تاۋەلسىزدىگىمىزدىڭ ارقاسى. ەلىمىزدە تۇڭعىش رەت وتكىزىلىپ جاتقان شارالار لەگى از ەمەس. الماتىدا قازاق تاعامتانۋ اكادەمياسىنىڭ باستاماسىمەن جانە ءاCىERTO كومپانياسى قولداپ, ءبىرىنشى رەت دارۋمەندەر مەن مينەرالدار فەستيۆالى بولىپ ءوتتى.
الايدا, بۇگىندە ەلىمىزدە 200-گە تارتا دارۋمەن ساتاتىن, تاراتاتىن دەلدال جانە ءوندىرۋشى كومپانيا بولسا, قازىرگە ونىڭ ساۋساقپەن سانارلىعى عانا وسى شاراعا قاتىسىپ, اعزاعا ءنار, ءال-قۋات بەرەتىن ءونىمدەرىنىڭ ساپاسىن ناسيحاتتادى. ەڭ باستىسى, الداعى ۋاقىتتا دارۋمەندەر فەستيۆالىن وتكىزۋ داستۇرگە اينالماق.
يگى باستاما بارىسىندا قازاق تاعامتانۋ اكادەمياسىنىڭ پرەزيدەنتى – ەلىمىزدىڭ دەنساۋلىق سالاسىن دامىتۋعا ولشەۋسىز ۇلەس قوسقان پروفەسسور تورەگەلدى شارمانوۆتىڭ: “الەمدەگى 6 ءتۇرلى اجالدان تاعام ءمازىرىن وزگەرتۋ ارقىلى عانا قاشىپ قۇتىلۋعا بولار ەدى”, دەيتىن قاناتتى ءسوزى ايتىلماي قالعان جوق. دارۋمەندەر فەستيۆالىنە قاتىسۋشىلار ءارتۇرلى اتالىمدار بويىنشا ساپا بايقاۋىنا دا قاتىستى.
ال ساراپتاما كوميسسياسى ەڭ ۇزدىك دەپ تانىلعان “نيكومەد”, “فاركو” “فيتولەۋم” جانە “ارت-لايف” كومپانيالارىن ارنايى ديپلومدارمەن ماراپاتتادى. كوپتەگەن دارىگەرلەردىڭ كوڭىلىنەن شىققان “ۆيتا فارم+” جانە “ومەگا-3 كارديو” كومپانيالارى بولسا “دارىگەرلەر كوزايىمى” جۇلدەسىنىڭ يەگەرلەرى اتاندى.
قازاق تاعامتانۋ اكادەمياسىنىڭ ۆيتسە-پرەزيدەنتى يگور تسويدىڭ ايتۋىنشا, مۇنداي شارا تۇتىنۋشىلارعا جانە بۇگىن ارنايى كەلگەن دارىگەرلەرگە تىكەلەي تاۋار وندىرۋشىلەرمەن اڭگىمەلەسۋگە جانە پرەپاراتتارى تۋرالى تولىق اقپارات الۋعا مۇمكىندىك تۋدىرادى.
– الداعى ۋاقىتتا بۇل شارانى ءداستۇرلى تۇردە وتكىزۋدى جوسپارلاپ وتىرمىز. بۇگىن, وكىنىشكە قاراي, ەلىمىزدە جۇمىس ىستەيتىن 200 كومپانيانىڭ 10-ى عانا قاتىستى. بولاشاقتا قاتىسۋشىلار سانى ارتادى دەگەن سەنىمدەمىن. بۇل شارا ەڭ الدىمەن حالىقتى دارۋمەندەر تۋرالى اقپاراتتاندىرۋ ءۇشىن ۇيىمداستىرىلىپ وتىر. تۇسىنىك جۇمىسىنىڭ ازدىعىنان كوپشىلىگى دارۋمەندى كۇندەلىكتى تاماق راتسيونىنا ەنگىزىپ, ءىشۋ كەرەك ەكەندىگىن بىلە بەرمەيدى. بۇلار كوپتەگەن اۋرۋلاردىڭ الدىن الۋدا پايداسى زور, – دەدى يگور تسوي.
وسى ءبىر قىزىقتى شارا قالالىقتاردى ەلەڭ ەتكىزگەنى انىق. فەستيۆالعا قاراپايىم تۇتىنۋشىلار عانا ەمەس, رەسپۋبليكالىق سانيتارلىق-ەپيدەميالوگيالىق قىزمەت ماماندارى, بەلگىلى عالىمدار قاتىسىپ, وعان عىلىمي سيپات بەرگەنىن دە اتاپ وتكەن ءجون.
“اتريۋم” ويىن-ساۋىق ورتالىعىندا وتكەن فەستيۆالعا كەلۋشىلەر دە ءارتۇرلى بايقاۋلار مەن لوتەرەيا ويىندارىنا قاتىسىپ, ءوندىرۋشىلەردىڭ سىيلىقتارىنا يە بولدى. سونداي-اق بالالارعا سالاماتتى ءومىر سالتىن ناسيحاتتايتىن مۋلتفيلمدەر كورسەتىلدى. سالتاناتتى جاعدايدا وتكەن فەستيۆالدا مەملەكەتتىك سىيلىقتىڭ لاۋرەاتتارى يگور تسوي, يۋري سينياۆسكي سىندى پروفەسسورلار دارۋمەندەر تۋرالى, ونىڭ سوڭعى جەتىستىكتەرى تۋرالى وي ءبولىستى.
– بۇگىنگى جۇمىسباستىلىق, پسيحولوگيالىق كۇيزەلىس پەن مەگاپوليس شۋىلى جاعدايىندا تەك كۇندەلىكتى ازىقپەن اعزاعا قاجەتتى قۋاتتى الۋ مۇمكىن ەمەس. ادامعا تاۋلىكتىك اعزاعا قاجەتتى كالتسيدى الۋ ءۇشىن كەمى جەتى بالىق نەمەسە 4 كيلو سەلدەرەي جەۋى كەرەك. بۇل مۇمكىن ەمەس! – دەپ ءسوز باستاعان دۇرىس تاماقتانۋدى ناسيحاتتاۋ جونىندەگى ۇلتتىق ۇيلەستىرۋشى گاۋھار ۇشكەمپىروۆانى قازاق تاعامتانۋ اكادەمياسىنىڭ ۆيتسە-پرەزيدەنتى يۋري سينياۆسكي دە قۋاتتاپ, ادامداردىڭ جاسىنا, جىنىسىنا, ءومىر ءسۇرۋ سالتىنا قاراي دارۋمەندەردى تاڭداپ, تۇراقتى پايدالانىپ وتىرۋ قاجەتتىگىن عىلىمي تۇرعىدا دايەكتەدى.
قىسقاسى, بۇرىن-سوڭدى بولىپ كورمەگەن فەستيۆال قالالىقتاردى ءبىر ەلەڭدەتىپ, ەلدىڭ نازارىن سالاماتتىلىققا تاعى ءبىر اۋدارىپ وتكەنى اقياقات. الداعى جىلدارى وعان قاتىسۋشى كومپانيالار سانى دا, كەلۋشىلەر قاتارى دا ارتا تۇسەدى دەپ كۇتىلۋدە.
ايناش ەسالي, الماتى