ءبىزدىڭ ماقسات – ءتۇرلى سالالاردا ۇلتتىق مۇددەمىزدى قورعاۋ, مىقتى مەملەكەت قۇرۋ. ول ءۇشىن بارشاعا بەلگىلى, مىقتى ەكونوميكاعا سۇيەنۋ قاجەت. قازىرگى گەوساياسي كۇردەلى احۋالدا جاۋاپتى ءارى تىڭ شەشىمدەردى قابىلداۋ قاجەتتىگى تۋىنداپ وتىر. وسىنداي ۇسىنىستىڭ بولارىن سەزدىك ءارى دايىن بولدىق. سەبەبى, قازىرگى جاعدايلار وسىنداي شەشىمدەرگە ۇندەيدى.
وسىلاي دەدى «اق جول» دەموكراتيالىق پارتياسىنىڭ توراعاسى ازات پەرۋاشەۆ. ونىڭ ايتۋىنا قاراعاندا, الداعى ءماجىلىس پەن ءماسليحاتتار سايلاۋىنا پارتيا تاراپىنان قىزۋ دايىندىقتار ءجۇرىپ جاتىر. وسىنىڭ الدىنداعى سايلاۋ ناۋقانىندا 10 باعىتتان تۇراتىن سايلاۋالدى تۇجىرىمدامامىزدى ۇسىنعان بولاتىنبىز. سول سياقتى, وسى سايلاۋدا دا بىرنەشە باعىتتار بويىنشا جۇمىس ىستەيمىز, دەي وتىرىپ ولاردىڭ قاتارىندا تاۋەلسىزدىك جانە ۇلتتىق مۇددە, نارىقتىق ەكونوميكاعا باعىتتالعان جەكەشەلەندىرۋدى قولداۋ, جەمقورلىققا قارسى كۇرەس, شەتەلدىك بانكتەرگە شىعارىلعان قاراجاتتاردى ەلگە قايتارۋ, دەموكراتيالىق ينستيتۋتتاردى دامىتۋ سەكىلدى ۇستانىمداردىڭ بار ەكەندىگىن ايتتى. جالپى العاندا, كەز كەلگەن پارتيا سايلاۋعا دايىن بولۋى قاجەت. جانە دە سايلاۋعا قاتىسۋ ءار ساياسي پارتيانىڭ نەگىزگى مىندەتتەرىنىڭ ءبىرى, دەدى ا.پەرۋاشەۆ.
سونداي-اق, ول اسكەري كۇشتەردىڭ سوعىسقا قاتىساتىندىعى نەمەسە سوعىسقا دايىندالاتىنى سەكىلدى, پارتيالار دا سايلاۋعا دايىندالاتىنىن جانە وعان قاتىساتىندىعىن مىسالعا الدى. سايلاۋعا دايىندىق جۇمىستارىنىڭ بارىسىنا كەڭىرەك توقتالعان پارتيا توراعاسى, بۇگىنگى كۇنى پارتيانىڭ ورتالىق اپپاراتى مەن وبلىستارداعى فيليالدارى شتاب قۇرىپ, وندا باسشىلار تاعايىندالىپ, قىزۋ جۇمىس جاسالىنىپ جاتقاندىعىنا توقتالدى.
پارتيانىڭ سايلاۋعا قاتىسۋى جونىندە شەشىم قابىلداۋ قاجەت. ونى ەلىمىزدىڭ زاڭىنا سايكەس باسقارۋشى ورگان رەتىندە پارتيا سەزى شەشەدى. بۇل رەتتە سەزدىڭ 3 اقپاندا وتەتىندىگىن مالىمدەگەن پارتيا توراعاسى حالىق قالاۋلىلارىنا دەگەن جۇرتشىلىقتىڭ سەنىمى ۇلكەن ماڭىزعا يە ەكەندىگىن اتاپ ايتتى. سول سەبەپتى, الداعى سايلاۋعا ءبىزدىڭ پارتيا جوعارى دايىندىقپەن بارا جاتىر. بۇل رەتتە جۇمىسىمىزدى بەلسەندى تۇردە اتقارۋدامىز. وسى ۋاقىتتاردا جەرگىلىكتى جەرلەردە, وبلىستىق جانە قالالىق ايماقتاردا كونفەرەنتسيالار وتكىزۋىمىز قاجەت. قازىرگى ۋاقىتتا پارتيا اتىنان سايلاۋعا تۇسەتىن ۇمىتكەرلەردىڭ ءتىزىمىن بەكىتۋ جۇمىستارى جۇرگىزىلۋدە. ۇمىتكەرلەرىمىزدىڭ ءتىزىمى انىق بولعاننان كەيىن, سەنىمدى وكىلدەردى بەكىتۋگە كوشەمىز, دەدى ا.پەرۋاشەۆ.
ەلميرا ماتىباەۆا,
«ەگەمەن قازاقستان».