بۇگىندە اقپارات قىزمەتىنىڭ قاجەتتىلىگى ۋاقىت تورىندە تۇر. بۇل ءححى عاسىردىڭ تالابى ءارى جاڭالىعى دا. سوندىقتان اقپارات قۇرالدارى قاي كەزدەگىدەن دە كوپ. “الۋان-الۋان جۇيرىك بار, الىنە قاراي شابادى” دەمەكشى, دوڭگەلەنگەن ءدۇنيە دۇرمەگىندەگى الاساپىران زامان كورىنىسى وسىنداي ءار باسىلىم بەتىندە ءارتۇرلى ورىلەدى. سونداي اقپارات قۇرالدارىنىڭ اراسىندا بۇگىنگى قوعامنىڭ بولمىس-ءبىتىمىن ەلەپ-ەكشەپ, وقىرماندارىنا ساليقالى دا سالماقتى وي تاستاپ, شىندىقتىڭ اۋىلىنان ۇزاماي, حالىقتىڭ ءسوزىن سويلەيتىن “حالىق” گازەتىنىڭ العان اسۋى مەن شىققان شىڭى ءسوز ەتۋگە تۇرارلىق.
بيىل 10 جاسقا تولىپ وتىرعان “حالىقتىڭ”, ونداعى ەڭبەك ەتىپ جۇرگەن ورىمدەي جاستاردىڭ ورلىگى, ومىرگە دەگەن كوزقاراسى تالايدى تامسانتىپ, ءسۇيسىندىرىپ كەلەدى. ارتىندا تىرەپ تۇرعان تىرەگىڭ, مول قارجى تاستاپ تۇراتىن قازانشىڭ بولماسا, كەرۋەنىڭدى ءتىزىپ, كوشكە ىلەسۋدىڭ ءوزى ەپتىلىكتى, ىسكەرلىكتى, جيناقىلىقتى تالاپ ەتەدى. دەگەنمەن, مۇنىڭ ءبارى شىعارماشىلىق جۇمىستىڭ كۇش-قۋاتى بويىندا تاسىعان, قيىندىقتان جاسىماعان جىگەرلى باسشى امانجول ساقىپ ۇلى باسقاراتىن ۇجىم مۇشەلەرىنىڭ ءاربىرىنىڭ بويىنان تابىلىپ, حالىقتىڭ مۇڭىن مۇڭداپ, جوعىن جوقتاپ, وتكىر ماقالالارى ارقىلى وندىققا ءدوپ تيگىزىپ كەلەدى.
باسىلىمنىڭ باستى ۇرانى رەتىندە “حالىق – قۇدايدىڭ ءبىر اتى” اتتى ۇكىلى ءسوزدى بەتپەردە تۇتقان باسىلىمنىڭ ەلمەن, جۇرتشىلىقپەن بىراۋىزدىلىعىنا تالاي ءتانتى بولدىق. وسىدان ءبىراز جىل بۇرىن وبلىستاعى ەكولوگيالىق ۇستەماقىنى الىپ تاستاۋ جونىندەگى بيلىك تاراپىنان بولعان قيسىنسىز باستاماعا العاشقى بولىپ “حالىق” گازەتى اراشا تۇردى. ءباسپاسوزدىڭ بىرقاتارى بۇعىپ قالعاندا, ەكولوگيالىق ايماقتاعى قوردالانعان پروبلەمانىڭ سەڭىن بۇزىپ, قۇس قاناتىنداي قالامنىڭ شىندىقپەن سۋارىلعاندا مۇز قاقىراتاتىن سۇيمەندەي بولاتىنىنا وقىرماننىڭ كوزىن جەتكىزىپ, ادىلدىك جاعىنا شىققان بەدەلدى باسىلىم ءسوزىنىڭ دۇرىستىعى دالەلدەندى. بۇدان ەكى جىلداي بۇرىن وبلىستىق مەشىت اينالاسىنداعى داۋ-دامايعا دا الدىمەن ارالاسىپ, باس يمامنىڭ تاراپىنان ەتەك العان ۋاھھابيلىك اعىمنىڭ جولىن كەسىپ, تازا ءدىندى ۇستانعان مۇسىلمان جاماعاتتىڭ جانىنان تابىلدى. سوندىقتان دا, حالىق ءسوزىن سويلەپ, مىنا ءومىردىڭ وزىندەي تۇزدىعى مول, اششى ءسوزدى باسىلىم بەتىندە بەدەرلەگەن سوڭ با, وقىرمان دا وزەككە تەپپەي, وزىمسىنە وقيدى.
گازەتتىڭ سوڭعى جىلدىڭ سورابىندا ءوزىنىڭ بەت-بەينەسىن كۇرت ءوزگەرتىپ, ايتارلىقتاي جاڭارۋ مەن جاڭعىرتۋدىڭ جولىنا تۇسكەنىن ءبۇگىندە ءتۇيسىگى تۇگەل جۇرتتىڭ كوبى ايتىپ ءجۇر. مۇنى رەداكتسياعا كۇندەلىكتى ەرتەمەن شالىنىپ تۇراتىن قوڭىراۋلار مەن ارنايى كەلىپ جاتاتىن حاتتار استارىنداعى ويلار مەن پىكىرلەر دە تولىق قۋاتتايدى. “حالىقتىڭ” حالىق كوڭىلىنەن شىققاندىعى سول, بيىلعى ەكىنشى جارتىجىلدىقتا باسىلىم تارالىمىن 8000-عا جەتكىزىپ, وقىرمان سانىن ۇلعايتىپ وتىر. مۇنىڭ ءوزى – جۇرتشىلىققا ءتۇزۋ ءسوز بەن اقيقات اقپارات بەرۋگە ۇمتىلىپ وتىرعاندىقتىڭ بەلگىسى.
باسىلىمنىڭ قوزعامايتىن تاقىرىبى جوق. اقپاراتتار اعىنى, ساياسي ساراپتاما, ۇرپاق تاربيەسى, جاستار ماسەلەسى, ءبىلىم مەن عىلىم, كاسىپ پەن ءناسىپ, سالاۋات پەن سەرگەكتىك, قۇقىقتىق ساۋات اشۋ, جۇلدىزدار الەمى, ءتىل مەن ءدىل – “حالىق” گازەتىنىڭ باستى تاقىرىبى. سونىمەن بىرگە وقىرماننىڭ كەلەلى ويىنا دا, تاتىمدى تۇجىرىمىنا دا ويىپ تۇرىپ ورىن بەرىلەدى. ياعني, رەداكتسيا مەن وقىرمان اراسىندا ءوزارا شىعارماشىلىق بايلانىس بار دەپ سەنىممەن ايتۋعا بولادى. شاعىن دا جاس ۇيىم, بىراق شىندىق اۋىلىنان شىققان جاندار ەڭبەگى بەت-بەينەسى ايقىندالعان باسىلىمنىڭ “تۇلپار”, “تۇمار”, “تاعدىر”, “تۇساۋكەسەر”, “تىلسىم”, “ويپىرماي”, “سالاۋات”, “سەرگەك” سەكىلدى ارنايى بەتتەرىمەن دە كوپتىڭ كوڭىلىنەن شىعۋىنىڭ ءوزىن ءومىردىڭ كۇنگەيى مەن كولەڭكەلى تۇستارىن, ءتىرشىلىك تامىرىنىڭ بۇلكىلىن اينا-قاتەسىز كورسەتۋىنەن دەپ ۇعىنىڭىز.
شىندىقتىڭ شارايناسى, اقيقاتتىڭ الداسپانىنا اينالعان ءۇنجاريا ەل بىرلىگى مەن ىنتىماعىن ارتتىرۋدا, جاڭارۋدىڭ بەرىك ۇستامدى ساياساتىن ناسيحاتتاۋدا دا ءوز مۇمكىندىگى دەڭگەيىندە جۇمىس جاساپ كەلەدى. وعان جىل سايىن مەملەكەتتىك تاپسىرىس ورىندايتىنى ايقىن دالەل. بۇل جاڭارۋ جولىنداعى مەملەكەتتىڭ باعىتتى ءىس-قيمىلدارىن حالىققا جەتكىزۋ بولسا, ءارى بيلىك تاراپىنان مەديا-حولدينگ دارەجەسىندەگى ۇجىمنىڭ قىزمەتىنە دەگەن سەنىمدىلىكتى تانىتادى.
ەركىن ءابىل, قىزىلوردا وبلىسى.