“كەنتاۋ-ترانسفورماتور زاۋىتى” — قازاقستاندا وسى سالاعا ماماندانعان, ەلەكتروتەحنيكالىق قوندىرعىلاردى دايىندايتىن ۇلكەن ءوندىرىس ورنى. ەلىمىزدى قويىپ, كورشى مەملەكەتتەر دە تۇتىنىپ وتىرعان ترانسفورماتورلار وسىندا جينالادى.
بىلتىر زاۋىت وتە جاقسى جەتىستىككە جەتتى. سوڭعى ۇلگىدەگى تەحنولوگيالىق جابدىقتارمەن جابدىقتالعان, قۋاتى وراسان 35-110 كۆ. ترانسفورماتورىن شىعارا باستادى.
– بۇل يننوۆاتسيالىق جوبالاردىڭ جوسپارمەن ىسكە اسۋى, – دەيدى زاۋىتتىڭ اتقارۋشى ديرەكتورى ءانۋار ايتەن مىرزا. – زاۋىت ءوزىنىڭ وندىرىستىك قۋاتىن ۇنەمى مودەرنيزاتسيالاۋ ۇستىندە. ترانسفورماتور قوندىرعىلارى ءوندىرىسى ەلەكتروتەحنيكا رىنوگىندا باسەكەگە قابىلەتتىلىگىمەن ەرەكشەلەنەدى.
قازىر ىشكى جانە سىرتقى ساۋدادا تۇتىنۋشى ءۇشىن تارتىس ءجۇرىپ جاتىر. بۇرىنعى جەتىستىكتەردى مالدانىپ وتىرا بەرۋگە بولمايدى. رىنوكتا جەڭىسكە جەتۋ ءۇشىن جاڭا تەحنولوگيالاردى جانە مىقتى ونىمدەردى دايىنداۋدى يگەرىپ, ۇنەمى جەتىلدىرىپ وتىرۋ كەرەك.
ءانۋار ساتتارحان ۇلىنىڭ ايتىپ وتىرعانى راس. قازاقستاندا بىزدەن باسقا ەشكىم بۇل سالانى يگەرە المايدى دەپ جايباراقات وتىرساڭ, كورشىلەر اۋىزىڭداعىنى جىرىپ كەتەدى. كەنتاۋ قالاسىنا ارنايى ساپارمەن بارعاندا قازاقستاننىڭ ءىرى ءوندىرىس وشاقتارىنىڭ بىرەگەيى-زاۋىتقا سوقتىق. قۋاتتىلىعى 25000 كۆت-عا دەيىن جەتەتىن 35-110 كۆ. ترانسفورماتورىن شىعاراتىن جاڭا جەلىنىڭ جۇمىسىمەن تانىستىق. ءبىر شاعىن قالانى جارىقپەن قامتۋعا كۇشى جەتەتىن وسى الىپ ترانسفورماتورلاردى جوسپارلاۋدى وسىنداعى كونسترۋكتورلار ءبولىمى جۇزەگە اسىرىپتى. سىناق ويداعىداي وتكەن. باسەكەگە ابدەن جارايدى.
كەنتاۋ زاۋىتىندا جاسالعان الىپ ترانسفورماتورلار العاشقى يەلەرىن تاپقان. تردنس 25000/35-6,3 ماركالى ترانسفورماتوردى اتىراۋ مۇناي وڭدەۋ زاۋىتى, تردنس -25000/35/10 ماركالى ترانسفورماتوردى “سوكولوۆ-سارىباي كەن بايىتۋ كومبيناتى العان. تاجىكستان مەملەكەتىنەن دە تاپسىرىس تۇسكەن. تمد ەلدەرىنەن دە سۇرانىس بار.
بۇگىندە زاۋىت ءوز كۇشىندە. تەك ەنەرگەتيكالىق قانا ەمەس, باسقا دا تاپسىرىستاردى ورىنداۋعا مۇمكىندىگى جەتەدى. بۇعان ءوندىرىس ورنىنداعى قوندىرعىلاردىڭ ەۋروپالىق وزىق ۇلگىلەرمەن جابدىقتالعانى قۋاتىن ەسەلەپ وتىر. جاڭا يننوۆاتسيالىق تەحنولوگيالاردىڭ وندىرىسكە ەنۋى ءونىمنىڭ سەنىمدىلىگىمەن قاتار باعاسىن رەتتەۋگە دە سەپتەسكەنى بايقالادى.
زاۋىتتىڭ اتقارۋشى ديرەكتورى ءانۋار ساتتارحان ۇلى ەلەكترتەحنيكالىق سەكتوردى قايتا جاراقتاندىرۋ ىسىندە ەلباسىنىڭ ءوزى قاداعالاپ وتىرعان “جول كارتاسى” باعدارلاماسىنىڭ ايرىقشا كومەكتەسكەنىن ايتادى. زاۋىتقا تاپسىرىس كوپ تۇسكەن. ءوندىرىس ورنى دايىنداعان ەلەكترجابدىقتاردى تۇتىنۋ مەن تاسىمالداۋعا كوپتەگەن كاسىپورىندار كەلىسىم-شارتتار تۇزگەن. “يۋجنايا”, “زاپادنايا” جانە “اتد” قىزىلوردا ەلەكتر جەلىسى ترانسفورماتورلارعا تاپسىرىس بەرسە, شاردارا سۋ قويماسىنان سۋ سورعى ارقىلى ماقتاارالدىڭ سۋارمالى جەرىنە سۋ شىعارۋعا جابدىقتار الىنعان.
زاۋىت باسشىلىعى ليزينگ ارقىلى جاڭا تەحنولوگيالار الۋ ءۇشىن 2 ملرد. 700 ملن. تەڭگە نەسيە العان ەكەن. ونىمدەرگە سۇرانىس بولعاندىقتان نەسيەنى ۋاقتىلى تولەپ كەلەدى.
زاۋىتتىڭ الەۋمەتتىك ماسەلەلەر جانە پەرسونال جونىندەگى ديرەكتورى سەرىك ايتورەەۆپەن ءوندىرىس ورنىن ارالعانبىز. ترانسفورماتورلاردى قۇراستىرىپ وتىرعان قازاق جاستارىن كورىپ كوز قۋانادى. ونىمىزدى سەرىك قۇرداس تا بايقاعان.
– “مال الاسى سىرتىندا, ادام الاسى ىشىندە” دەگەن بار عوي. وسى كەنتاۋ زاۋىتى وڭتايسىز جەكەشەلەندىرۋدە قۇلاعاندا قالانى تاستاپ جايلى جەر ىزدەپ بارا جاتقان كەلىمسەكتەر: “قازاقتار, سەندەرگە ترانسفورماتور قۇراستىرۋ قايدا؟ قولدارىڭنان كەلمەيدى. سەندەر تەك مال باعا الاسىڭدار عوي”, دەپ كەكەتىپ كەتىپتى. سول ءسوز جۇرەككە ينەدەي قادالاتىن ەدى. قازىر قازاق جۇمىسشىسى قالىپتاستى. جاستار كەلىپ جاتىر. قولدارىنان ءبارى كەلەدى, – دەيدى سۇيسىنىسپەن.
جاستار مىقتى. ولاردى مىقتى قىلىپ جۇرگەن زاۋىت باسشىلىعىنا راحمەت ايتۋعا بولار. وسى سەرىكتەر جىلدا الماتى ەنەرگەتيكا ينستيتۋتىنان باستاپ وبلىستاعى م.اۋەزوۆ اتىنداعى وقمۋ, ياساۋي اتىنداعى حقتۋ-دى ارالاپ, جاس كادرلاردى زاۋىتقا شاقىرادى. وسى ىرگەلى ءۇش وقۋ ورنىنان جىلىنا 60-قا جۋىق جاس كادر كەلەدى ەكەن. ونىڭ سىرتىندا وقو جانە قىزىلوردا وبلىستارىن دا ارالاپ, وسى سەرىكتەر كوللەدج, تەحنيكۋمعا تالاپكەرلەر جينايدى. زاۋىتتىڭ جايىن ءتۇسىندىرەدى.
سول ءبىلىمدى جاستاردىڭ الدى باس كونسترۋكتوردىڭ ورىنباسارى قىزمەتىنە دەيىن جەتتى. تەحنيكۋمدى بىتىرگەن سوڭ جۇمىسشى بولا ءجۇرىپ ينستيتۋت تامامداعان جاڭاقورعاندىق ومار اسانوۆ – بۇگىندە زاۋىتتىڭ تەحنيكالىق ديرەكتورى. بىلدەي باستىق. جامبىلدىق ماقسات تەلىباەۆ – باس كونسترۋكتوردىڭ ورىنباسارى. ونىڭ جاڭالىقتارى, ىزدەنىستەرى زاۋىت ونىمدىلىگىن, ساپاسىن كوتەرۋدە تابىس اكەلىپ ءجۇر.
ايجان جاڭابايقىزى – ءبولىم باستىعى. وسىندا يۋگاي دەگەن كونسترۋكتور 40 جىل تابان اۋدارماي جۇمىس جاساعان ەكەن. زاينەتكە شىعاردا توم ينستيتۋتىن بىتىرگەن بالاسىن جەتەلەپ اكەلىپتى. سول وندىردەي جىگىت بۇگىندە باس تەحنولوگ.
ءبىلىمدى جاستار وسىلاي ءوسىپ جاتىر. “كەنتاۋ ترانسفورماتور زاۋىتى” اق ديرەكتورلار كەڭەسىنىڭ توراعاسى سەيدۋللا قوجابەكوۆ ءبىر كەزدەگى ازىپ-توزعان كەنتاۋدان كەلىمسەكتەر تىراعايلاپ قاشا باستاعاندا ەرتەڭگى كۇندەرگە كەرەك بولار دەپ ءبىرشاما پاتەرلەر ساتىپ العان ەكەن. قارجى ارتىلعان كەزدە تاعى دا الىپ وتىرعان.
كورەگەن باسشىنىڭ زامان جاقسارادى, مۇنىڭ ءبارى كەرەك بولادى دەگەن ءۇمىتى الداماعان. بۇگىندە سول پاتەرلەر ەشقانداي پايىزسىز, نارىقتان تومەن باعاعا جاستارعا بەرىلىپ جاتىر. جالاقىدان تولەيدى. ءبىرازى جالاقىسىنان تولەپ, تولىق مەنشىگىنە العان. سوڭعى 3-4 جىلدا جەتپىسكە جۋىق جاس ماماندار وسىلايشا ءۇيلى بولدى. جاس مامان ءۇشىن پاتەردىڭ ءجونى بولەك.
كەنتاۋ ترانسفورماتور زاۋىتىنىڭ كەلەشەگى كەمەل. وعان كولدەنەڭ كوك اتتى ەمەس, وسى جۇمىستى جانىنداي سۇيەتىن, جاڭا تەحنولوگياعا يكەمدى, ءبىلىمدى جاستار كەرەك. سوندىقتان ولار قارجىلارىنىڭ ءبىر بولىگىن جوعارى وقۋ ورىندارىنا, مەكتەپ كەرەگىنە جۇمسايدى. زاۋىت جايلى كورنەكىلىكتەر اپەرەدى, ءدارىس وقۋدى دا ۇمىتپايدى.
بىلىكتى كادر – ءوندىرىستىڭ ءجۇرەگى. ال كەنتاۋ ترانسفورماتور زاۋىتىنىڭ باسشىلارى وزدەرىنە كەزەكتى كادرلاردى مەكتەپ قابىرعاسىنان باستاپ دايىنداپ جاتىر. ءبىزدى زاۋىت جەتىستىكتەرىمەن قاتار, كادرعا دەگەن قۇرمەتىنىڭ قاتتى سۇيسىنتكەنى دە سول.
باقتيار تايجان, وڭتۇستىك قازاقستان وبلىسى, كەنتاۋ قالاسى.
سۋرەتتى تۇسىرگەن اۆتور.