ەلوردادا مادەنيەت جانە اقپارات مينيسترلىگى تاپسىرىسى بويىنشا تۇسىرىلگەن «ساعادات نۇرماعامبەتوۆ. سوڭعى سۇحبات» دەرەكتى ءفيلمىنىڭ پرەمەراسى ءوتتى.
ءفيلمنىڭ اتى ايتىپ تۇرعانداي, ەكراندىق تۋىندى كەڭەس وداعىنىڭ باتىرى, تاۋەلسىز قازاقستاننىڭ تۇڭعىش قورعانىس ءمينيسترى, ارميا گەنەرالى, حالىق قاھارمانى ساعادات نۇرماعامبەتوۆتىڭ ءومىرى مەن ونەگەلىك مەكتەبى تۋرالى باياندايدى.
«ءبىرتۋار سارداردىڭ بەيمالىم قىرلارىن اشۋعا كوبىرەك ءمان بەرىلگەن تۋىندى كوپشىلىككە ۇناۋى ءتيىس. قايراتكەردىڭ ادەبيەت پەن ونەرگە دەگەن سۇيىسپەنشىلىگى, وتباسى قۇندىلىقتارىن قورعاۋداعى شىنايىلىعى كەيىنگى ءوسىپ كەلە جاتقان جاس ۇرپاق ءۇشىن قاشاندا ۇلگى بولىپ قالا بەرەدى. مۇنداي قايتالانباس تاعدىرلار تۋرالى ەشقاشان ۇمىتپاۋعا ءتيىسپىز. وسى ورايداعى يدەيامىزدى ويداعىداي جۇزەگە اسىرا الدىق دەپ ەسەپتەيمىن» دەدى ءفيلمنىڭ رەجيسسەرى ساتىبالدى تەكەەۆ جۋرناليستەرگە بەرگەن سۇحباتىندا.
دەرەكتى كارتينا تۇلعانىڭ لەيتەنانت-مايدانگەردەن قولباسشىلىققا دەيىنگى ءومىر جولى, قازاقستان قارۋلى كۇشتەرىندەگى كوپ جىلعى قىزمەتى تۋرالى باياندايدى. تۋىندىنىڭ باسىم بولىگى رەجيسسەردىڭ كەيىپكەرمەن بولعان ءبىراز جىلدار بۇرىنعى سوڭعى سۇحباتىن قامتيدى.
تاعى ءبىر ايتا كەتەتىن جايت, پرەمەرالىق كورسەتىلىمدى قارۋلى كۇشتەر ارداگەرلەرى كەڭەسىنىڭ جەتەكشىلەرى مەن مۇشەلەرى, ەكىنشى دۇنيەجۇزىلىك سوعىس پەن اۋعان سوعىسىنىڭ ارداگەرلەرى, باسقا دا تۇلعالار كەلىپ تاماشالادى.
«مەن تانىمال تۇلعانىڭ شىنايى بەينەسى ورىلگەن دەرەكتى ءفيلمنىڭ اۆتورلارىنا ريزاشىلىعىمدى بىلدىرگىم كەلەدى. اسىرەسە, كەلەشەك وتان قورعاۋشىلار مەن جاس اسكەريلەر ءۇشىن مۇنىڭ پايداسى مەن تاربيەلىك ءمانى ۇشان-تەڭىز. جانە دە كارتينانى ساعادات نۇرماعامبەتوۆتىڭ ءومىرى تۋرالى الداعى تۇسىرىلەتىن فيلمدەر مەن شىعارمالاردىڭ باسى دەپ سانايمىن. ونىڭ ومىرلىك تاجىريبەسى بىزگە قاشاندا ونەگە مەكتەبى بولىپ قالا بەرمەك», – دەدى زاپاستاعى گەنەرال-لەيتەنانت, حالىق قاھارمانى باقىتجان ەرتاەۆ.
«ەگەمەن-اقپارات».