كەشە استانادا “نۇر وتان” حدپ پارلامەنتاريزم ينستيتۋتى پارتيانىڭ حالىقتىق تۇعىرناماسىن جۇزەگە اسىرۋ بارىسى جونىندە عىلىمي-پراكتيكالىق سەمينار وتكىزدى. ينستيتۋت ديرەكتورى بولات بايقاداموۆ مودەراتورلىق ەتكەن سەميناردا 2007 جىلدان بەرگى تۇعىرنامانى جۇزەگە اسىرۋدىڭ پروبلەمالىق تۇستارىن انىقتاۋ مەن ونىڭ ماقساتتارىنا قول جەتكىزۋ پەرسپەكتيۆالارى قارالدى.
تۇعىرناما 2007 جىلى 4 شىلدەدە قابىلدانىپ, سايلاۋدا پارتيانىڭ جەڭىسىن ايقىنداپ بەرگەن باعدارلامالىق قۇجات قانا ەمەس, ەلەكتورالدى كەزەڭ ارالىعىنداعى باستى باعدار دا بولىپ تابىلادى. وسى رەتتە “نۇر وتان” حدپ ورتالىق اپپاراتى باسشىسىنىڭ ورىنباسارى راسۋل ورازعۇلوۆ تۇعىرناما جۇمىس جەلىسىن تاپقاندىعىن ەرەكشە اتاپ ءوتتى. ايتسە دە سوڭعى ءۇش جىلدىڭ جۇمىسىن قورىتىندىلاۋ قاجەت. پارتيا ليدەرى تاپسىرمالارىن ورىنداۋدا تيىمدىلىك جەتىسپەۋدە. ماسەلەن, نە جاسالسا دا ونى يندۋستريالىق-يننوۆاتسيالىق جوبا دەگەنگە تەلىنۋدە. راسۋل قابدوللا ۇلى ەلدىڭ ىشكى جاعدايىن كەشەندى تۇردە تالداۋ كەرەكتىگىن تىلگە تيەك ەتە وتىرىپ, قالعان ەكى جىل ىشىندە سايلاۋالدى مىندەتتەمەلەردى تولىق ورىنداۋ ءۇشىن جۇيەلى جۇمىس قاجەتتىگىنە توقتالدى. اسىرەسە, بيۋدجەت قاراجاتىنا باقىلاۋ جاساۋ, مەملەكەتتىك شىعىندى قىسقارتۋ, بيزنەس كليماتتى جاقسارتۋ, مەملەكەت پەن جەكە مەنشىك ارىپتەستىگىن دامىتۋ جانە تاعى باسقا مىندەتتەردى ناقتى ورىنداۋ قاجەت.
حالىقتىق تۇعىرنامانىڭ ءتيىمدى جۇزەگە اسىرىلۋىن ماجىلىستەگى “نۇر وتان” حدپ فراكتسياسى جانىنداعى الەۋمەتتىك كەڭەستىڭ ءتورايىمى ايتكۇل ساماقوۆا جان-جاقتى ايتىپ بەردى. ماسەلەن, دەنساۋلىق ساقتاۋ سالاسىنا باعىتتالعان قارجى 1,5 ەسەگە وسكەن. ال 2012 جىلى ونىڭ كولەمى تاعى ەكى ەسەگە دەيىن ۇلعايادى دەپ كۇتىلۋدە. ەلىمىزدە 200-دەن استام دەنساۋلىق ساقتاۋ مەكەمەلەرى سالىنسا, كەپىلدى مەديتسينالىق كومەك 2007 جىلى 1,4 ەسەگە ارتقانى بەلگىلى.
ال ءبىلىم سالاسىنا بولىنگەن قارجى 11 پايىزعا ءوسىپ, 250 مەكتەپ سالىنعان. يندۋستريالىق-يننوۆاتسيالىق باعدارلاما اياسىندا 90 مىڭ جۇمىس ورنىن اشۋ كوزدەلسە, تاعى 100 مىڭ ادامدى وقىتۋ جوسپارلانعان. وسى ورايدا ايتكۇل بايعازىقىزى كەيبىر پروبلەمالارعا دا نازار اۋدارتا كەتتى. قازىرگى تاڭدا ءوزىن-ءوزى جۇمىسپەن قامتىعان ادامدار قاتارى كوپ, الايدا بولاشاقتا ولار الەۋمەتتىك زەينەتاقى عانا الا الادى. جۇمىس ىستەيتىن جۇكتى ايەلدەر سياقتى ءوزىن-ءوزى جۇمىسپەن قامتىعان اياعى اۋىر ايەلدەرگە دە جالاقى تولەنۋى ءتيىس.
قازاقستان پرەزيدەنتىنىڭ كەڭەسشىسى ەرمۇحامەت ەرتىسباەۆ ءوزىنىڭ “ساياسي جۇيەنىڭ تۇراقتىلىعى مەن تەڭگەرىمدىلىگىن قامتاماسىز ەتۋ” اتتى بايانداماسىندا ەلدى باسقارۋدىڭ ۇزاق مەرزىمدى پەرسپەكتيۆالارىنا ەرەكشە دەن قويدى. وپپونەنتتەرىمىز ءبىزدى كوكپ-مەن سالىستىرادى, دەي كەلىپ, ەرمۇحامەت قابيدەن ۇلى قازىرگى كەزدە ەلىمىزدە ساياسي باسەكەلەستىك ورتا قالىپتاسقانىن اتاپ كورسەتتى. بىراق “نۇر وتان” بولاشاقتا دا جەڭىس بيىگىنەن كورىنۋدى كوزدەيدى. بۇل رەتتە پارتيانىڭ حالىقتىق تۇعىرناماسى قۋاتتى كۇشكە اينالماق.
بۇدان كەيىن ءسوز العان يندۋستريا جانە جاڭا تەحنولوگيالار ۆيتسە-ءمينيسترى بەرىك قاماليەۆ, مادەنيەت مينيسترلىگى قوعامدىق-ساياسي جۇمىسى دەپارتامەنتى ديرەكتورىنىڭ ورىنباسارى ۆاسيلي پورۋبايمەح جانە ەرەكشە تاپسىرمالار جونىندەگى ەلشى – ەقىۇ دەپارتامەنتىنىڭ ديرەكتورى سەرجان ابدىكارىموۆ ءوز سالالارى بويىنشا اتقارىلعان جۇمىستار تۋرالى اڭگىمەلەپ بەردى.
پارلامەنت دەپۋتاتتارى مەن مەملەكەتتىك ورگاندار قىزمەتكەرلەرى, پارتيا ورتالىق اپپاراتى مەن وڭىرلىك فيليالدار جانە ۇكىمەتتىك ەمەس ۇيىم وكىلدەرى قاتىسقان سەمينار تالقىلاۋ جانە پىكىر الماسۋمەن اياقتالدى. ناتيجەسىندە پارتيانىڭ ورتالىق اپپاراتىنا, مەملەكەتتىك ورگاندارعا جانە وڭىرلىك فيليالدارعا سەميناردىڭ ۇسىنىمدارى جولداناتىن بولىپ شەشىلدى.
اسقار تۇراپباي ۇلى.