جامبىل وبلىسىندا تاسقىن بولۋى مۇمكىن جەرلەر اۋەدەن باقىلاندى

تاراز. 18 مامىر. جامبىل وبلىسى توتەنشە جاعدايلار دەپارتامەنتىنىڭ باستاۋىمەن ارنايى كوميسسيا وڭىردەگى قاتتى جاۋىن سالدارى مەن وبلىس اۋماعىندا بولاتىن جاۋىن-شاشىن بولجامىنىڭ نەگىزىندە اەروۆيزۋالدى تەكسەرىس جۇرگىزدى. بۇل تۋرالى egemen.kz ءتىلشىسى حابارلادى. جامبىل, ت. رىسقۇلوۆ, مەركى, شۋ, جۋالى جانە تالاس اۋداندارىندا «قازاۆياقۇتقارۋ» اكتسيونەرلىك قوعامىنىڭ مي-8ت تىكۇشاعىمەن اەروۆيزۋالدى تەكسەرىس جۇرگىزىلدى. سۋ نەمەسە سەل تاسقىنى قاۋپى بولۋى مۇمكىن وزەندەر, سۋ قويمالار مەن 4 مۇزدىق كولدەر قامتىلدى», دەدى جامبىل وبلىسى توتەنشە جاعدايلار دەپارتامەنتى باسشىسىنىڭ ورىنباسارى ەرىك الپىسباەۆ. توتەنشە جاعدايلار دەپارتامەنتىنىڭ مالىمەتىنشە, كوميسسيا قۇرامىمەن ت. رىسقۇلوۆ, مەركى, جانە جۋالى اۋداندارىنىڭ اۋماعىنداعى قىرعىز جانە تالاس الاتاۋ بوكتەرىندە شامالى قار قورىنىڭ قالعانى انىقتالدى. قازىرگى كەزدە بارلىق وزەندەردە وتكەن جىلعى كورسەتكىشتەردەن سۋ مولشەرى كوپ. ءدال وسى جاعداي سۋ قويمالارىندا دا ورىن العان. سونىمەن قاتار, جاۋىن-شاشىننىڭ كوپ مولشەردە بولۋ سالدارىنان كار قورىنىڭ تەز ەرۋ ىقتيمالدىعى بار, بەتكەيلەردە اعىندار پايدا بولىپ, وزەندەردە سۋ دەڭگەيلەرى تەز كوتەرىلىپ سەل اعىنى پايدا بولۋى مۇمكىن. سۋ نەمەسە سەل تاسقىنى قاۋپى سالدارىنا بايلانىستى توتەنشە جاعدايلاردىڭ الدىن الۋ ماقساتىندا كوميسسيا قۇرامىمەن جەرگىلىكتى اتقارۋشى ورگاندارعا قاتىستى مەملەكەتتىك مەكەمەلەرمەن جانە ۇيىمدارمەن بىرلەسىپ  ەلدى مەكەندەر مەن شارۋاشىلىق وبەكتىلەرىن جانە اۋماقتى قورعاۋ بويىنشا كەشەندىك ءىس-شارالار جۇرگىزۋ جونىندە ۇسىنىستار بەرىلدى. ورالحان ءداۋىت. دەرەك, فوتو: egemen.kz