سايلايتىن دەپۋتاتتاردى سايلاۋ ۇدەرىسى قالاي جۇزەگە اسىرىلادى؟
كەشە ورتالىق سايلاۋ كوميسسياسىنىڭ مۇشەسى تاتيانا وحلوپكوۆا قازاقستان حالقى اسسامبلەياسى سايلايتىن پارلامەنت ءماجىلىسىنىڭ دەپۋتاتتارىن سايلاۋ ءتارتىبى تۋرالى بريفينگ وتكىزدى.
وسك مۇشەسىنىڭ حاباردار ەتكەنىندەي, قازاقستان حالقى اسسامبلەياسى سايلايتىن ءماجىلىس دەپۋتاتتارىن سايلاۋدى ازىرلەۋ مەن وتكىزۋ جونىندەگى نەگىزگى ءىس-شارالاردىڭ كۇنتىزبەلىك جوسپارى ورتسايلاۋكومنىڭ 2016 جىلعى 20 قاڭتارداعى وتىرىسىندا بەكىتىلگەن. اتالعان جوسپارعا سايكەس ءماجىلىس دەپۋتاتتىعىنا كانديداتتاردى ۇسىنۋ 20 اقپاندا باستالىپ, 29 اقپاندا اياقتالادى. ال قازاقستان حالقى اسسامبلەياسى سايلايتىن ءماجىلىس دەپۋتاتتىعىنا كانديداتتارعا قويىلاتىن تالاپتاردىڭ پارتيالىق ءتىزىمدەر بويىنشا سايلاناتىن ءماجىلىس دەپۋتاتتىعىنا كانديداتتارعا قويىلاتىن تالاپتاردان ايىرماشىلىعى جوق. كانديداتتاردى ۇسىنۋ قۇقىعى قازاقستان حالقى اسسامبلەياسىنا سەسسيالار اراسىنداعى كەزەڭدە باسشىلىق ەتەتىن جانە قازىرگى ۋاقىتتا 67 ادامنان تۇراتىن قحا كەڭەسىنە تيەسىلى.
«كانديداتتاردى تىركەۋدى ورتسايلاۋكوم 29 اقپان - 5 ناۋرىز ارالىعىنداعى كەزەڭدە ءجۇرگىزەدى, – دەدى ت.وحلوپكوۆا ءارى قاراي. – اسسامبلەيا سايلايتىن ءماجىلىس دەپۋتاتتىعىنا كانديداتتار سايلاۋ جارناسىن تولەمەيدى جانە سايلاۋ قورىن قۇرمايدى. اسسامبلەيانىڭ جوعارى باسقارۋشى ورگانى – سەسسيانى قازاقستان رەسپۋبليكاسىنىڭ پرەزيدەنتى شاقىرادى. سەسسيانى شاقىرۋ تۋرالى وكىم ونىڭ باستالۋىنا 30 كۇن قالعاندا قابىلدانۋى ءتيىس, ول تۋرالى بۇقارالىق اقپارات قۇرالدارىندا حابارلانادى. سەسسيا جۇمىسىنا قحا مۇشەلەرى جالپى سانىنىڭ كەمىندە ۇشتەن ەكى بولىگى قاتىسقان جاعدايدا سەسسيا زاڭدى دەپ سانالادى. وعان قاتىسقان مۇشەلەردىڭ جارتىسىنان كوبى داۋىس بەرگەن جاعدايدا سەسسيا قابىلداندى دەپ ەسەپتەلەدى. وسى كۇنگە قازاقستان حالقى اسسامبلەياسىنىڭ قۇرامىندا 446 مۇشە بار».
داۋىس بەرۋ ۇدەرىسىنە داۋىس بەرۋگە ارنالعان پۋنكت قحا سەسسياسى وتەتىن عيماراتتا ورنالاسادى جانە سەسسيا جۇمىسى باستالعانعا دەيىن ءبىر ساعات بۇرىن اشىلادى. داۋىس بەرۋگە ارنالعان پۋنكتتە حالىقارالىق جانە قازاقستاندىق بايقاۋشىلار, بۇقارالىق اقپارات قۇرالدارىنىڭ وكىلدەرى, سونداي-اق, قحا سايلايتىن ءماجىلىس دەپۋتاتتىعىنا كانديداتتاردىڭ سەنىم ءبىلدىرىلگەن ادامدارى بولۋعا قۇقىلى. سەسسيادا استانا قالاسىنىڭ قالالىق سايلاۋ كوميسسياسىنىڭ ءتوراعاسى داۋىس بەرۋ ءتارتىبىن تۇسىندىرگەننەن كەيىن اسسامبلەيا مۇشەلەرىن داۋىس بەرۋگە ارنالعان پۋنكتكە شاقىرادى.
«ءار سايلاۋشى جەكە ءوزى داۋىس بەرەدى. داۋىس بەرۋ قۇقىعىن باسقا بىرەۋگە بەرۋگە, باسقا ادامدار ءۇشىن داۋىس بەرۋگە بولمايدى. داۋىس بەرۋگە ارنالعان بيۋللەتەن سايلاۋشىلار ءتىزىمىنىڭ نەگىزىندە سايلاۋشىنىڭ جەكە وزىنە ونىڭ جەكە باسىن كۋالاندىراتىن قۇجاتىن ۇسىنعاندا بەرىلەدى, – دەدى ت.وحلوپكوۆا. – داۋىس بەرۋ جانە داۋىستاردى ساناۋ اياقتالعان سوڭ, قالالىق سايلاۋ كوميسسياسى داۋىس بەرۋ قورىتىندىلارى تۋرالى حاتتاما جاساپ, قول قويادى. داۋىس بەرۋگە قاتىسقان اسسامبلەيا مۇشەلەرىنىڭ 50 پايىزدان استامى داۋىس بەرگەن كانديداتتار سايلانعان دەپ سانالادى. سەسسيا قالالىق سايلاۋ كوميسسياسىنىڭ توراعاسى داۋىس بەرۋ قورىتىندىلارى تۋرالى حاتتامانى جاريالاعاننان كەيىن جابىلادى. قالالىق سايلاۋ كوميسسياسىنىڭ حاتتاماسى ورتسايلاۋكومعا ەكى كۇننەن – 22 ناۋرىزدان كەشىكتىرمەي ۇسىنىلۋى ءتيىس».
وسك مۇشەسىنىڭ ايتۋىنشا, ءماجىلىستىڭ سايلانعان دەپۋتاتتارىن ورتسايلاۋكوم تىركەيدى. كونستيتۋتسياعا جانە ەلىمىزدىڭ زاڭدارىنا سايكەس پارلامەنت دەپۋتاتىنىڭ مارتەبەسىنە سايكەس كەلمەيتىن مىندەتتەرىن دوعارۋ تۋرالى ورتسايلاۋكومعا ۇسىنعان ءوتىنىشى ءماجىلىس دەپۋتاتتارىن تىركەۋ ءۇشىن مىندەتتى شارت بولىپ تابىلادى. «جالپى, ەلىمىز بويىنشا, ءماجىلىس دەپۋتاتتارىن سايلاۋ قورىتىندىلارىن ورتسايلاۋكوم 27 ناۋرىزدان كەشىكتىرمەي بەلگىلەيدى, ال سايلاۋ قورىتىندىلارى تۋرالى حابار باق-تا 2016 جىلعى 30 ناۋرىزدان كەشىكتىرمەي جاريالانادى. بۇقارالىق اقپارات قۇرالدارىندا سايلاۋ قورىتىندىلارى جاريالانعاننان كەيىن ورتسايلاۋكوم پارلامەنت ءماجىلىسىنىڭ سايلانعان ءار دەپۋتاتىنا كۋالىك پەن ومىراۋعا تاعاتىن بەلگى تاپسىرادى», – دەدى ت.وحلوپكوۆا.
ءاليسۇلتان قۇلانباي,
«ەگەمەن قازاقستان».