الماتىدا ءال-فارابي اتىنداعى قازاق ۇلتتىق ۋنيۆەرسيتەتىندە رەسپۋبليكا قورعانىس ءمينيسترى ادىلبەك جاقسىبەكوۆ جۇمىس ساپارىمەن بولدى. كوپشىلىككە بەلگىلى, مەملەكەت باسشىسى نۇرسۇلتان نازارباەۆ ەلىمىزدىڭ عالىمدارى مەن وقىتۋشىلارى الدىنا باسەكەگە قابىلەتتى ماماندار دايارلاۋ ءمىندەتىن قويعان بولاتىن. ءال-فارابي اتىنداعى قازاق ۇلتتىق ۋنيۆەرسيتەتىندە قازاقستاندا العاش رەت قۇرىلعان قوعامدىق قامقورشىلار ينستيتۋتى ەڭ ماڭىزدى ۇيلەستىرۋ ورگانى رەتىندە جوعارى وقۋ ورىندارىنىڭ جۇمىسىن باقىلاۋدى جۇزەگە اسىرۋدا. ۋنيۆەرسيتەتتىڭ وسى قامقورشىلار كەڭەسىنىڭ العاشقى جيىنىن ونىڭ توراعاسى ادىلبەك جاقسىبەكوۆ وتكىزىپ, بۇل ءىس-شارا جۇمىسىنا قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى ماۋلەن ءاشىمباەۆ, پارلامەنت سەناتىنىڭ حالىقارالىق قاتىناستار, قورعانىس جانە قاۋىپسىزدىك جونىندەگى كوميتەتىنىڭ توراعاسى قۋانىش سۇلتانوۆ, ۇلتتىق عارىش اگەنتتىگىنىڭ توراعاسى تالعات مۇساباەۆ قاتىستى.
قوعامدىق قامقورشىلار كەڭەسىنىڭ وسى باسقوسۋىندا ۋنيۆەرسيتەت رەكتورى باقىتجان جۇماعۇلوۆ بايانداما جاساپ, وندا ول جوعارى وقۋ ورنىندا اتقارىلىپ جاتقان اۋقىمدى ءىس-شارالار جانە ماماندار دايارلاۋداعى ىرگەلى جوبالار جونىندە جان-جاقتى ايتىپ بەردى. اسىرەسە, ۋنيۆەرسيتەتتىڭ يننوۆاتسيالىق كلاستەرىن دامىتۋدى بەلسەندى تۇردە قولداۋعا باستى نازار اۋدارىلۋدا. ماۋلەن اشىمباەۆتىڭ پىكىرىنشە, قازۇۋ — رەسپۋبليكاداعى جوعارى وقۋ ورىندارى اراسىندا وزىندىك ەرەكشەلىكتەرى مەن ارتىقشىلىقتارى بار وقۋ ورنى. جانە دە ونىڭ بارلىق جۇيەسىندەگى دامۋ فاكتورى نازار اۋدارارلىقتاي.
تالعات مۇساباەۆ بولسا ءوز كەزەگىندە بۇل وقۋ ورنىندا اەروعارىشتىق سالادا ماماندار دايارلاۋعا كىرىسۋ جۇمىستارىنىڭ باستالعاندىعىن تىلگە تيەك ەتىپ, وسى ءىستىڭ قازاقستان ءۇشىن ماڭىزدىلىعىنا توقتالدى. ال سەناتور قۋانىش سۇلتانوۆ ءسوزىنىڭ ءتۇيىنىن: “مەملەكەتتىڭ باسەكەگە قابىلەتتىلىگى عىلىم, بىلىممەن تىعىز بايلانىستى. سول سەبەپتى الەمدىك تاجىريبەنى قولدانا وتىرىپ, مۇنداعى قامقورشىلار كەڭەسىن جۇزەگە اسىرساق, بۇل ۋنيۆەرسيتەتتىڭ دامىعان ەلدەر قاتارىنداعى باسەكەگە توتەپ بەرۋىن ارتتىرادى”, – دەگەن ويمەن بەركىتتى.
قوعامدىق كەڭەستە ۋنيۆەرسيتەتتىڭ بازاسىندا بۇگىنگى كۇن تالابىنا وراي اقپاراتتىق ءبىلىم ورتالىعى قۇرىلۋىنا قولداۋ كورسەتۋ ماسەلەسى دە قوزعالدى.
ۋنيۆەرسيتەتتە بولاشاق مامانداردىڭ كاسىبي بىلىكتىلىگىن جەتىلدىرۋگە باسا نازار اۋدارىلۋدا. وعان قازۇۋ-ءدىڭ اسكەري كافەدراسىن ناقتى مىسالعا الۋعا بولادى. مۇندا زاپاستاعى اسكەري قىزمەتكەرلەردى دايىنداپ, ولاردى شىڭداۋ ءوزىندىك تالاپ دەڭگەيىنەن شىعۋدا.
قامقورشىلار كەڭەسىنىڭ وتىرىسىنان كەيىن قورعانىس ءمينيسترى ادىلبەك جاقسىبەكوۆ بۇگىنگى زامان تالابىنا ساي جابدىقتالعان وسى كەشەننىڭ تىنىس-تىرشىلىگىمەن جان-جاقتى تانىستى.
باقىت بالعارينا, الماتى.