استانا. 15 مامىر. شۆەتسيا استاناسى ستوكگولمدە وتكەن «ەۋروۆيدەنيە-2016» ءان بايقاۋىندا ۋكراينا ءانشىسى دجامالا جەڭىمپاز اتاندى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
بايقاۋدا ول «1944» ءانىن شىرقادى. ناتيجەسىندە 534 ۇپاي جيناپ, جەڭىمپاز اتاندى. دجامالا وپەرا جانە دجاز ءانشىسى. وسىدان 6 جىل بۇرىن, ياعني 2009 جىلى لاتۆيانىڭ يۋرمالا قالاسىندا وتكەن «جاڭا تولقىن» جاس ورىنداۋشىلاردىڭ حالىقارالىق كونكۋرسىندا باس جۇلدەنى جەڭىپ العاننان كەيىن تانىمال بولا باستادى.
جارىس قورىتىندىسى بويىنشا, ەكىنشى ورىن اۆستراليا ءانشىسى دەمي يمگە بۇيىرسا, ۇزدىك ۇشتىكتى رەسەي ءانشىسى سەرگەي لازارەۆ تۇيىندەدى.
قورىتىندى كەزەڭدە 26 ءانشى باعىن سىنادى: ەكى جارتىلاي فينالدان 10 جەڭىمپاز, سونىمەن قاتار شۆەتسيادا ءوتىپ جاتقانى ءۇشىن وسى مەملەكەتتىڭ انشىلەرى ءارى «ۇلكەن بەستىك» (كونكۋرستىڭ نەگىزىن قالاعاندار مەن دەمەۋشىلەرى) ۇلىبريتانيا, گەرمانيا, يسپانيا, يتاليا جانە فرانتسيا ەلدەرىنىڭ انشىلەرى قاتىستى.
ايان ءابدۋالي.
دەرەك, فوتو: تاسس.