سولتۇستىك قازاقستاندا ەتنوس جاستارىنىڭ رەسپۋبليكالىق فورۋمى ءوتتى

پەتروپاۆل. 17 مامىر. سولتۇستىك قازاقستان وبلىستىق تىلدەردى دامىتۋ جانە قوعامدىق-ساياسي جۇمىس كوميتەتىنىڭ ۇيىمداستىرۋىمەن ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى «ءتىل – تاتۋلىق تىرەگى» اتتى ەتنوس جاستارىنىڭ رەسپۋبليكالىق فورۋمى ءوتتى. بۇل تۋرالى وبلىستىق تىلدەردى دامىتۋ باسقارماسىنا سىلتەمە جاساعان egemen.kz ءتىلشىسى حابارلادى. بيىلعى اۋقىمدى شارا ەل تاۋەلسىزدىگىنىڭ 25 جىلدىعىنا ارنالىپ, قازاق ءتىلىنىڭ قولدانىس اياسىن كەڭەيتۋ, مارتەبەسى مەن ماڭىزىن كەڭىنەن ناسيحاتتاۋ, مەملەكەتتىك ءتىلدى مەڭگەرگەن ەتنوس جاستارىنا قولداۋ كورسەتۋ ماقساتىن دىتتەدى. كەڭ-بايتاق ەلىمىزدىڭ ءار قيىرىنان كەلگەن دەلەگاتتاردىڭ باسىن بىرىكتىرگەن القالى جيىنعا قازاقستان حالقى اسسامبلەياسىنىڭ, مادەنيەت جانە سپورت مينيسترلىگىنىڭ, «جاس وتان» جاستار قاناتىنىڭ وكىلدەرى, ستۋدەنتتەر, مەملەكەتتىك ءتىلدى مەڭگەرگەن ەتنوس جاستارى قاتىستى. جيىندا وبلىس اكىمىنىڭ ورىنباسارى انارحان دۇيسەنوۆا ايماق باسشىسىنىڭ قۇتتىقتاۋىن جەتكىزدى. قازاقستان حالقى اسسامبلەياسىنىڭ ءباسپاسوز حاتشىسى قۇرمانبەك قازانباسوۆ, اقمولالىق راۆيل ابۋلحانوۆ, استانالىق سەرگەي اگەەۆ, قاراعاندىدان كەلگەن نيگارا پايزيەۆا, ورال وڭىرىنەن ۆەنەرا سۋروۆتسەۆا, سولتۇستىكقازاقستاندىق سۆەتلانا ماگۋيانوۆا, تىلدەردى دامىتۋ جانە قوعامدىق-ساياسي جۇمىس كوميتەتىنىڭ باسقارما باسشىسى تولقىن يساقوۆا, تاعى باسقالارىنىڭ سوزدەرى ءتىلى ءبىر ەلدىڭ بىرلىگى دە بەكەم بولماق دەگەن وي-پىكىرلەرمەن ۇندەسىپ جاتتى. فورۋم دەلەگاتتارى ۇندەۋ قابىلداپ, ەلىمىزدىڭ جاستارىن يگى ىستەردىڭ ۇيىتقىسى بولۋعا, تىلدەردىڭ ۇشتۇعىرلىعى ساياساتىن قولداۋعا شاقىردى. ءومىر ەسقالي. دەرەك, فوتو: سولتۇستىك قازاقستان وبلىستىق تىلدەردى دامىتۋ باسقارماسىنىڭ ءباسپاسوز قىزمەتى.