«باتىر بولساڭ جاۋعا نايزاڭ ءتيسىن, باي بولساڭ ەلگە پايداڭ ءتيسىن, ەكەۋىن دە جاساماساڭ جۇرتتان بولەك تىككەن ءۇيىڭ كۇيسىن» دەگەن ەكەن قازاقتىڭ اتاقتى بيلەرىنىڭ ءبىرى ايتەكە.
اۋىرلاۋ ءسوز, قاتال ۇكىم. بىراق, نەگىزسىز ەمەس. جالعىز شاۋىپ باتىر بولمايسىڭ. باتىر – ءبىر وقتىق. ەر قىلاتىن دا, ەز قىلاتىن دا قاسىڭداعى قاراشا, القالاعان جۇرتىڭ. باي بولساڭ ورمانداي ەلىڭنىڭ ارقاسىندا, ءوز ەلىڭ, ءوز جەرىڭدە مالدى بولدىڭ. تىلەۋىڭدى تىلەگەن جۇرتىڭا ارتىق دۇنيەڭنەن بولىسسەڭ العىس الاسىڭ, ءىسىڭ العا جىلجيدى.
«جاڭاارناقۇرىلىس» سەرىكتەستىگىنىڭ ديرەكتورى ماعاۋيا تۇرىسبەكوۆ وسىلاي پايىمدايدى.
ماماندىعى – تاريحشى. توقسانىنشى جىلداردىڭ سوڭىندا ماعاۋيا سەكسەنباي ۇلى ينستيتۋت قابىرعاسىنان تۇلەپ ۇشقاندا داعدارىستىڭ دەندەپ تۇرعان شاعى ەدى. جاس بالاداي اياعىن التەك-تالتەك باسقان جاس مەملەكەت قايدا باعدار ۇستارىن بىلمەي مىقتى مەملەكەتتەرگە جاۋتاڭداپ قاراپ جۇرگەن شاعى. قۇلاعان ءوندىرىستەن مىقتى ينجەنەر كەتتى. اۋرۋحانا مەن مەكتەپتە دە جاعداي قيىن. «بالاپان باسىمەن, تۇرىمتاي تۇسىمەن» كەتىپ جاتقان شاقتا العىر جاس قايراتىنا مىنگەن. جەكە كاسىپكە دەن قويدى. 2000 جىلى «سىرىم» جشس-ءىن اشتى.
ءارتۇرلى مەملەكەتتەردىڭ دامۋ جوسپارىن وي ەلەگىنەن وتكىزىپ, ۇيرەنەتىنىن ۇيرەنىپ, اياعىنان نىق تۇرعان قازاقستانمەن بىرگە سول ەلدىڭ ءبىر كىرپىشى – ماعاۋيا تۇرىسبەكوۆتىڭ دە كاسىبى ورگە ءورلەگەن.
بۇگىندە ول باسقاراتىن «جاڭاارناقۇرىلىس» سەرىكتەستىگىندە 100-دەن استام قىزمەتكەر بار. قۇرىلىس جۇمىستارىن جۇرگىزۋگە تاجىريبەلى مامان, قاجەتتى تەحنيكالارى ساي. مەملەكەتتىك ساتىپ الۋدا كوشەدەگى كولدەنەڭ كوك اتتى ەمەس, بارلىق كەرەك-جاراعى ساي, جەڭىپ العان نىساندى ۋاقىتىندا ءارى ساپالى سالاتىن مەردىگەر جەڭىسكە جەتەدى.
«جاڭاارناقۇرىلىس» جشس بۇل جاعىنان قامشى سالدىرمايدى.
قازاقستان تەك شيكىزاتتىڭ وتانى بولىپ, ودان تۇسكەن تابىستى مالدانباۋى كەرەك. ەلىمىزگە وڭدەۋشى, ءوندىرۋشى مىقتى كاسىپورىندار قاجەت. ەلباسىنىڭ ەرتەدەن ايتىپ كەلە جاتقان سوزىنە ءمان بەرىپ, ويىن ايتقىزباي تۇسىنگەن ماعاۋيا بۇگىندە «وڭتۇستىك» يندۋستريالىق ايماعىنان جەر الىپ, مەديتسينالىق قولعاپ شىعاراتىن كاسىپورىن قۇرىلىسىن باستاپ كەتتى.
اكەسى سەكسەنباي اعا كەزىندە شارۋاشىلىقتاردا باسشىلىق قىزمەتتە بولعان, بۇگىندە ەل كەسىمىنە توقتايتىن كوشەلى كىسى. اناسى – ءۇرزادا جاس ۇرپاققا ءبىلىم ءنارىن سەپكەن ۇستاز. وسىنداي ونەگەلى وتباسىدان شىققان ماعاۋيا ءوزى تۋىپ-وسكەن سوزاق وڭىرىندەگى قايىرىمدىلىق ىسىنەن ءبىر رەت سىرتقارى قالعان ەمەس. قامكوڭىل, تۇرمىسى تومەن وتباسىلارعا ازىق-ت ۇلىك جىبەرىپ تۇرادى.
بۇگىندە «نۇر وتان» پارتياسى سوزاق اۋداندىق فيليالى ورنالاسقان عيماراتتى دا قازاقتىڭ اتپالداي ۇلى ماعاۋيا تۇرىسبەكوۆ پارتيانىڭ كەزەكتەن تىس XVI كونفەرەنتسياسىندا تارتۋ ەتكەن.
بىراق, مۇنداي قايىرىمدىلىق ىستەرىن كوپشىلىككە جاريا ەتۋدى جاراتپايدى. «ءسۇيەر ۇلىڭ بولسا سەن دە ءسۇي, سۇيىنەرگە جارار ول» دەگەن وسى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.