كورنەكتى سپورت ءجۋرناليسى سەيداحمەت بەردىقۇلوۆ اعامىزدىڭ «اسپاننان شۇعا جاۋعان كۇن» دەگەن كەرەمەت پوۆەسى بار. قۇنارلى تىلمەن جازىلعان شىعارمانى وقىپ وتىرىپ, شۇعا ەمەس اسپاننان گۇل جاۋىپ تۇرعانداي اسەردە بولاسىڭ.
سوناۋ ءبىر جىلدارى «ساستوبە» تسەمەنت زاۋىتىنىڭ ىرگەسىندەگى ىنتىماق اۋىلىنىڭ تۇرعىندارىنان رەداكتسيا قوسىنىنا ارىز تۇسكەن. «اسپاننان تسەمەنت جاۋادى, دەنساۋلىقتان ايىرىلىپ بىتتىك» دەگەن. باردىق, كوردىك. تال جاپىراقتارىنا قونعان تسەمەنتى ەگەر ەرىنبەيتىن بولىپ سىپىرىپ, سيىرىپ الاتىن بولساڭ سىلاعى قاشقان ءۇيىڭدى بۇتىندەپ الاردايسىڭ. بۇل كۇلەتىن ەمەس, جىلايتىنداي جاعداي ەدى.
زاۋىتتىڭ وتتىعىنا اۋاعا تسەمەنت توزاڭىن جىبەرمەيتىندەي سۇزگى ورناتۋعا اقشاسىن قيماعان شەتەلدىك ينۆەستورلار ەل ۇيقىعا جاتتى-اۋ دەگەندە اۋاعا جىبەرەر ەكەن. اۋامەن ارالاس تسەمەنت جۇتقان ادامداردا قانداي دەنساۋلىق بولادى. كوكونىس بىتكەن تامىر الماي جاتىپ قاقايىپ قاتىپ قالادى. جۇرتشىلىقتىڭ ايقايىنان كەيىن زاۋىت قوجايىندارى سۇزگى ورناتقانىمەن تولىقتاي ىسكە قوسا الماي كەتتى.
وتاندىق ينۆەستور «SAS-Tobe Technologies» سەرىكتەستىگى وسى جوبانى اياعىنا دەيىن جەتكىزىپ, ەلەكتروندى سۇزگى ارقىلى اۋاعا تسەمەنت توزاڭىن شىعارماۋدى جولعا قويدى. ەندى «ساستوبە» تسەمەنت زاۋىتىنان قورشاعان ورتاعا تيەتىن اناۋ ايتقانداي زالال جوق. ءوندىرىس بولعان سوڭ ءبارى جاقسى بولادى دەۋگە بولماس, بىراق زياندى قالدىقتار باياعىداي ەلدىڭ ۇرەيىن ۇشىرمايدى.
ءتۇرلى-ءتۇستى تسەمەنت شىعارىپ كەلگەن زاۋىت وتكەن جىلى 438 توننا ءونىم الىپ, ونىڭ وتىز بەس پايىزىن سىرتقا ەكسپورتتاعان. بۇگىندە زاۋىتقا كەرەكتى جاڭا كەن ورنىن الۋعا كەلىسسوزدەر ءجۇرىپ جاتىر. وعان قول جەتكەن جاعدايدا تسەمەنتتىڭ قۇنى ون پايىزعا ارزانداماق. سەرىكتەستىك ديرەكتورى تالعات سادۋاقاسوۆ وزبەكستان رەسپۋبليكاسىمەن ۇزاق مەرزىمدى كەلىسىمشارت بارىن ايتادى.
كورشى اعايىندى «ساستوبە» تسەمەنت زاۋىتىنىڭ ساپاسى قاناعاتتاندىرادى ەكەن.
زاۋىت اۋىلدىڭ دا جاعدايىن ويلاي جۇرەدى. بىلتىر 15 ملن. تەڭگەگە كوشەلەردى جوندەپ, ارىق-اتىزداردى ارشىپ, بەتونداپ بەرسە, بيىل ۇلى وتان سوعىسى مايدانگەرلەرىنە ورناتىلعان ارداگەرلەر اللەياسىن كۇردەلى جوندەۋدەن وتكىزىپ بەرىپ جاتىر.
«ەلدە بولسا ەرىنگە تيەدى» دەگەن اتالى ءسوزدىڭ قاسيەتىن بۇل جىگىتتەر جاقسى بىلەدى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.