پارلامەنت ءماجىلىسىنىڭ توراعاسى ورال مۇحامەدجانوۆتىڭ جەتەكشىلىگىمەن پالاتا بيۋروسىنىڭ كەزەكتى وتىرىسى ءوتتى. وندا ءماجىلىستىڭ سالالىق كوميتەتتەرىنىڭ ۇسىنۋىمەن الداعى اپتادا وتەتىن جالپى وتىرىستىڭ كۇن تارتىبىنە ۇسىنىلاتىن ماسەلەلەر قارالدى.
دەپۋتاتتاردىڭ تالقىسىنا بىرقاتار حالىقارالىق قۇجاتتاردى بەكىتۋدى كوزدەيتىن زاڭ جوبالارى ۇسىنىلاتىن بولدى. اتاپ ايتقاندا, “اقشا بەلگىلەرىن قولدان جاساۋعا قارسى كۇرەس جونىندەگى حالىقارالىق كونۆەنتسيانى جانە وعان حاتتامانى راتيفيكاتسيالاۋ تۋرالى”, “قازاقستان رەسپۋبليكاسىنىڭ ۇكىمەتى مەن تاجىكستان رەسپۋبليكاسىنىڭ ۇكىمەتى اراسىنداعى وتەۋسىز اسكەري كومەك كورسەتۋ تۋرالى كەلىسىمدى راتيفيكاتسيالاۋ تۋرالى” زاڭ جوبالارى پالاتانىڭ جالپى وتىرىسىنىڭ كۇن تارتىبىنە ۇسىنىلدى.
سونداي-اق “نورماتيۆتىك قۇقىقتىق اكتىلەر تۋرالى” قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى” زاڭ جوباسىن دەپۋتاتتاردىڭ ەكىنشى وقىلىمدا تالقىعا سالاتىنى قاراستىرىلىپ وتىر.
بيۋرو وتىرىسىندا ەۋروپا پارلامەنتىندەگى ارال پروبلەماسى بويىنشا ارنايى تىڭداۋلارعا ءماجىلىستىڭ قاتىسۋى تۋرالى ماسەلە قارالدى. اتالمىش باسقوسۋ ۇستىمىزدەگى جىلعى 12 قازان كۇنى بەلگيا كورولدىگىندە وتەتىنى جوسپارلانعان.
“ەگەمەن-اقپارات”.