كەشە قازاق-يوردان ىسكەرلىك كەڭەسىنىڭ ءتورتىنشى ءماجىلىسى بولىپ ءوتتى. وعان قاتىسقان ۇكىمەت باسشىسى كارىم ءماسىموۆ ءوز سوزىندە سوڭعى كەزدەرى ەكى ەل اراسىنداعى ىسكەرلىك بايلانىستاردىڭ نىعايىپ كەلە جاتقاندىعىن اتاپ كورسەتە كەلە قازاقستان مەن يوردانيا اراسىنداعى ءوزارا ساۋدا-ساتتىقتىڭ كولەمىن ۇلعايتۋ ءۇشىن اۋىل شارۋاشىلىعى سالاسىنداعى جوبالاردى بىرلەسىپ جۇزەگە اسىرۋدىڭ ماڭىزى زور ەكەندىگىنە توقتالدى. ء“بىز وسى سالاداعى جوبالاردى بىرلەسىپ جۇزەگە اسىرا الامىز, بىرىگىپ استىق وسىرۋگە بولادى. ەكى ەل اراسىندا فارماتسەۆتيكا سالاسىنداعى ىنتىماقتاستىقتىڭ دا كەلەشەگىنەن زور ءۇمىت كۇتەمىز” دەپ اتاپ كورسەتتى كارىم ءماسىموۆ.
قازاقستان ۇكىمەتى باسشىسىنىڭ ايتۋى بويىنشا, قازاقستاننان تۇركىمەنستانعا, ودان ءارى يرانعا سالىنىپ جاتقان تەمىر جولدىڭ قۇرىلىسى اياقتالعان كەزدە قازاقستان مەن يوردانيا اراسىنداعى ساۋدا-ەكونوميكالىق بايلانىستار دەڭگەيى الدەقايدا جاقسارا تۇسۋگە ءتيىس. ەكى ەل كاسىپكەرلەرى وسىنداي جاعدايعا قازىردەن باستاپ دايىندالىپ, ءوزارا ىسكەرلىك بايلانىستارىن ارتتىرا بەرۋى كەرەك.
سۇڭعات ءالىپباي.