كەكىلباەۆ كەرۋەنى توقتامايدى

اماندىعىن اللاعا, زامان جۇ­­گىن زاڭعار ۇلدارىنا سەنىپ تاپ­سىرعان قازاققا ابىشتەي ابىزىنان ايىرىلۋ وڭايعا سوقپاعانى بەلگىلى. ولگەنىن جىرمەن جوقتاعان, ءتىرىسى سوزگە توقتاعان ەل ازاماتتا­رى كەشە ۇلتتىق اكادەميالىق كىتاپحانا ۇجىمىنىڭ ۇيىتقى بولۋىمەن زامانىمىزدىڭ زاڭعار جازۋشىسىن ەسكە الۋعا ارنالعان ادەبي كەش وتكىزدى. كەش اياسىندا جۇمابەك مۇقانوۆتىڭ جازۋشى ءابىش كەكىل­باي ۇلىنىڭ ومىرىنە ارنالعان ء«جۇز كۇندىك جالعىزدىق» اتتى ەس­تەلىك كىتابىنىڭ تۇساۋكەسەرى بولدى. اتالمىش تۋىندىنىڭ تۇساۋىن قازاقستان رەسپۋبليكاسى ارداگەرلەر ۇيىمى ورتالىق كە­ڭەسىنىڭ توراعاسى ومىرزاق وز­عانباەۆ پەن بەلگىلى كومپوزيتور ءىليا جاقانوۆ كەسىپ, ورامدى ويلارىن ورتاعا سالدى. «بۇكىل ەل جينالىپ ابەكەڭمەن قوشتاسقان ءسات قازاق ءۇشىن اۋىر بولدى. مەن سول ساتتە بالداعىنا سۇيەنىپ كەلگەن جانداردى كوردىم, مۇگەدەكتىڭ ارباسىنا تاڭىلىپ وتىرسا دا سول قوشتاسۋعا قاتىسقان كىسىلەردى كوردىم, ءابىشتىڭ وتباسىنا كوڭىل ايتىپ جاتقان جانداردان بولەك, ءبىر-بىرىنە كوڭىل ايتىپ جاتقانداردى كوردىم. سول ۋاقىتتا ەلدىڭ, حالىقتىڭ ول كىسىگە دەگەن ىستىق ىقىلاسىن, ءمولدىر ماحابباتىن بايقاپ, تەرەڭ تەبىرەنىستى كۇي كەشتىم. بۇگىن تۇساۋىن كەسىپ وتىرعان بۇل كىتاپ قازاق ءۇشىن قازىنا دەسەك بولادى. سەبەبى, ونىڭ ىشىندە ءابىش تۋرالى ەلباسى باستاپ, ەل ازاماتتارى قوستاپ, تامىر-تانىس, جورا-جولداستارى تولىقتىرعان لەبىزدەر لەگى مەن ەسكىرمەس ەستەلىكتەر قامتىلعان. ونىڭ عاجابى دا وسىندا», – دەدى ومىرزاق وزعانباەۆ. ءابىش كەكىلباەۆقا ارنالعان شاراپاتتى شارانى بەلگىلى قوعام قايراتكەرى مىرزاتاي جولداسبەكوۆ جۇرگىزىپ, تامىرى تەرەڭ تاريح قويناۋىنان ءابىش جايلى ءارتۇرلى وي-تولعامداردى ورتاعا سالدى. سونداي-اق, قوعام قايراتكەرلەرى, عالىمدار قوناق بولىپ پايىمدى پىكىرلەرىن بىلدىرسە, اقىن, حالىقارالىق «الاش» سىيلىعىنىڭ يەگەرى سەرىك تۇرعىنبەكوۆ ولەڭ وقىپ, ءوز ءسوزىن جىرمەن جەتكىزدى. راۋان قايدار, «ەگەمەن قازاقستان»