بالتاباي اعانىڭ اكەسى ۇسەنباي اقساقال كەزىندە ەلگە بەلگىلى سىنىقشى بولعان ەكەن. ال اناسى كۇلايشا اۋىلدا مال دارىگەرى قىزمەتىن اتقارىپتى. «اكە كورگەن وق جونار...» دەگەن, بالتاباي اتا بالالارىنىڭ مەديتسينا سالاسىن تاڭداۋىنا كوپ كۇش سالىپتى. بۇگىندە بالتاباي ۇسەنباەۆتىڭ 10 بالاسىنىڭ 9-ى, 2 كەلىنى, 2 كۇيەۋ بالاسى مەديتسينا سالاسىندا ەڭبەك ەتىپ ءجۇر. ياعني, ءبىر اۋلەتتە 13 اق حالاتتى جان بار. بۇلار بار ءومىرىن ادام دەنساۋلىعىن ەمدەۋگە ارناپ, حالىقتىڭ العىسىنا بولەنىپ جۇرگەن جاندار. 26 نەمەرەسىنىڭ ۇشەۋى قازاق ۇلتتىق مەديتسينا ۋنيۆەرسيتەتىنىڭ ستۋدەنتتەرى. ولار دا بولاشاق ءدارىگەرلەر.
وسى وتباسىنىڭ قۇت-بەرەكەسى بولىپ وتىرعان بالتاباي اتا مەن توحتان اپا بالا تاربيەسىنە اسا ءمان بەرىپ, جاس ۇرپاقتىڭ بويىنا ادامگەرشىلىك, باۋىرمالدىق, تاتۋلىق, قايىرىمدىلىق, ادەپتىلىك, يناباتتىلىق سياقتى قاسيەتتەردى شىم-شىمداپ سىڭىرۋدەن ەشقاشان جالىققان ەمەس.
ورالحان ءداۋىت,
«ەگەمەن قازاقستان».
جامبىل وبلىسى.