«دەمەۋ» قورىنىڭ قايتارىمسىز نەسيەلەرىنە قول جەتكىزگەن قارماقشىلىقتار كاسىپتەرىن دوڭگەلەتىپ جاتىر. جالپى, اۋداننان كونكۋرسقا 215 ءوتىنىش تاپسىرىلسا, سونىڭ ىشىندە 40 جوبا قولداۋ تاپقان. ەندى ايماقتا تىگىن تسەحتارى اشىلىپ, ءۇي قۇستارىن كوبەيتۋ قولعا الىنىپ, شاعىن شارۋاشىلىقتار مەن كاسىپ نىساندارى دا اشىلاتىن بولادى.
قارماقشىلىق جادىرا تۇياقباەۆا 2014 جىلدان باستاپ شاعىن تىگىن شەبەرحاناسىن اشىپ, قازىرگى تاڭدا حالىققا قىزمەت كورسەتىپ كەلەدى. نەگىزىنەن كورسەتەتىن قىزمەت ءتۇرلەرى قازاقى ويۋ-ورنەك ارقىلى كورپەشە, جاستىق جاساۋ, قىز بالانىڭ جاساۋى جانە تاعى دا باسقا قولونەر تۇرلەرى. قازىرگى تاڭدا وسى كاسىبىن ءارى قاراي دامىتۋ ماقساتىندا «بايقوڭىر» الەۋمەتتىك كاسىپكەرلىك كورپوراتسياسى ارقىلى «دەمەۋ» گرانتىن «تىگىن شەبەرحاناسىن دامىتۋ» جوباسى بويىنشا ۇتىپ الدى.
اقجار اۋىلىنىڭ تۋماسى جادىرا جۇسىپبەكقىزى ۇلتتىق تاربيە مەن تالىمگە سۋسىنداپ وسكەن جان. ەس بىلگەلى اناسىنىڭ تىگىن ماشيناسىمەن كيىم جوندەپ, كورپەشە قۇراپ جاتاتىنىن كورىپ وسكەن قارشاداي قىز قۋىرشاقتارىنا سايكەسىنشە كويلەكتەر ءپىشىپ, جاستىعى مەن كورپەسىنە قامتىپ قويادى ەكەن. جادىرانىڭ ۇلتتىق قولونەرگە دەگەن قىزىعۋشىلىعى وسىلايشا بالا كەزىنەن باستاۋ العان.
– انامنىڭ تىككەن كيىمدەرىنەن قالعان ماتالاردان ءارتۇرلى پىشىندە قول سومكەلەر تىگىپ الىپ, مەكتەپكە ۇستاپ بارعانىمدا قۇربىلارىم قىزىعا دا قىزعانا قارايتىن. وسە كەلە جاڭا جىل, كۇزگى كەشتەرگە كويلەكتەرiمدى ءوزىم تىگىپ كيەتىن بولدىم. اناما كيىم ساتىپ اپەر دەمەيمىن, ءوز ويىمداعىداي ەتىپ ءوزىم تىگىپ شىعاتىنمىن. ارينە, بىردەن ءبارى كەرەمەت بولعان جوق. سەبەبى, مەنىڭ قولىما ينە مەن ءجىپ بەرىپ ەشكىم كيىم تىك, توقى دەمەدى. انام مۇعالىم بولعانىمدى قالادى. مەكتەپ بىتىرگەننەن كەيىن سارىاعاشتاعى پەداگوگيكالىق كوللەدجدە وقىپ, باستاۋىش سىنىپتىڭ مۇعالىمى ماماندىعىن الدىم. وقۋ ءبىتىرىسىمەن جوسالى كەنتىنىڭ تۋماسى بەكنياز ەسىمدى جىگىتكە تۇرمىسقا شىقتىم. كەلىندىك, انالىق مىندەتتەرىمدى ابىرويمەن اتقارىپ كەلەمىن. اتا-انامداي بولعان اتا-ەنەمنىڭ قولىندا 12 جىل تۇرىپ ءوز ەنشىمىزدى الدىق,– دەيدى يبالى كەلىن.
ەنەسى قۋانتاي دا ىسمەر جان ەكەن. كەلىنىنە اقىل-كەڭەسىن ايتىپ, بىلگەنىن ۇيرەتۋدەن جالىقپايتىن كورىنەدى. جادىرا 3 بالانىڭ اناسى. ۇيدەن تاپسىرىس قابىلداپ تىگىن تىگىپ جۇرگەن قولونەر يەسى بىلتىر ءوز كۇشىمەن كەرەكتى قۇرالدارىن, جاراقتى تىگىن ماشيناسىن ساتىپ الىپ, شاعىن شەبەرحانا اشىپتى. ءوزى تاپسىرىس قابىلدايدى, تىگەدى, ءوزى ساتۋشى.
– ناۋرىز مەرەكەسى جاقىنداعاننان بالاباقشالار مەن مەكتەپ وقۋشىلارىنان ۇلتتىق كيىمدەرگە تاپسىرىس كوپتەپ ءتۇسەدى. بارلىعىن دەر كەزىندە, ساپالى ورىنداۋ مەنىڭ مىندەتىم. سوندىقتان, كۇندىز-ءتۇنى جۇمىس ىستەۋدەمىن. تاپسىرىس بەرۋشىنىڭ ويىنداعىداي ەتىپ تىگۋگە تىرىسىپ باعامىن. بارلىعى دايىن زاتىن الىپ كەتۋگە كەلگەندە قۋانىپ, كوڭىلدەرىنەن شىعىپ, اقىسىن رەنجىمەي بەرىپ كەتەدى. مۇنىڭ ءوزى ماعان كۇش بەرەدى. بارىڭدى باعالاي بىلگەندەرگە, ەڭبەگىڭدى ەسكەرىپ, العىسىن ايتقاندارعا قۋاناسىڭ. مەن دايىن ويۋلاردى پايدالانبايمىن. سەبەبى, ولاردىڭ ساپاسى كوڭىل قۋانتارلىق ەمەس. تەز ءتۇسىپ قالىپ جاتادى. سوندىقتان, بارلىعىن ءوز قولىممەن ويىپ, جاپسىرامىن. ويۋلار دايىنداۋ ۋاقىت الادى, كوپ ويلانۋدى تالاپ ەتەدى. وعان كوبىنە قىزىم ايشارا كومەكتەسەدى. كيىز دە باسا الامىن, شي دە توقيمىن, كيىز ءۇيدىڭ بارلىق كەرەكتى جابدىقتارىن تىگۋگە, جالپى, كىمنەن قانداي تاپسىرىس تۇسەدى – قولدان كەلگەنشە سونىڭ بارلىعىن ورىنداۋعا تىرىسامىن. ىزدەنەمىن. جاس بولا تۇرا بىلمەيمىن, جاساي المايمىن, قولىمنان كەلمەيدى دەپ ايتۋعا ۇيالامىن,– دەيدى كاسىپكەر كەلىنشەك.
ءيا, تىگىن تىگۋ, ۇلتتىق ونەردى دارىپتەي ءبىلۋ ەڭ ءبىرىنشى ەپتىلىكتى, ۇقىپتىلىقتى, شىدامدىلىقتى تالاپ ەتەدى. كوزدىڭ مايىن تاۋىسىپ, جەتى رەت ولشەپ, ءبىر رەت كەسەتىن ماماندىق ءتۇرى تىگىنشىلىكتى وقىماي-اق ۇيرەنىپ, كاسىپ ەتكەن جادىرانىڭ بۇل تىرلىگى جاستارعا ۇلگى. بۇگىندە ول مەملەكەت تاراپىنان قولداۋ تاۋىپ, كاسىبىن كەڭەيتۋدى كوزدەپ وتىر. ساۋساعىنان ونەرى تامعان جاس كاسىپكەردىڭ كاسىبىنە ءناسىپ تىلەيمىز.
ايتا كەتەيىك, «دەمەۋ» گرانتتارى حالىقتىڭ الەۋمەتتىك تۇرعىدان ءالسىز توپتارىنا, كوپبالالى انالارعا, جۇمىسسىزدار مەن مۇگەدەكتەرگە بەرىلىپ وتىر.
نۇربەك داۋرەنبەكوۆ.
قىزىلوردا وبلىسى.