ورتالىق سايلاۋ كوميسسياسىنىڭ كەشەگى وتىرىسىندا «2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنا جانە ءماسليحاتتارى دەپۋتاتتارىنىڭ كەزەكتى سايلاۋىنا حالىقارالىق ۇيىمنىڭ بايقاۋشىلارىن اككرەديتتەۋ تۋرالى» قاۋلى قابىلداندى.
وسك مۇشەسى تاتيانا وحلوپكوۆانىڭ حاباردار ەتۋىنشە, اتالعان قاۋلىعا سايكەس ورتسايلاۋكوم قازاقستان رەسپۋبليكاسى سىرتقى ىستەر مينيسترلىگىنىڭ ۇسىنۋى بويىنشا تاۋەلسىز مەملەكەتتەر دوستاستىعىنان بايقاۋشىلار ميسسياسىنىڭ 12 بايقاۋشىسىن اككرەديتتەيدى. «ءتىزىم قوسا بەرىلىپ وتىر. بۇگىن اككرەديتتەيتىن بايقاۋشىلار قاتارىندا تمد بايقاۋشىلارى ميسسياسىنىڭ جەتەكشىسى سەرگەي لەبەدەۆ جانە ميسسيا شتابىنىڭ باسشىسى ەۆگەني سلوبودا بار», – دەدى كوميسسيا مۇشەسى.
وسى جىلدىڭ 18 اقپانىنداعى جاعداي بويىنشا ورتسايلاۋكوم حالىقارالىق ۇيىمداردىڭ ەكى ميسسياسىنىڭ (ەقىۇ/دياقب جانە تمد) 52 بايقاۋشىسىن اككرەديتتەدى. ال ورتسايلاۋكوم شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋدى 2016 جىلعى 14 ناۋرىزعا دەيىن جۇزەگە اسىرادى.
ءاليسۇلتان قۇلانباي,
«ەگەمەن قازاقستان».