناۋلارىڭىزدى سۇرايمىن. سەرىك قيراباەۆ, اكادەميك