قازاقستان رەسپۋبليكاسىنىڭ سىرتقى ىستەر مينيسترلىگى مەن بۇۇ-نىڭ بوسقىندار ىستەرى جونىندەگى جوعارعى كوميسسارى باسقارماسىنىڭ دەلەگاتسياسى بىرلەسكەن كومميۋنيكە قابىلدادى.
جاقىندا استانادا بۇۇ-نىڭ بوسقىندار ىستەرى جونىندەگى جوعارعى كوميسسارى باسقارماسىنىڭ (بجكب) دەلەگاتسياسى جۇمىس بابىنداعى ساپارمەن بولدى. دەلەگاتسيانى بجكب-ءنىڭ حالىقارالىق قورعاۋ ءبولىمىنىڭ ديرەكتورى ۆولكەر تەرك باستاپ كەلدى. ساپار بارىسىندا وڭىردەگى سوڭعى وقيعالارعا بايلانىستى ىنتىماقتاستىقتىڭ پەرسپەكتيۆالارى تالقىلاندى. سونداي-اق سىرتقى ىستەر, ادىلەت, ىشكى ىستەر, ەڭبەك جانە حالىقتى الەۋمەتتىك قورعاۋ مينيسترلىكتەرى مەن باس پروكۋراتۋرادا كەزدەسۋلەر ءوتتى.
تاراپتار بوسقىندارعا كومەك جانە قولداۋ كورسەتۋ بويىنشا ەكىجاقتى جانە وڭىرلىك ىنتىماقتاستىق ماسەلەلەرىن تالقىلاپ, ولاردى حالىقارالىق جانە مەملەكەتتىك تۇرعىدان قولداۋ جايىن ءسوز ەتتى. سونىمەن قاتار, ورتالىق ازيا وڭىرىندەگى ارالاس ميگراتسيا مەن ازاماتتىعى جوق ادامداردىڭ جاعدايى جونىندە پىكىر الماستى.
بۇۇ بجكب قازاقستان رەسپۋبليكاسىنىڭ “بوسقىندار تۋرالى” زاڭ قابىلداعانىنا ريزاشىلىق ءبىلدىردى. سونىمەن بىرگە, بوسقىنداردى تىركەۋ, ولارعا بيلىك تاراپىنان ءتيىستى مارتەبە بەرۋ سەكىلدى كوكەيكەستى ماسەلەلەر تالقىلاندى. ەكى جاق وسى جانە باسقا دا ماسەلەلەر بويىنشا تىعىز ءوزارا ءىس-قيمىلدى جالعاستىرۋعا ۋاعدالاستى.
بجكب دەلەگاتسياسى قازاقستاندى ەقىۇ-داعى تابىستى توراعالىعىمەن قۇتتىقتاپ, قازاقستان رەسپۋبليكاسىنىڭ ۇكىمەتىنە اشىقتىعى جانە جان-جاقتى ىنتىماقتاستىققا ازىرلىگى ءۇشىن ريزاشىلىعىن ءبىلدىردى.
“ەگەمەن-اقپارات”.