م.تىنىشباەۆ اتىنداعى قازاق كولىك جانە كوممۋنيكاتسيالار اكادەمياسىندا ۇلى جەڭىستىڭ 71 جىلدىعى قارساڭىندا قوس باتىر قىزىمىزعا ارنالعان اشىق كافەدرا كۇنى ءوتتى.
ەلىمىزدىڭ كولىك-كوممۋنيكاتسيالىق كەشەنىنە, ونىڭ ىشىندە تەمىرجول مەن اۆتوجول كولىكتەرى, سونداي-اق, تەلەكوممۋنيكاتسيالار سالالارى بويىنشا جوعارى بىلىكتى ماماندار دايارلايتىن بىردەن-ءبىر جەتەكشى جوعارى وقۋ ورنى بولىپ تابىلاتىن اتالمىش اكادەميا بيىل ءوزىنىڭ 85 جىلدىق مەرەيتويىن اتاپ وتۋگە دايىندىق ۇستىندە.
مەرەيتوي قارساڭىندا «ۋاقىت – تاريحتىڭ كوزى, نۇرى!» دەگەن تاقىرىپتا بايقاۋ جاريالانىپ, ول ءىس-شارالار الدىن الا جاسالعان كەستە بويىنشا وتكىزىلۋدە. وسىنداي كافەدرا كۇنىن جۋىردا «اۆتوموبيلدەر, جول تەحنيكاسى جانە ستاندارتتاۋ» كافەدراسىنىڭ پروفەسسورلىق-وقىتۋشىلار قۇرامى №3 ستۋدەنتتەر ۇيىندە «باتىر اپالار ەرلىگىنە – مىڭ تاعزىم!» دەگەن تاقىرىپتا وتكىزدى. تاقىرىپتىڭ ءوزى ايتىپ تۇرعانداي, اڭگىمە-سۇحبات ۇلى جەڭىستىڭ 71 جىلدىعىنا ارنالدى. ءىس-شارا ستۋدەنتتەر ءۇيىنىڭ بىرنەشە بولمەلەرىن ارالاپ, ستۋدەنتتەردىڭ ءومىر-تىرشىلىگىمەن تانىسۋدان باستالدى. تاعى ءبىر ايتا كەتەتىن جايت, اكادەميا ستۋدەنتتەردىڭ جاتاقحانا تاپشىلىعىن سەزىنبەيتىن جوعارى وقۋ ورىندارىنىڭ بىرىنەن سانالادى. ال جاتاقحانانىڭ ستۋدەنتتەر ءۇيى دەپ اتانۋى – ونداعى ءار بولمە ۇلكەن جانە كىشى سەكتسيادان پاتەر ۇلگىسىندە سالىنعان.
سونان سوڭ كافەدرا كۇنى لىق تولعان وقۋ زالىندا جالعاستى. اڭگىمە-سۇحباتتى كافەدرا مەڭگەرۋشىسى م.س.كۋلگيلدينوۆ اشىپ, ستۋدەنتتەردى اكادەميانىڭ كەلە جاتقان مەرەيتويىمەن قۇتتىقتاپ, وقۋ ۇدەرىسىندە الدا بولۋعا شاقىردى. ال نەگىزگى بايانداماشى كافەدرا دوتسەنتى, قازاقتىڭ باتىر قىزدارى ءاليا مەن مانشۇكتىڭ ونەگەلى ەرلىك ءومىرىن زەرتتەۋشى, قوس اپاسى جەرلەنگەن پسكوۆ وبلىسىندا ءتورت رەت بولىپ, رۋحتارىنا تاعزىم ەتىپ قايتقان, 2015 جىلدىڭ ۇزدىك وقىتۋشىسى كەڭەس ءجۇسىپوۆ بولدى.
ول قازاقتىڭ باتىر قىزدارى ءاليا مەن مانشۇكتىڭ ەرلىككە تولى جارقىن ءومىرى, وتان سوعىسىنداعى كورسەتكەن ەرلىگى, تۋعان ەلگە دەگەن زور ماحابباتى – حالقىمىزعا, بارلىق ۇرپاققا ۇلگى-ونەگە بولاتىنى جايلى اسەرلى اڭگىمە شەرتتى. ءوزىنىڭ اكادەميا ستۋدەنتتەرىمەن بىرگە قازاقتىڭ قوس باتىر قىزدارى جەرلەنگەن رەسەيدىڭ پسكوۆ وبلىسىنداعى نوۆوسوكولنيكي جانە نەۆەل قالالارىنا جاساعان ساپارلارى جايىندا, ياعني اپالارىمىزدىڭ بەيىتتەرىنە گۇل شوقتارىن قويىپ, رۋحتارىنا قۇران باعىشتاپ, تاعزىم ەتىپ قايتقاندارى جايلى سلايدتار ارقىلى تارتىمدى دا قىزىقتى ايتىپ بەردى. ال ساپارعا قاتىسقان ستۋدەنتتەردىڭ ۇشەۋى دە قازىرگى تاڭدا اكادەميادا العان ماماندىقتارى بويىنشا قازاقستان تەمىرجولىنىڭ استانا, اقتوبە جانە قىزىلوردا بولىمشەلەرىندە قىزمەت اتقارىپ جۇرگەندەرى جايلى حابارلاپ ءوتتى.
بيىل تامىز ايىندا نوۆوسوكولنيكي قالاسى مەن ءاليا اپامىز شايقاستا ەرلىكپەن قازا بولعان ناسۆا ستانساسىنا 115 جىل تولاتىندىعى, وسى مەرەيتويعا رەسەيلىك دوستار اكادەميادان قوناقتار شاقىرىپ جاتقاندىعى, وسى ساپارعا دايىندىقتىڭ باستالىپ كەتكەندىگى, بارۋعا نيەت بىلدىرگەن ستۋدەنتتەرگە جول اشىق ەكەندىگى جايلى دا ايتىلدى.
– قازاقتىڭ قاھارمان قىزدارى ءاليا مەن مانشۇك رەسەي جەرىنىڭ سوناۋ الىس تۇكپىرىندە ۇلتىمىزدىڭ مەرەيىن ۇستەم ەتىپ, قايسار قازاقتىڭ رۋحى مەن اسقاق ەرلىگىن الەمگە تانىتىپ, ماڭگى ۇيقىدا جاتىر, – دەدى جيىن سوڭىندا ساپار جەتەكشىسى, دوتسەنت كەڭەس ءجۇسىپوۆ. – ولاردىڭ ەرلىككە تولى قىسقا عۇمىرى جايلى زەرتتەۋشىلەر جازىپ ءبىتتى, كوزكورگەندەر, وكىنىشكە وراي, بۇگىندە جوق. ەندىگى ماسەلە – باتىر اپالارىمىزدىڭ بەيىتى سوندا جاتقاندىقتان سول جەردەگى جەرگىلىكتى حالىقپەن دوستىق قاتىناستى ءۇزىپ الماي, جاستار جاعى ءجيى-ءجيى اتباسىن بۇرىپ, ۇنەمى تىعىز بايلانىستا بولعانىمىز دۇرىس شىعار. سونىڭ ءبىر ايعاعى رەتىندە وسى بۇگىن اڭگىمە بولعان ساپاردى ايتۋعا بولادى.
وتانعا دەگەن سۇيىسپەنشىلىك, پاتريوت دەگەن ۇعىمداردىڭ بوس ءسوز ەمەس ەكەندىگىنە وسكەلەڭ ۇرپاق تاعى دا ءبىر كوز جەتكىزدى. وعان ۇلگى – قوس باتىر اپامىزدىڭ ەرلىكتەرى!
گۇلزەينەپ سادىرقىزى,
«ەگەمەن قازاقستان»
الماتى