تودد لەۆي كەتىپ, ونى تيم ميللەر الماستىرادى
بۇل كۇندەرى “تەڭىزشەۆرويل” (تشو) جشس كومپانياسىنىڭ باسشىلىق قۇرامىندا وزگەرىستەر جۇرۋدە. الداعى قازان ايىنان باستاپ اتالمىش كومپانيانىڭ باس ديرەكتورى تودد لەۆي مىرزانىڭ جاۋاپكەرشىلىگىن تيم ميللەر مىرزا جالعاستىراتىن بولادى.
الدىمەن وسى ۋاقىتقا دەيىن تشو-نى باسقارىپ كەلگەن تودد لەۆي مىرزا ەلىمىزدەگى ەڭ بيىك ماراپاتتىڭ ءبىرى “دوستىق” وردەنىن العان ساۋساقپەن سانارلىق شەتەلدىك مامان ەكەندىگىن ەسكە سالا كەتەلىك. ول اتىراۋ وڭىرىندە وسى لاۋازىمدى قىزمەتتى اتقارا ءجۇرىپ, ايماقتىڭ الەۋمەتتىك تۇرعىدان تۇلەۋىنە حال-قادىرىنشە ەڭبەك سىڭىرگەن ادام. ءتورت جىلدان استام قازاق جەرىندە جۇمىس ىستەگەن تودد لەۆي ەندى سان-رامانداعى (كاليفورنيا) “شەۆرون” كورپوراتسياسىنىڭ توراعاسى ورىنباسارىنىڭ قاراماعىنداعى بارلاۋ جانە ءوندىرۋ جونىندەگى ۆيتسە-پرەزيدەنتى بولىپ تاعايىندالعان.
“تەڭىزشەۆرويل” جشس “قازمۇنايگاز” قورجىنىنداعى نەگىزگى قارجىنىڭ باستى اكتيۆى بولىپ تابىلادى. ءبىز توددتىڭ باسشىلىق جۇمىسىنا ريزامىز. ءتيمنىڭ دە باسشىلىق قىزمەتى مەن بىرلەسكەن ارەكەتىمىزدىڭ تابىستى بولۋىن كۇتەمىز”, دەيدى “قازمۇنايگاز ۇك” اق-تىڭ باسقارما توراعاسى قايىرگەلدى قابىلدين.
وزىنە قۇت بولعان قازاق جەرىمەن قوشتاسىپ بارا جاتقان تودد لەۆي قازاقستاندىق باق وكىلدەرىمەن سوڭعى رەت كەزدەسىپ, جىل بارىسىندا اتقارىلعان تىرلىكتەردى دايەكتەدى.
قورشاعان ورتانى قورعاۋ, كادرلاردى جەتىلدىرۋ مەن ءوندىرىستى ۇدايى دامىتۋ سياقتى ءوندىرىستىڭ بارلىق ساتىسىنا تالداۋ جاساپ, جۋرناليستەردىڭ تشو قىزمەتىنە قاتىستى ساۋالدارىنا جاۋاپ بەردى.
تودد مىرزانىڭ مالىمدەۋىنشە, بيىل تشو قاۋىپسىزدىك تەحنيكاسى بويىنشا جاڭا رەكوردتىق كورسەتكىشكە قول جەتكىزىپ, وقيعاسىز جۇمىس كۇندەرىنىڭ سانى 28 ميلليون ادام-ساعاتىنا جەتكەن. وسى ارالىقتا ىلەسپە گازدى الاۋدا جاعۋ مەن وندىرىلگەن ءبىر توننا مۇنايعا شاققانداعى قالدىقتار كولەمى 2006 جىلمەن سالىستىرعاندا 50 پايىزعا قىسقارعان. تشو-دا جۇمىس ىستەپ جاتقان قازاقستاندىق ورتا جانە جوعارى بۋىنداعى باسشىلار سانى 77 پايىزعا, جالپى قازاقستاندىق ماماندار سانى 84 پايىزعا ۇلعايعان.
ال اتىراۋ وبلىسىنىڭ اكىمى بەرگەي رىسقاليەۆ تودد لەۆيگە وڭ بولسىن تىلەي وتىرىپ, وتىز جىلعا جۋىق “شەۆرون” كورپوراتسياسىندا جاۋاپتى قىزمەتتەر اتقارىپ كەلگەن تيم ميللەردىڭ دە تۇرعىنداردى الەۋمەتتىك جاعىنان قولداۋ جانە جەرگىلىكتى بيلىك ورگاندارىمەن ىنتىماقتى جۇمىستاردى جالعاستىراتىنىنا سەنىم ءبىلدىرىپ وتىر.
ايناش ەسالي.
الماتى.