«بىرلىك» پارتياسى ءۇشىن – ءبىرىنشى سايلاۋ

كەشە استانا قالاسىنداعى «قازمەديا» ورتالىعىندا «بىرلىك» ساياسي پارتياسىنىڭ توراعاسى سەرىك سۇلتانعالي الداعى پارلامەنت سايلاۋىنا بايلانىستى باق وكىلدەرىنە سۇحبات بەردى. ول ەلباسىنىڭ پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن وتكىزۋ تۋرالى جارلىعىن قولدايتىنىن ايتىپ, اتالعان ساياسي ناۋقانعا پارتيا مۇشەلەرىنىڭ ۇمىتكەر رەتىندە قاتىساتىنىن جەتكىزدى. «ەلباسىنىڭ بۇل جارلىعىن «بىرلىك» پارتياسى تولىق قولدايدى. مۇنداي شەشىم تاكتيكالىق تۇرعىدا وتە دۇرىس. سەبەبى, ءماجىلىستىڭ بەسىنشى شاقىرىلىمى وزىنە جۇكتەلگەن مىندەتتى تولىعىمەن ورىندادى. جولداۋدا ايتىلعان باعدارلامالاردىڭ زاڭدىق نەگىزىن قالاپ, از ۋاقىتتا اۋقىمدى جۇمىس جاسادى. الايدا, قازىر الەم تاپ بولىپ وتىرعان قيىندىق, ەكونوميكالىق داعدارىستار جاڭا كۇشتى, جاڭا قارقىندى, جاڭا ەكپىندى قاجەت ەتەدى. سوندىقتان, سايلاۋ وتكىزىپ, پارلامەنت قۇرامىنا قاجىر-قايراتى مول, ىسكەر, تىڭ يدەيالارى بار ازاماتتاردىڭ كەلۋىنە مۇمكىندىك بەرۋ – ەڭ ۇتىمدى شەشىم. بۇل رەتتە ءبىزدىڭ پارتيا ءۇشىن دە بۇل سايلاۋ ۇلكەن مارتەبە ەكەنىن ايتقىم كەلەدى. سەبەبى, قۇرىلعانىنا تولىق ەكى جىل بولعان پارتيامىز العاش رەت سايلاۋعا قاتىسىپ, ءوز باعىن سىناپ كورەدى», – دەدى س.سۇلتانعالي. سونىمەن قاتار, ول «بىرلىك» پارتياسىنىڭ مۇمكىندىگىنە توقتالىپ ءوتتى. ەكى جىلدىڭ ىشىندە بىرقاتار يگى ىستەرگە مۇرىندىق بولعان پارتيا ءۇشىن قازىر ءوز كۇش-قۋاتىن باعامدايتىن شاق تۋعانىن ايتقان س.سۇلتانعالي: «ازىرگە قازاقستاندىقتار ءۇشىن اسا تانىلا قويعان جوقپىز. سوعان قاراماستان, ەكى جىلدا ءوز دەڭگەيىمىزدە ايتارلىقتاي جۇمىس جاسادىق. سايلاۋدا زاڭ جۇزىندەگى ەڭ از داۋىس ۇلەسىمىزدى الساق تا قاناعاتتانامىز. سوندىقتان, الداعى سايلاۋ «بىرلىك» پارتياسى ءۇشىن ۇلكەن ەمتيحان بولماق», – دەدى. سونداي-اق, توراعا اقپان ايىندا پارتيانىڭ سەزى وتەتىنىن مالىمدەدى. «سايلاۋعا بايلانىستى اقپاندا سەزد وتكىزەمىز. سول جەردە دەپۋتاتتىققا ۇمىتكەرلەر ءتىزىمى جاسالىپ, باعدارلامامىز دايىندالادى. ۇگىت-ناسيحات كەزىندە قازاقستاندى ارالاپ, ستراتەگيامىزدى, جوسپارىمىزدى حالىققا جەتكىزەمىز. وسى جۇمىستاردان كەيىن پارتيا مۇشەلەرىنىڭ سانى ارتادى دەپ ۇمىتتەنەمىن. نەگىزىنەن اۋىل ءومىرىن جاقسارتۋعا باعىتتالعان ۇستانىمىمىز حالىق تاراپىنان قولداۋ تابارىنا سەنەمىن», – دەدى پارتيا توراعاسى. ايتا كەتەيىك, قازىرگى تاڭدا «بىرلىك» پارتياسىنىڭ 53 مىڭ مۇشەسى بار. ەلامان قوڭىر, «ەگەمەن قازاقستان».