استانا. 16 مامىر. وسكەمەندە ەلىمىز تاۋەلسىزدىگىنىڭ 25 جىلدىعىنا ارنالعان مەكتەپ, كوللەدج وقۋشىلارىنىڭ ءVىىى جازعى سپارتاكياداسىنىڭ كەزەكتى تۋرى ءوتتى. بۇل تۋرالى جۋرناليست وڭداسىن ەلۋبايدىڭ اقپارى بويىنشا egemen.kz ءتىلشىسى حابارلادى.
وعان الماتى, شىعىس قازاقستان, وڭتۇستىك قازاقستان, قاراعاندى وبلىستارى, الماتى جانە استانا قالالارىنىڭ سەمسەرلەسۋ, راپيرا, شپاگا شەبەرلەرى قاتىستى.
«بيىل ەلىمىزدە سەگىزىنشى رەت مەكتەپ وقۋشىلارى مەن كوللەدج ستۋدەنتتەرىنىڭ سپارتاكياداسى وتكىزىلىپ وتىر. ول ەكى جىلدا ءبىر رەت, قىسقى جانە جازعى سپورت تۇرلەرى بويىنشا ءوتىپ تۇرادى. بۇگىنگە دەيىن ءار قالالاردا ۆولەيبول, ۆولەيبولدىڭ كلاسسيكالىق تۇرىنەن, فۋتزالدان جارىستار ءوتتى. وندا سپورتشىلار جارىستىڭ 53 تۇرىنەن كۇش سىناستى. سپارتاكيادانىڭ ماقساتى — بۇقارالىق سپورتتى ناسيحاتتاۋ, ەلىمىزدىڭ داڭقىن ارتتىراتىن جاس ۇرپاقتى تاربيەلەۋ, بولاشاق وليمپيا ويىندارى مەن الەم چەمپيوندارىن دايىنداۋ», دەيدى مەكتەپ وقۋشىلارىنىڭ سپارتاكيداسىن ۇيىمداستىرۋشى, ءبىلىم جانە عىلىم مينيسترلىگىنە قاراستى ۇلتتىق عىلىمي-پراكتيكالىق ورتالىقتىڭ جاۋاپتى قىزمەتكەرى, ەلىمىزگە ەڭبەگى سىڭگەن جاتتىقتىرۋشى, پروفەسسور سەزحان اۋباكىروۆ. ونىڭ ايتۋىنشا, سپارتاكيادا ويىندارىن وتكىزۋ ەلىمىزدىڭ بەس قالاسىندا — شىمكەنت, تاراز, الماتى, استانا, وسكەمەندە جوسپارلانىپتى. الداعى شىلدەدە شىعىستا ۆەلوجارىس, ماۋتينبايگ, سەمسەرلەسۋدەن سايىستار وتسە, باسقا قالالاردا سپورتتىڭ وزگە تۇرلەرىنەن جارىستار ءوتىپ, وعان 10 مىڭنان استام ادام قاتىسپاق. سەمسەرلەسۋ, شپاگا مەن راپيرا – وليمپيا ويىندارىنىڭ باعدارلاماسىنا ەنگەن سپورت ءتۇرى. سوندىقتان بولار, جىل سايىن سپورتتىڭ وسى تۇرىمەن شۇعىلداناتىن جەتكىنشەكتەر قاتارى ءوسىپ كەلەدى. قازىر سەمسەرلەسۋمەن ەلىمىز بويىنشا 20 مىڭنان استام ادام اينالىسادى ەكەن. ولاردىڭ ىشىندە ازيا ويىندارىندا توپ جارعان ساڭلاقتار از ەمەس. وڭتۇستىك قازاقستان وبلىسىنىڭ اعا جاتىقتىرۋشىسى, كسرو سپورت شەبەرى قارلىعاش سايحانوۆا سپارتاكياداعا 24 قىز-جىگىتتەردى الىپ كەلىپتى. ولاردىڭ ىشىندە سپورت شەبەرى تاڭشولپان ايتجانوۆا, سايانا سايحانوۆا, قۇرالبەك باقداۋلەت, تولەبي قالدىبەك ۇلى سەمسەرلەسۋمەن ءۇش-ءتورت جىلدان بەرى شۇعىلدانىپ, ەل چەمپيوندارى نەمەسە جۇلدەلى ورىنداردى يەلەنگەندەر. ال قۇرالبەك باقداۋلەت وسى جولى دا چەمپيون اتاندى.
«ءبىز شەبەرلىكتى جەتىلدىرىپ وتىرامىز. جاتتىقتىرۋشىمىز قارلىعاش رىستانبەكقىزى قاتال, تالاپ قويا بىلەتىن مامان. بيىلدىڭ وزىندە سايانا دانيادا وتكەن حالىقارالىق تۋرنيرگە, ال تاڭشولپان فرانتسيادا وتكەن جاسوسپىرىمدەر اراسىنداعى الەم چەمپيوناتىنا قاتىسىپ, ونەر كورسەتتى. باسقا شاكىرتتەرى دە شەتەلدەرگە ءجيى شىعىپ, شەبەرلىكتەرىن جەتىلدىرە تۇسۋدە», دەيدى ەل چەمپيونى اتانعان قۇرالبەك باقداۋلەت.
ارىپتەسىمىز وڭداسىن ەلۋبايدىڭ ايتۋىنشا, وسكەمەندەگى جەكپە-جەك سارايىندا وتكەن سپارتاكيادانى رەسپۋبليكالىق عىلىمي-پراكتيكالىق ورتالىق پەن وبلىستىق ءبىلىم باسقارماسى (باسشىسى ايجان سادىقوۆا) جوعارى دەڭگەيدە وتكىزدى. سپارتاكيادادا راپيرادان ەرلەر اراسىنداعى كوماندالىق ەسەپتە شىعىس قازاقستان وبلىسىنىڭ شەبەرلەرى توپ جارسا, ەكىنشى, ءۇشىنشى ورىندى الماتى قالاسى مەن الماتى وبلىسىنىڭ وكىلدەرى يەلەندى. ال قىزدار اراسىندا قۇرامىندا گۇلجان تۇسىپبەكوۆا, اياۋلى وتەۋلەنوۆا, دايانا ءتۇسىپجانوۆا, يۋليا بۋرگۋچەۆا بار سپورتشىلار راپيرانىڭ ھاس شەبەرلەرى ەكەنىن دالەلدەدى. ەكىنشى, ءۇشىنشى ورىندى الماتى جانە استانا قالاسىنىڭ وكىلدەرى ءبولىستى. سەمسەرلەسۋ بويىنشا كوماندالىق ەسەپتە ەرلەر اراسىندا الماتى قالاسى, وڭتۇستىك قازاقستان وبلىسى, استانا قالاسىنىڭ شەبەرلەرى جۇلدەلى ورىندارمەن ءبولىستى. ال قىزدار اراسىندا الماتى قالاسىنىڭ ساڭلاقتارى بەت قاراتپاي قارسىلاستارىنان باسىم تۇسسە, ودان كەيىنگى ورىندارعا وڭتۇستىك قازاقستان وبلىسى مەن الماتى وبلىسىنىڭ سپورتشىلارى تابان تىرەدى. شپاگادان ەرلەر اراسىندا كوماندالىق ەسەپتە الماتى قالاسى, شقو جانە الماتى وبلىسىنىڭ سەركەلەرى جۇلدەلى ورىندارمەن ءبولىستى. ال قىزدار اراسىندا الماتى قالاسى, شىعىس قازاقستان وبلىسى مەن استانا قالاسىنىڭ سايىپقىراندارى ازىرشە ەلىمىزدە مىقتى ەكەندەرىن دالەلدەدى.
«وسكەمەندەگى ءدۇبىرلى دودادان بايقاعانىمىز, قىلىشتاسۋدىڭ ءۇش ءتۇرىنىڭ دە ەلىمىزدە كۇرت دامىپ كەلە جاتقانىنا كوز جەتكىزدىك», دەيدى «ەگەمەن قازاقستان» گازەتىنىڭ قۇرمەتتى ءجۋرناليسى وڭداسىن ەلۋباي.
داستان كەنجالين.
دەرەك, فوتو: وڭداسىن ەلۋباي.
