كەشە استانادا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) دەموكراتيالىق ينستيتۋتتار جانە ادام قۇقىقتارى جونىندەگى بيۋروسى (دياقب) قازاقستاندا سايلاۋ وتكىزۋ بارىسىن بايقاۋ ميسسياسىنىڭ باسشىسى بوريس فرلەك ءباسپاسوز ءماسليحاتىن وتكىزدى. جيىندا قازاقستان تاراپىنىڭ شاقىرتۋىمەن كەلگەن ميسسيانىڭ جۇمىسى رەسمي تۇردە باستالعانى جاريا ەتىلدى.
بريفينگ بارىسىندا ەقىۇ دياقب ميسسياسىنىڭ باسشىسى, ەلشى ب.فرلەك الداعى سايلاۋ ناۋقانىندا ميسسيانىڭ نەگىزگى اتقاراتىن ماقسات-مىندەتتەرىنە جانە ونىڭ قۇرامىنا كەڭىنەن توقتالدى. «ميسسيا قۇرامىندا استاناداعى 11 ساراپشىدان تۇراتىن نەگىزگى توپ, سونداي-اق, 23 اقپاننان باستاپ 2 ادامنان تۇراتىن كوماندامەن بارلىق وڭىرلەردە جۇمىس ىستەيتىن 28 بايقاۋشى جۇمىس ىستەيدى. بۇدان بولەك, دياقب ەقىۇ-عا مۇشە ەلدەرگە قىسقا مەرزىمگە 400 بايقاۋشى جىبەرۋ تۋرالى ۇسىنىم جاسايدى. بۇل بايقاۋشىلار سايلاۋ باستالۋىنا بىرنەشە كۇن قالعاندا كەلەدى.
جالپى, ميسسيا سايلاۋدىڭ حالىقارالىق مىندەتتەمەلەرگە, دەموكراتيالىق سايلاۋ ستاندارتتارىنا جانە ۇلتتىق زاڭناماعا سايكەستىگىن باعالاۋدى كوزدەيدى. حالىقارالىق بايقاۋشىلار دەپۋتاتتىقتان ۇمىتكەرلەر مەن ەلەكتوراتتى تىركەۋدى, سايلاۋ كوميسسياسى مەن ءتيىستى مەملەكەتتىك ورگانداردىڭ جۇمىسىن, سايلاۋ تۋرالى زاڭنامانىڭ ورىندالۋىن جانە سايلاۋ وتكىزۋگە قاتىستى داۋلاردى شەشۋدى زەر سالىپ قاداعالايدى. سايلاۋ ناۋقانىن جاريالاۋ جونىندەگى بۇقارالىق اقپارات قۇرالدارىنىڭ جۇمىسىن بايقاۋ دا ميسسيانىڭ مىندەتىنە كىرەدى», – دەدى ب.فرلەك.
سونداي-اق, ول ميسسيا مۇشەلەرى بايقاۋ بارىسى بويىنشا مەملەكەتتىك ورگاندارمەن ساياسي پارتيالاردىڭ وكىلدەرىمەن, ءۇمىتكەرلەرمەن, سونداي-اق, ازاماتتىق قوعام, باق جانە حالىقارالىق بىرلەستىك وكىلدەرىمەن كەزدەسۋلەر وتكىزەتىنىن جەتكىزدى.
سونىمەن قاتار, ب.فرلەك سايلاۋ كۇنى بايقاۋشىلار سايلاۋ ۋچاسكەلەرىنىڭ اشىلۋىن, داۋىس بەرۋ بارىسىن, بيۋللەتەندەردى ەسەپتەۋ جانە سايلاۋ قورىتىندىسىن شىعارۋدى قاداعالايتىنىن ايتا كەلىپ, «حالىق داۋىس بەرەتىن كۇنى ەقىۇ-نىڭ دەموكراتيالىق ينستيتۋتتار جانە ادام قۇقىقتارى بيۋروسى ەقىۇ پارلامەنتتىك اسسامبلەياسىنىڭ دەلەگاتسياسى جانە ەۋروپا كەڭەسىنىڭ پارلامەنتتىك اسسامبلەياسىمەن بىرلەسە جۇمىس ىستەيدى. دياقب ارالىق جانە بايقاۋ ميسسياسى اياقتالعاننان كەيىن شامامەن سەگىز اپتا ىشىندە قورىتىندى بايانداماسىن جاريالايدى», – دەدى. ونىڭ ايتۋىنشا, ەقىۇ دياقب-نىڭ سايلاۋدى بايقاۋ ميسسياسى مەن استاناداعى ەقىۇ وكىلدىگى جەكە جانە ءوز وكىلەتتىكتەرىنە سايكەس ارەكەت ەتەدى.
جولدىباي بازار,
«ەگەمەن قازاقستان».