وڭىردە باتىس قازاقستان ايماعىنىڭ جانە قىزىلوردا وبلىسىنىڭ تۇرعىندارىنا قىزمەت كورسەتەتىن مەديتسينالىق كلاستەر قۇرۋدىڭ قادامدارى جاسالۋدا. بۇعان دەيىن تۇركيا, رەسەي, يزرايل ەلدەرىنىڭ دەنساۋلىق ساقتاۋ سالاسى وكىلدەرىمەن ىنتىماقتاستىق مەموراندۋمىنا قول قويىلعان بولاتىن. جاقىندا مۇنداي كەلىسىم وڭتۇستىك كورەيا مەملەكەتى وكىلدەرىمەن دە جاسالدى. وسى ىنتىماقتاستىق مەموراندۋمى اياسىندا وبلىسقا كەلگەن وڭتۇستىك كورەيا كلينيكاسىنىڭ پروفەسسورى چانگوم حەنگوم سەوكو ەكى كۇندە ۇيقى بەزى اۋرۋىنا شالدىققان 6 ناۋقاسقا وتا جاسادى. جاسالعان وتالار ءساتتى شىقتى. ول وتا جاساۋمەن بىرگە, اۋرۋلاردى قابىلداپ, كەڭەس بەردى. وبلىستىق دەنساۋلىق ساقتاۋ باسقارماسىنىڭ دەرەگى بويىنشا, شەبەرلىك سىنىبىن وتكىزۋ بارىسىندا ءارتۇرلى اۋرۋلارعا شالدىققان 60 ادامدى قاراعان.
حيرۋرگ چانگ حەنگ سەوكونى قابىلداعان وبلىس اكىمى بەردىبەك ساپارباەۆ بۇگىنگى تاڭدا وڭىردە مەديتسينالىق كلاستەردى قۇرۋ ورايىنداعى باستى مىندەت بىلىكتى مەديتسينا كادرلارىن دايارلاۋ بولىپ وتىرعانىن, بۇل ماسەلەدە وڭتۇستىك كورەيا دارىگەرلەرىنە ۇلكەن ءۇمىت ارتىلاتىنىن جەتكىزدى. ول سونداي-اق, اقتوبەلىك دارىگەرلەردىڭ چانگ حەنگ سەوكو سىندى كاسىبي بىلىكتىلىگى جوعارى مامانداردىڭ تاجىريبەسى مەن بىلىمىنەن ۇيرەنۋلەرىنە مۇددەلى ەكەنىن اتاپ ءوتتى.
چانگ حەنگ سەوكو ءوز كەزەگىندە كورسەتىلگەن سەنىم ءۇشىن ريزاشىلىعىن ءبىلدىرىپ, اقتوبەلىك دارىگەرلەرمەن تاجىريبەسىن بولىسۋگە ارقاشان دايىن ەكەنىن جەتكىزدى. كەزدەسۋ سوڭىندا ءوڭىر باسشىسى ازيا – تىنىق مۇحيت ايماعىنىڭ جەتەكشى عالىمدارىنىڭ قاتىسۋىمەن وسى جىلى وبلىستا عىلىمي-تاجىريبەلىك كونفەرەنتسيا وتكىزۋدى ۇسىندى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.