عارىش سالاسىن مەڭگەرىپ 3 بىردەي قازاق عارىشكەرىنىڭ زەڭگىر كوككە كوتەرىلۋى تاۋەلسىز قازاقستاننىڭ 25 جىل ىشىندەگى ۇلكەن جەتىستىكتەرىنىڭ ءبىرى. البەتتە, عارىشكەر بولۋدى ارماندامايتىن بالا جوق شىعار؟ ال, ول ءۇشىن ءبىلىمدى, زەرەك, كۇش-قايراتى مول ازامات بولىپ وسۋلەرى قاجەت. تاياۋدا ەل تاۋەلسىزدىگىنىڭ 25 جىلدىعى جانە حالىقارالىق عارىشكەرلەر كۇنىنە وراي «اتامەكەن» قازاقستان كارتاسى» ەتنو-مەموريالدىق كەشەنىندە وتكەن «تاۋەلسىزدىكتىڭ تاڭ نۇرىنا بولەنگەن قاناتتى قازاقتار» اتتى مادەني ءىس-شارادا باقىتتى بالعىندار ءوز ونەرلەرىمەن ءبولىستى. بۇل ماڭىزدى شارانى اتالمىش كەشەن قىزمەتكەرلەرى مەن استانا قالالىق رايىمبەك باتىر اتىنداعى №50 «قازعارىش» مەكتەپ-ليتسەيى بىرلەسىپ ۇيىمداستىرعانىن ايتۋ ءلازىم.
مەرەكەلىك شارانىڭ شىمىلدىعىن اشىپ, قۇتتىقتاۋ ءسوز ءسويلەگەن «اتامەكەن» قازاقستان كارتاسى» ەتنو-مەموريالدىق كەشەنىنىڭ ديرەكتورى الما التىباەۆا كىشكەنتاي ورەندەرگە قاراپ: «عارىشقا كەز كەلگەن ادامدى ۇشىرا بەرمەيدى. سول ءۇشىن ساباقتى جاقسى وقىپ, ءتارتىپتى بالا بولىڭدار. توقتار, تالعات, ايدىن اعالارىڭ سياقتى, قازاقستاننىڭ بەتكە ۇستار باتىر, قاھارمان ازاماتتارى بولۋلارىڭا تىلەكتەسپىز», – دەدى اعىنان جارىلىپ.
سونىمەن قوسا, جاس وركەندەر الدىندا فيزيكا-ماتەماتيكا عىلىمدارىنىڭ كانديداتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى «عارىشتىق تەحنيكا جانە تەحنولوگيالار» كافەدراسىنىڭ دوتسەنتى ابدىقۇل اشۋروۆ, «استانا مادەنيەتى», «يكوم قازاقستان» جۋرنالدارىنىڭ باس رەداكتورى قۋاندىق شاماحاي ۇلى, رايىمبەك باتىر اتىنداعى №50 «قازعارىش» مەكتەپ-ليتسەيى ديرەكتورىنىڭ ءتاربيە ءىسى جونىندەگى ورىنباسارى نۇراش يسكاكوۆا جانە باسقالار عارىشقا قاتىستى عيبراتتى اڭگىمەلەر ايتتى.
سونداي-اق, تاقىرىپ شەڭبەرىندە «نە سەبەپتى عارىش ايلاعى بايقوڭىرعا سالىنعان؟», «عارىش الاڭىن سالۋ ءۇشىن قانداي شارتتاردى نەگىزگە الۋ كەرەك؟», «عارىش قانداي الەم؟» دەگەن سىندى قىزىقتى ساۋالدار بالا قيالىنداعى شابىتتى كەڭىستىك الەمىنە ۇشتاپ, شارىقتاتىپ جىبەرگەندەي بولدى. شارادا بايقوڭىر عارىش ايلاعى مەن قازاق عارىشكەرلەرى تۋرالى بەينەتاسپالار كورسەتىلىپ, سلايدتار قورعالدى. عارىشكەرلەر كۇنىنە وراي كورمە دە ۇيىمداستىرىلعان ەكەن. ونەرلى ورەندەر وسى تاقىرىپقا ساي ءوز شىعارمالارىن ۇسىنىپ, پاتريوتتىق تاقىرىپتا اندەر شىرقادى.
جيىن سوڭىندا وسى ءىس-شاراعا بەلسەنە اتسالىسقان وقۋشىلار ارنايى العىس حاتتارمەن ماراپاتتالدى.
راۋشان تاۋىرحانقىزى,
«ەگەمەن قازاقستان».
سۋرەتتى تۇسىرگەن
ورىنباي بالمۇرات.
قازاقتىڭ عارىشكەرلەرى
ءانى: ق.ماقانوۆتىكى
ءسوزى: ە.تىلەپبەردىنىكى
قازاقتىڭ باتىر ۇلدارى,
ارقالاپ ەلدىڭ سەنىمىن,
عارىشقا تىلسىم زىرلادى,
بايگەگە تىگىپ ءومىرىن.
قايىرماسى:
تاۋەلسىز ەلدەن,
كوك تۋلى توردەن,
بەتكە الىپ جۇلدىز, اي, كۇنىن,
ەلباسى, ەل بوپ,
باتاسى كول بوپ,
اسىرعان ەلدىڭ ايبىنىن!
قۋات اپ جەردەن,
تىلسىمدى جەڭگەن,
توقتار مەن تالعات, ايدىنىم!
ماڭگىلىك ەلدىڭ تىرەگى,
سەندەرگە تارتسىن ۇلاندار.
الاشتىڭ التىن جۇرەگىن,
قورعاسىن قايسار قىراندار!
بايقوڭىر بايتاق دالامىز,
ۇشىرعان ايعا ەر سەندەر.
تورعايدان قۇشاق جايامىز,
عارىشتى شارلاپ كەلسەڭدەر.