كەشە پرەمەر-ءمينيستردىڭ ورىنباسارى بەردىبەك ساپارباەۆ وڭتۇستىك قازاقستان وبلىسىنا جۇمىس ساپارىمەن كەلدى.
ۆيتسە-پرەمەر بيىلعى اقپان ايىندا اشىلعان شىمكەنت قالالىق №1 بالالار اۋرۋحاناسىنىڭ جۇمىسىمەن تانىستى. ۇكىمەت باسشىسىنىڭ ورىنباسارى اۋرۋحانانىڭ ءماجىلىس زالىندا وبلىستاعى ءبىلىم بەرۋ, دەنساۋلىق ساقتاۋ, مادەنيەت جانە سپورت سالاسىنىڭ قىزمەتكەرلەرىمەن كەزدەستى. بۇل ماجىلىسكە پرەمەر-ءمينيستردىڭ ورىنباسارىمەن بىرگە مادەنيەت جانە سپورت ءمينيسترى ارىستانبەك مۇحامەدي ۇلى, ءبىلىم جانە عىلىم ءمينيسترى اسلان ءسارىنجىپوۆ قاتىستى.
جۇزدەسۋدى وبلىس اكىمى اسقار مىرزاحمەتوۆ جۇرگىزىپ وتىردى. كەڭەستە وڭتۇستىك قازاقستان وبلىستىق دەنساۋلىق ساقتاۋ باسقارماسىنىڭ باسشىسى س.پاكەەۆ, ءبىلىم باسقارماسىنىڭ باسشىسى ا.ەلشيەۆا جانە مادەنيەت باسقارماسىنىڭ باسشىسى ك.ايداربەكوۆا شاعىن بايانداما جاساپ, ءوز سالالارى بويىنشا وڭىردەگى اتقارىلىپ جاتقان جۇمىستاردى جۇيە-جۇيەسىمەن تالداپ ايتىپ بەردى.
ال ونىڭ ءسوزىن وبلىس اكىمى اسقار مىرزاحمەتوۆ تولىقتىرىپ, اۋدان, قالا باعىتتارىندا دا «جەدەل جاردەم» ءجۇيەسى جولعا قويىلعانىن جەتكىزدى.
ءبىلىم جانە عىلىم ءمينيسترى اسلان ءسارىنجىپوۆ وبلىستىق ءبىلىم باسقارماسىنىڭ باسشىسى ا.ەلشيەۆادان وقۋشىلاردى وقۋلىقپەن قامتۋدىڭ قالاي شەشىلىپ جاتقاندىعىن سۇراسا, مادەنيەت جانە سپورت ءمينيسترى ارىستانبەك مۇحامەدي ۇلى وبلىستىق مادەنيەت باسقارماسىنىڭ باسشىسى ك.ايداربەكوۆاعا تىندىرىمدى جۇمىسى ءۇشىن العىسىن ايتتى.
كەڭەستى پرەمەر-ءمينيستردىڭ ورىنباسارى بەردىبەك ساپارباەۆ قورىتتى.
– الەمدى قانشا رەت داعدارىس قىسپاعىنا الىپ, مىقتى مەملەكەتتەردىڭ كوبى تارىعىپ جاتقان كەزەڭنىڭ وزىندە ەلباسى دەنساۋلىق ساقتاۋ, ءبىلىم, مادەنيەت جانە سپورت سالاسىنا بولىنەتىن قارجىنى ەسەلەپ كەلەدى, – دەدى بەردىبەك ءماشبەك ۇلى. – ويتكەنى, قازاقستانعا دەنى ساۋ, ءبىلىمدى, مادەنيەتتى ۇرپاق كەرەك. ماسەلەن, وڭتۇستىكتە دەنساۋلىق ساقتاۋ سالاسىنا 90,3 ملرد. تەڭگە ءبولىنىپ, وتكەن جىلداردان 8,3 پايىزعا ارتقاندىعى مەملەكەتتىڭ «سالاماتتى قازاقستان» باعدارلاماسىن تۇبەگەيلى ورىنداۋعا باعىت ۇستاعاندىعىن اڭعارتادى.
قازاقستاندا قارجى جوق ەمەس, بار. بىراق ونى ماقساتسىز, وڭدى-سولدى جۇمساۋعا جول بەرىلمەيدى. پرەمەر-ءمينيستردىڭ ورىنباسارى وسى جايعا ايرىقشا توقتالدى. شەتەلدە امبۋلاتوريالىق كومەك جولعا قويىلعان, اۋرۋحانالارعا اۋىر ناۋقاستار عانا جاتقىزىلادى. بىزدە دە وسىنداي جاقسى ءتاجىريبەلەردەن ۇيرەنۋ كەرەك. رەسپۋبليكادا مەديتسينا سالاسى قىزمەتكەرلەرىن دايارلاۋدا ورالىمسىزدىقتار بار. كادر ساپاسىنا قاتتى كوڭىل اۋدارماسا بولمايدى. ەڭ الدىمەن مەيىربيكەلەردىڭ بىلىكتىلىگىن ارتتىرۋدى جولعا قويۋ كەرەك. ويتكەنى, تامىر ۇستاپ, ۋكول سالا المايتىن اۋرۋحانا قىزمەتكەرلەرىنە جۇرتشىلىق تاراپىنان ورىندى سىن ايتىلىپ جاتىر. ۇكىمەت دەنساۋلىق ساقتاۋ سالاسىنا وراسان قارجى ءبولىپ, ەڭ سوڭعى ۇلگىدەگى مەديتسينالىق قوندىرعىلاردى اپەرىپ جاتىر. الايدا, سول قىمبات قوندىرعىلاردىڭ ىسكە قوسىلماي تۇرعاندارى دا كوپ. نەلىكتەن؟ كادر دايىن ەمەس. سوندىقتان, بىلىكتىلىكتى ارتتىرۋ ءۇشىن ءبىلىم كوتەرۋ, قاجەت جاعدايدا شەتەلدەردە وقىتۋدى, تاجىريبە الماسۋدى ودان ءارى ىسكە اسىراتىن بولامىز. كەلەشەكتە مەديتسينالىق تەحنيكالار ليزينگ جۇيەسىمەن الىناتىن بولادى. بۇل جاۋاپكەرشىلىكتى ارتتىرۋ ءۇشىن كەرەك.
وڭتۇستىك قازاقستان وبلىسىنىڭ الەۋمەتتىك-ەكونوميكالىق احۋالى جاقسى. ءوڭىردىڭ اۋدان, قالا ورتالىقتارىندا زامان تالابىنا ساي عيماراتتار سالىنىپ, ەل يگىلىگىنە بەرىلۋدە. شىمكەنت شىن مانىندە قازاقستانداعى ساۋلەتتى قالالاردىڭ بىرىنە اينالدى. وسىنداي تىندىرىمدى جۇمىستارى ءۇشىن وبلىس باسشىسى اسقار يسابەك ۇلىنا ءوزىمنىڭ ريزاشىلىعىمدى بىلدىرەمىن.
مەملەكەتتىڭ ءبىلىم سالاسىنا بولەتىن قارجىسى تومەندەمەيدى. ايتسە دە ويلاساتىن جايتتار بارشىلىق. وڭتۇستىكتە حالىق كوپ. جىل سايىن 80 مىڭنىڭ ۇستىندە ءسابي دۇنيەگە كەلەدى. بۇل – جاقسىلىق. بىراق ولاردى مەملەكەتتىك باعدارلامامەن عانا بالاباقشاعا ورنالاستىرۋ قيىن. سوندىقتان, بالاباقشا سالۋ ىسىنە كاسىپكەرلەردى تارتۋدى جالعاستىرا بەرۋ كەرەك. 2020 جىلعا دەيىن اپاتتى جانە اپات جاعدايىنداعى مەكتەپتەردى جويىپ, جاڭا ءبىلىم وشاقتارىن سالاتىن بولامىز. مەملەكەت وسى ماقساتقا جىل سايىن ۇلتتىق قوردان 3 ميلليارد دوللارعا دەيىن اقشا بولمەك. وقۋشىلاردى ساپالى وقۋلىقتارمەن قامتاماسىز ەتۋ كۇن تارتىبىندە تۇر. تامىز ايىنا دەيىن بۇل ماسەلە دۇرىس شەشىلۋى كەرەك.
پرەمەر-ءمينيستردىڭ ورىنبا-
سارى ساپالى كادر ماسەلەسىنە, كاسىپتىك-تەحنيكالىق ۋچيليششەلەردەگى مامان دايىنداۋ جاعدايىنا توقتالدى. ەكونوميست, زاڭگەر, مۇعالىم سياقتى ماماندىق يەلەرى كوپ. دەنى جۇمىس تاپپاي وتىر. ال زاۋىت, فابريكالارعا يندۋستريالىق-يننوۆاتسيالىق باعدارلاما بويىنشا جاڭاشا جۇمىس جاساي الاتىن ماماندار اسا قاجەت. سوندىقتان, ويلاسىپ جاسايتىن شارۋالار جەتكىلىكتى. ءبىرىن ءبىرى اينا-قاتەسىز قايتالايتىن, سۇرانىسپەن جۇمىس جاسامايتىن جوعارى جانە ورتا وقۋ ورىندارىن جابۋعا, بۇگىنگى كۇن تالابىنا ساي ماماندار دايارلاۋعا كىرىسەتىن بولامىز, دەدى ول.
پرەمەر-ءمينيستردىڭ ورىنباسارى ويىن وسىلاي قورىتتى.
بۇدان كەيىن بەردىبەك ءماشبەك ۇلى «قازىنا» ەتنو-تاريحي كەشەنىندە بولىپ, وسىنداعى اتقارىلعان جۇمىستارمەن تانىستى. كەلەسى كەزەكتە ول «Karlskrona LC AB» جشس-ىندە بولدى. اتالعان كاسىپورىن العاشقى رەت وڭىرىمىزدە ديسكىلى اينالمالى بەكىتپەلەر مەن «Zulzer» كونسولدى سورعىلار ءوڭدىرىپ وتىر. جىلىنا 6500 دانا ءونىمدى وتاندىق نارىققا شىعاراتىن زاۋىت زاتىنىڭ قۇنى 2 ملرد. تەڭگەنى قۇرايدى. بۇگىندە مۇندا 20 ادام جۇمىسپەن قامتىلعان.
وسى زاۋىتتىڭ وندىرىستىك تسەحىندا بەردىبەك ساپارباەۆ ەڭبەك قاتىناستارى ماسەلەلەرى جونىندە جيىن وتكىزدى. وعان وڭىردەگى مەملەكەتتىك مەكەمەلەردىڭ باسشىلارى مەن ءىرى جانە ورتا كاسىپورىنداردىڭ جەتەكشىلەرى, ۇكىمەتتىك ەمەس ۇيىمداردىڭ توراعالارى قاتىستى.
سول كۇنى ب.ساپارباەۆ پەن ا.ءسارىنجىپوۆ قازىعۇرت اۋدانىنىڭ اتبۇلاق ەلدى مەكەنىندە جامبىل قاپپاروۆ اتىنداعى №5 مامانداندىرىلعان فيزيكا-ماتەماتيكا مەكتەپ-ينتەرناتىنىڭ اشىلۋ سالتاناتىنا قاتىستى.
ۆيتسە-پرەمەردىڭ جۇمىس ساپارى بۇگىن تۇركىستان قالاسىندا جالعاسادى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.
سۋرەتتى تۇسىرگەن
قايسار شەرىم.