بار بايلىعى – قايىرىمدىلىققا
ءMىcrosoft كورپوراتسياسىنىڭ نەگىزىن قالاۋشى, الەمدەگى ەڭ باي ادامنىڭ ءبىرى پول اللەن ءوزى قايتىس بولعاننان كەيىن بار بايلىعىن قايىرىمدىلىق ماقساتقا جۇمساۋ جونىندە وسيەتىن راسىمدەپتى. 57 جاسار ميللياردەردىڭ بايلىعى – 13,5 ميلليارد دوللار. ول قازىر ايتارلىقتاي قاتتى اۋرۋعا ۇشىراعان كورىنەدى.
كەز كەلگەنگە قولدى بولماي, جيعان بايلىعى كەمباعالدارعا ءتيۋىن كۇنى بۇرىن ويلاستىرعان سابازدى ايتساڭشى! تالايلار بايلىعىن انا دۇنيەگە بىرگە الىپ كەتەتىندەي كورىنەدى عوي.
راحيموۆقا ەشكىم تيىسپەيدى
باشقۇرتستان رەسپۋبليكاسىنىڭ پرەزيدەنتى 76 جاستاعى مۇرتازا راحيموۆ ءوز ءوتىنىشى بويىنشا قىزمەتىنەن كەتتى. وسىعان بايلانىستى ءبىراز اڭگىمە دە بولعان. ءتىپتى, ونى قىلمىسى بارداي ەتكەندەر دە تابىلعان. بىراق ونىڭ ءوتىنىشىن قابىلداعان رەسپۋبليكا قۇرىلتايى (پارلامەنتى) وعان ەشكىمنىڭ تيىسپەۋىنە كەپىلدىك بەرۋ جونىندە شەشىم قابىلداپتى. ال اي سايىنعى زەينەتاقىسىنىڭ مولشەرىن 750 مىڭ رۋبل كولەمىندە بەلگىلەگەن. بۇل 25 مىڭ دوللارعا جاقىن.
پرەزيدەنتتى سوتتاماق
گااگاداعى حالىقارالىق سوت سۋدانداعى دارفۋر پروۆينتسياسىندا جەرگىلىكتى تۇرعىندارعا قارسى گەنوتسيدتىك شارالار جۇرگىزگەنى ءۇشىن سۋدان پرەزيدەنتى ومار ءال-ءباشيردى تۇتقىنعا الۋ جونىندە ەكىنشى رەت وردەر جازىپ وتىر. پروكۋرور وعان 2,5 ميلليون حالىقتى لاگەردە قاماپ ۇستاعانى جونىندە ايىپ تاققان. ءال-باشير سوتقا ءوزى بارا قويماس. ال حالىقارالىق سوت ءساتى تۇسكەندە ونى تۇتقىنعا الۋى ابدەن مۇمكىن. سەربيانىڭ بۇرىنعى پرەزيدەنتى س.ميلوشەۆيچتىڭ سول سوت تۇرمەسىندە قايتىس بولعانىن جۇرت ۇمىتقان جوق.
چاۆەس پەن حريستوس
ۆەنەسۋەلا پرەزيدەنتى ۋگو چاۆەس تاعى ءبىر مىنەز كورسەتتى. ەلدەگى كاتوليكتەر جەتەكشىسى كاردينال حورحە ۋروسا پرەزيدەنت چاۆەس ەلدە “كۋبالىق كوممۋنيزم” ورناتپاق دەپ سىن ايتىپ ەدى, پرەزيدەنت سول ساتتە كاتوليك شىركەۋى ىقپالىن شەكتەۋدى قولعا الدى. ەڭ الدىمەن, ىشكى ىستەر مينيسترلىگىنە ۆاتيكانمەن قارىم-قاتىناستى قايتا قاراۋ جونىندە نۇسقاۋ بەردى. حريستوسپەن سويلەسىپ كەلگەندەي, “پاپا بەنەديكت ءXVى حريستوستىڭ ەلشىسى ەمەس”, دەپ كەسىپ ايتتى. ال بۇل – كاتوليتسيزمنىڭ باستى قاعيداسىنىڭ ءبىرى. ۆەنەسۋەلا حالقىنىڭ 95 پايىزى كاتوليتسيزمدى ۇستانادى.
بيداي قىمباتتاعان
سوڭعى ەكى اپتادا الەمدىك ساۋدادا بيدايدىڭ باعاسى 30 پايىزعا قىمباتتاپتى. ساراپشىلاردىڭ باعامداۋىنشا, بيىل بيداي ءونىمى ايتارلىقتاي كەم بولماق. ول رەسەيدەگى جانە باتىس ەۋروپاداعى قۇرعاقشىلىققا, سونداي-اق كانادا, قارا تەڭىز ايماعىنداعى ءبىراز ەلدەردەگى نوسەرلى جاۋىنعا بايلانىستى كورىنەدى. بۇل جاعداي وسى داقىلدى ساتاتىن ەلدەرگە قوسىمشا تابىس اكەلسە كەرەك.
ىسىراپقور مينيستر
گرەكيانىڭ اۋىر ەكونوميكالىق داعدارىسقا ۇشىراعانى تۋرالى الەم شۋلاپ جاتىر. قارىزدارى شاش ەتەكتەن. بۇكىل ەۋروپا كومەك قولىن سوزدى. مۇنداي كۇيگە بۇل ەل قالاي دۋشار بولعان؟ جاقىندا سونىڭ ءبىر سىرى اشىلدى – شەنەۋنىكتەر قارجىنى وڭدى-سولدى شاشىپتى. ايتالىق, ادىلەت ءمينيسترى بولعان سوتيريوس حاتتسيگاكيس ۇكىمەت مۇشەسى بولعان كەزدە 20 ميلليون ەۋرو قارجىنى قالتا تەلەفونعا جۇمساپتى. جۇمساعاندا, 30 تەلەفوندى تۋىستارىنا, دوستارىنا تاراتىپ بەرگەن جانە سويلەسكەندەرى ءۇشىن اقشا تولەپ وتىرعان. بۇل جاي بەلگىلى بولعان سوڭ, شەتەلدەگىلەر گرەكتەرگە نەگە كومەكتەسەمىز دەپ شۋ كوتەرىپ جاتقان كورىنەدى.
رەسەيدە فاشيستەر كوپ
رەسمي مالىمەتتەرگە قاراعاندا, بۇكىل دۇنيە جۇزىندە 120 مىڭ اسىرەۇلتشىلدار, ياعني جاڭا فاشيستەر بار بولسا, سونىڭ 50-60 مىڭى رەسەيدە ەكەن. مۇنى ادام قۇقى جونىندەگى ماسكەۋ بيۋروسى انىقتاپتى. اسىرەسە, اسىرەۇلتشىلدار سانكت-پەتەربۋرگ (15 مىڭ) پەن ماسكەۋدە (2,5 مىڭ) كوبىرەك شوعىرلانعان كورىنەدى. اسىرەۇلتشىلدار باسقا حالىقتاردىڭ وكىلدەرىنە, اسىرەسە, كاۆكازدىقتار مەن ورتاازيالىقتارعا قارسى ارەكەتتەرگە ءازىر تۇرادى ەكەن. جالپى, مۇنداي كوڭىل-كۇي بۇكىل ەلدە بەلەڭ العانداي. “رەسەي – تەك ورىستار ءۇشىن!” دەگەن ۇراندى رەسەيلىكتەردىڭ 53 پايىزى ماقۇلداسا كەرەك.
وزگەنى دە قۇرمەتتە
ۇلىبريتانيا پارلامەنتى مۇسىلمانداردىڭ ءداستۇرلى كيىم كيىسىنە, ناقتىراق ايتقاندا, پارانجىمەن جۇرۋگە تىيىم سالۋ جونىندەگى ۇسىنىستى قابىلدامادى. يمميگراتسيا جونىندەگى مينيستر دەميان گريننىڭ پىكىرىنشە, بۇل ەلدىڭ داستۇرىندە كىمنىڭ كوشەدە قالاي ءجۇرۋىن بەلگىلەيتىندەي ادەت جوق, بۇل توزىمدىلىك قاعيداسىنا قايشى جانە باسقانى دا قۇرمەتتەۋگە ءتيىس. بۇدان بۇرىن فرانتسۋزدار پارانجىگە تىيىم سالعان. مۇنداعىلار دا سوعان ەلىكتەگەن سىڭايلى, بىراق ولاردىڭ دەگەنى بولمادى.
ازىرلەگەن ماماديار جاقىپ.