كەشە استانا قالاسىندا ەلىمىز سىرتى ىستەر مينيسترلىگىنىڭ جاۋاپتى حاتشىسى ءراپىل جوشىباەۆ پەن يۋنيسەف-ءتىڭ قازاقستانداعى وكىلى, بۇۇ-نىڭ رەزيدەنت-ۇيلەستىرۋشىسى حاناا سينگەر “قازاقستان رەسپۋبليكاسىنىڭ ۇكىمەتى مەن بىرىككەن ۇلتتار ۇيىمى اراسىنداعى بۇۇ پاسپورتتارى يەلەرىن ۆيزالىق تالاپتاردان بوساتۋ تۋرالى” كەلىسىمگە قول قويدى.
ۆيزالىق تالاپتاردان بوساتۋ جونىندەگى كەلىسىم جاساسۋ بۇۇ-مەن ءوزارا قارىس-قاتىناستى دامىتۋداعى كەزەكتى قادام بولىپ تابىلادى. سول سەبەپتى قازاقستان ۇلتتار ۇيىمىنىڭ ادامزاتتىڭ ومىرلىك پروبلەمالارىن شەشۋدەگى جەتەكشى ءرولىن تۇيسىنە وتىرىپ, بۇۇ-مەن ىنتىماقتاستىققا ۇلكەن ءمان بەرىپ وتىر. “بۇل ۇيىم – الەمدەگى ەڭ بەدەلدى ۇيىم. سوندىقتان, وسىنداي كەلىسىمدەرگە قول قويۋ ارقىلى ارىپتەستىگىمىزدى ودان ءارى نىعايتۋعا جول اشىلادى دەگەن ويدامىز”, دەدى ءراپىل جوشىباەۆ.
ال يۋنيسەف-ءتىڭ قازاقستانداعى وكىلى, بۇۇ-نىڭ رەزيدەنت-ءۇيلەستىرۋشىسى حاناا سينگەر ءوز كەزەگىندە بۇل كەلىسىمگە قول قويۋ ءراسىمى بۇۇ-نىڭ قازاقستانداعى ايتۋلى وقيعاسى رەتىندە ەستە قالاتىندىعىن اتاپ ءوتتى. “بۇگىندە قازاقستاندا بۇۇ-نىڭ 12-گە تارتا ۆەدومستۆوسى جۇمىس ىستەيدى. قازىرگى تاڭدا ولاردىڭ سانى ءوسىپ كەلەدى. اسىرەسە, الماتىدا. ءبىزدىڭ بۇل قالادا بۇۇ-نىڭ وڭىرلىك ورتالىعىن قۇرساق دەگەن ويىمىز بار. قازاقستان بۇگىندە بۇۇ وكىلدەرىن ۆيزالىق تالاپتاردان بوساتۋ رەجىمىن قابىلداعان 26 ەلدىڭ قۇرامىنا كىردى. ال ول ەلدەردىڭ باسىم كوپشىلىگى ەۋروپالىق ەلدەر ەكەنىن ايتقان ءجون. بۇل ءوز كەزەگىندە قازاقستان تاراپىنان بۇۇ-نىڭ دۇنيە ءجۇزىندەگى رولىنە ايرىقشا نازار اۋدارىلىپ وتىرعانىن كورسەتەدى. مەن ءوز تاراپىمنان قازاق ەلىنىڭ بۇگىنگى تاڭدا قول جەتكىزىپ وتىرعان جەتىستىكتەرى مەن جۇرگىزىپ وتىرعان كوشباسشىلىق ساياساتىن جوعارى باعالار ەدىم”, – دەدى حاناا سينگەر.
ءلايلا ەدىلقىزى.