الماتى قالاسىنداعى بوستاندىق اۋدانى اۋماعىندا ويىن اۆتوماتتارى زالدارىنىڭ زاڭسىز جۇمىس ىستەپ تۇرعاندىعى جاقىندا وتكىزىلگەن تەكسەرىس كەزىندە انىقتالدى. ويىن بيزنەسى تۋرالى زاڭنامانى قولدانۋعا قاتىستى تەكسەرىس جۇرگىزگەنگە دەيىن بوستاندىق اۋدانىندا شامامەن قىرىق ويىن مەكەمەسى زاڭسىز جۇمىس ىستەگەن. اتاپ ايتارلىعى, كەزەكتى تەكسەرىس ناتيجەسىندە ويىن زالدارىنىڭ كۇندەلىكتى كىرىسىنىڭ – 100 مىڭ تەڭگەنى قۇرايتىنى, ال كەيبىر كەزدە بۇل سومادان دا ارتىق بولعانى انىقتالدى. سونىمەن قاتار ولار سالىق ورىندارىنا تىركەلمەگەن, سايكەسىنشە ەشقانداي سالىق تا ءتولەمەگەن. وسىعان قاراماستان, بوستاندىق اۋداندىق سالىق باسقارماسى ءوز بەتىنشە تەكسەرىس جاساماي, ەقسجكد-گە جانە پروكۋراتۋراعا اقپاراتتىق حابارلار جىبەرۋمەن عانا شەكتەلگەن.
بوستاندىق اۋدانىنىڭ پروكۋرورى عاني سەيسەنبيەۆتىڭ ايتۋىنشا, بۇگىندە جوعارىدا اتاپ كورسەتىلگەن زاڭ بۇزۋشىلىقتار ءۇشىن 13 ادام جاۋاپكەرشىلىككە تارتىلىپ, 300-دەن استام ويىن جابدىقتارى تاركىلەنگەن. بوستاندىق اۋداندىق پروكۋراتۋراسىنىڭ الماتى قالالىق ءىىد-ءنىڭ ۇيىمداسقان قىلمىسقا قارسى كۇرەس بولىمىمەن بىرلەسىپ, “الفا” بيليارد كلۋبىنداعى تەكسەرىسى جانە وزگە دە ءىس-شارالارى ءوز ناتيجەسىن بەرۋدە.
سالا ماماندارى ويىن زالدارىنىڭ يەلەرى ورتكە قارسى قاراپايىم ساقتاندىرۋ ەرەجەلەرىن دە قولدانبايتىندىعىن ايتادى. قىنجىلارلىعى, جالعا الىنعان ءبولمەلەر ەلەكتروندى جابدىققا تولتىرىلىپ, ەلەكتر قۋاتىن پايدالانعان كەزدە قاۋىپسىزدىك تەحنيكاسى دا ساقتالمايدى. سونىمەن قاتار ويىن بيزنەسىندە قولدانىلاتىن جابدىقتاردىڭ سانيتارلىق تالاپتارعا جاۋاپ بەرەتىنىنە جانە ادام دەنساۋلىعىنا قاۋىپسىز ەكەندىگىنە كەپىلدىك جوق.
ويىن زالدارىنىڭ ادەتتە قالاداعى كوپ قاباتتى ۇيلەردىڭ ءبىرىنشى قاباتىندا ورنالاساتىنى بەلگىلى. كەزدەيسوق ءورت تۇتانسا ونىڭ كوپشىلىككە ۇلكەن قاتەر ءتوندىرىپ, قايعىلى جاعدايعا ۇشىراتاتىندىعى ايتپاسا دا تۇسىنىكتى. ويىن جابدىقتارى قازاقستانعا ەشقانداي قۇجاتسىز جانە ساپا سەرتيفيكاتىنسىز اكەلىنگەن. زاڭسىز ويىن بيزنەسىمەن كۇرەس ءىس-شارالارى جالعاسۋدا, كەلەشەكتە بۇل باعىتتاعى زاڭ بۇزۋشىلىقپەن كۇرەستە تۇراقتى جۇمىس ىستەيتىن توپتار دا قۇرىلماق.
باقىت بالعارينا. الماتى.