كەشە ۇكىمەت ۇيىندە پرەمەر-مينيستر كارىم ءماسىموۆ ەلىمىزگە رەسمي ساپارمەن كەلگەن يوردانيا حاشەميتتىك كورولدىگىنىڭ پرەمەر-ءمينيسترى سامير زايد ءال-ريفايمەن كەزدەسىپ, كەلىسسوزدەر جۇرگىزىلدى. كەزدەسۋدەن كەيىن تاراپتار باق وكىلدەرىمەن بريفينگ وتكىزدى.
– ەلىمىز ءۇشىن يوردانيا اراب ايماعىنداعى ماڭىزدى ستراتەگيالىق ارىپتەس سانالادى, سامير زايد ءال-ريفايدىڭ بۇل ساپارى قازاقستان مەن يوردانيا اراسىنداعى ىنتىماقتاستىقتى ودان ءارى دامىتۋعا سەرپىن بەرەتىنىنە سەنىمىم كامىل, – دەگەن ۇكىمەت باسشىسى كارىم ءماسىموۆ كەلىسسوزدەر بارىسىندا ەكى جاقتى ىنتىماقتاستىق ماسەلەلەرى, ونىڭ ىشىندە ساۋدا, ەكونوميكا, يندۋستريا, اۋىل شارۋاشىلىعى, عىلىم, ءبىلىم, مادەنيەت, تۋريزم, فارماتسەۆتيكا جانە ينۆەستيتسيا سالالارىنداعى ىنتىماقتاستىقتى دامىتۋ ماسەلەلەرى تالقىلانعانىن دا نازاردان تىس قالدىرمادى. – كەزدەسۋدە ەلباسى نۇرسۇلتان نازارباەۆ پەن يوردانيا كورولى ابدۋللا بەن حۋسەين ءىى اراسىندا قول جەتكىزىلگەن ۋاعدالاستىقتاردى ىسكە اسىرۋ ماقساتىنداعى جۇمىس باعىتتارى تالقىلاندى. سونداي-اق حالىقارالىق جانە ايماقتىق ماسەلەلەر بويىنشا دا پىكىر الماستىق, – دەدى ول. قازاقستان مەن يوردانيا اراسىنداعى ارىپتەستىكتىڭ ماڭىزدىلىعىنا ەرەكشە توقتالعان ۇكىمەت باسشىسى ونىڭ دامۋ دەڭگەيىنە دە ءوز ريزاشىلىعىن ءبىلدىردى.
– قازاقستان مەن يوردانيا ءوزارا ساۋدا-ساتتىق كولەمىن ۇلعايتىپ, ءوزارا ينۆەستيتسيالار تارتۋ تۇرعىسىندا ورتاق شەشىمگە كەلدى. ەكونوميكا سالاسىنداعى ىنتىماقتاستىقتى ءارى قاراي دامىتۋ ءۇشىن ەكى ەل كاسىپكەرلەرى اراسىندا ءجيى كەزدەسۋلەر وتكەنى ابزال دەپ ويلايمىن. بۇل ەكى ەل كاسىپكەرلەرىنە ينۆەستيتسيالىق مۇمكىندىكتەرمەن تانىسۋعا كەڭ جول اشادى, – دەگەن يوردانيا حاشەميتتىك كورولدىگىنىڭ پرەمەر-ءمينيسترى سامير زايد ءال-ريفاي ەكى مەملەكەت باسشىلارى اراسىندا قالىپتاسقان ايرىقشا قارىم-قاتىناستىڭ وسى ەلدەر ءوزارا بايلانىستارىنىڭ جوعارى دەڭگەيگە جەتۋىنە ىقپال ەتكەنىن اتاپ كورسەتىپ, بولاشاقتا دا ىنتىماقتاستىقتى ودان ءارى دامىتۋ ءۇشىن جاڭا كوكجيەكتەر اشادى دەگەن ۇمىتتە ەكەنىن جەتكىزدى.
ەلىمىزگە رەسمي ساپارمەن كەلگەن 44 جاستاعى سامير زايد ءال-ريفايدىڭ ەڭبەك جولى 1988 جىلدان باستالعان. وسى جىلدار يوردانيا كورولدىگىندە ءتۇرلى لاۋازىمدى قىزمەتتەر اتقارعان. ال وتكەن جىلدىڭ جەلتوقسانىنان يوردانيا حاشەميتتىك كورولدىگىنىڭ پرەمەر-ءمينيسترى قىزمەتىندە. اراب, اعىلشىن, فرانتسۋز تىلدەرىن ەركىن مەڭگەرگەن.
ءابدىراحمان قىدىربەك.