استانا. 19 قاڭتار. رەسەي سۋرەتشىلەرى ۆيكتوريا جانە ۆلاديمير كيريلەنكولار سوچيدە «فۋتبول جانە ماڭگىلىك» اتتى ءمۇسىن جاساپ شىقتى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
ۇلكەن فۋتبول دوبىن ۇستاپ تۇرعان مايمىلدىڭ ءمۇسىنى وسى جىلدىڭ سيمۆولدىق بەينەسى بولىپ تابىلادى ءارى رەسەيدە 2018 جىلى وتەتىن الەم چەمپيوناتىنا ارنالعان. ول «فۋتبول جانە ماڭگىلىك» اتتى حالىقارالىق جوبانىڭ جالعاسى رەتىندە جاسالعان. سۋرەتشىلەردىڭ پىكىرىنشە, ءمۇسىن الەم بىرىنشىلىگىندە رەسەي قۇراماسىنا ساتتىلىك الىپ كەلۋگە ءتيىس.
اتالعان حالىقارالىق جوبانىڭ تانىستىرىلىمى كالينينگراد, ەكاتەرينبۋرگ, براتسك, دونداعى روستوۆ, ارحانگەلسك, تومەنگى نوۆگورود, ماسكەۋ جانە سوچي قالالارىندا ءوتتى. الەمدىك فۋتبول دوداسى باستالعانعا دەيىن ارالاس تەحنيكانىڭ كومەگىمەن دايىندالعان وتىزدان استام كوركەم سۋرەت تۋىندىلارىن رەسەي قالالارى مەن شەتەلدەردەن كورۋگە بولادى.
ايتا كەتەيىك, رەسەيدە 2018 جىلى بولاتىن الەم چەمپيوناتى 14 ماۋسىم مەن 15 شىلدە ارالىعىندا 12 ستاديوندا وتەدى. الامان ويىندارى ماسكەۋ, سانكت-پەتەربۋرگ, ەكاتەرينبۋرگ, سارانسك, قازان, تومەنگى نوۆگورود, كالينينگراد, ۆولگوگراد, سامار, سوچي جانە دونداعى روستوۆ قالالارىندا وينالادى.
ايان ءابدۋالي.
دەرەك, سۋرەت: تاسس.