[caption id="attachment_73882" align="aligncenter" width="560"] BAL[/caption]
تاياۋدا استانادا چەرنوبىل اتوم ەلەكتر ستانساسىندا بولعان جارىلىستىڭ 30 جىلدىعىنا وراي ونىڭ زارداپتارىن جويۋعا قاتىسقانداردى ماراپاتتاۋ ءراسىمى وتكىزىلدى. اپات قۇرباندارىنا ارنالعان ەسكەرتكىش الدىندا ۇيىمداستىرىلعان شارا استانا قالالىق «چەرنوبىل وداعى» قوعامدىق بىرلەستىگىنىڭ باستاماسىمەن جۇزەگە استى. جيىن باسىندا قاتىسۋشىلار ەسكەرتكىشكە گۇل شوقتارىن قويىپ, قۇربانداردى ءبىر مينۋت ۇنسىزدىكپەن ەسكە الدى.
بىرلەستىكتىڭ توراعاسى قۋاندىق ومارباەۆتىڭ ايتۋىنشا, بۇل – الداعى ۋاقىتتا كەڭ كولەمدە اتالىپ وتىلەتىن مەرەيلى داتا شەڭبەرىندەگى العاشقى ءىس-شارا.
– مۇنداي باسقوسۋدىڭ ماقساتى – اپاتتىڭ زيانىن حالىققا جەتكىزىپ, ونىڭ الدىن الۋ, جاستاردى وتانشىلدىققا تاربيەلەپ, رۋحىن وياتۋ. سەبەبى, جارىلىستىڭ زاردابىن جويۋعا قاتىسقانداردىڭ اراسىندا كوزسىز ەرلىكتەر جاساعاندار وتە كوپ. بۇكىل ادامزاتقا ءتونگەن قاۋىپتىڭ بەتىن قايتارعان جانداردىڭ سونداي ارەكەتتەرىن كەيىنگى ۇرپاققا ناسيحاتتاۋ ءبىزدىڭ پارىزىمىز, – دەيدى قۋاندىق مۇحامەتجان ۇلى.
جالپى, «چەرنوبىل وداعى» رەسپۋبليكالىق زاڭدى تۇلعالار قاۋىمداستىعىنىڭ مۇرىندىق بولۋىمەن اپاتتىڭ 30 جىلدىعىنا بايلانىستى شارالار ەلىمىزدىڭ بارلىق ايماعىندا وتكىزىلەدى. بۇل جونىندە قاۋىمداستىق توراعاسىنىڭ ورىنباسارى مارات ءجۇنىس-بەك:
– قاۋىمداستىق باق وكىلدەرى اراسىندا ارنايى بايقاۋلار وتكىزىپ, ناسيحات جۇمىستارىنىڭ شەڭبەرىن كەڭەيتۋدى كوزدەپ وتىر. سونداي-اق, ارحيۆتەگى دەرەكتەرمەن جۇمىس ىستەپ, تىڭ دۇنيەلەردى جاريالاۋ دا جوسپارىمىزدا بار. اپات قۇرباندارى مەن ونىڭ زارداپتارىن جويۋعا قاتىسقاندار تۋرالى كەڭ مازمۇندى كىتاپ شىعارامىز. قازىرگى تاڭدا رەسپۋبليكالىق قاۋىمداستىققا مۇشە ايماقتارداعى 11 قوعامدىق بىرلەستىك اتالعان جۇمىستارعا دايىندىقتى باستاپ كەتتى, – دەدى.
شارا سوڭىندا ءبىر توپ چەرنوبىلدىك ارنايى ءتوسبەلگىلەرمەن جانە وردەندەرمەن ماراپاتتالدى.
ايتا كەتەيىك, 1986 جىلدىڭ 26 ساۋىرىندە سول كەزدەگى كسرو اۋماعىنداعى چەرنوبىل اەس-ىندە جارىلىس بولعانى بەلگىلى. ول XX عاسىرداعى ەڭ ءىرى تەحنوگەندىك اپات رەتىندە تىركەلدى. قاۋىپتىڭ الدىن الۋعا 30 مىڭنان استام قازاقستاندىق قاتىسىپ, كوپشىلىگى رادياتسيا سالدارىنان ءارتۇرلى دەرتكە شالدىقتى. بۇگىندە ولاردىڭ 6 مىڭعا جۋىعى عانا ورتامىزدا ءجۇر.
وسى اپاتقا بايلانىستى بۇۇ تمد ەلدەرى باسشىلارىنىڭ 26 ءساۋىردى حالىقارالىق رادياتسيالىق اپات جانە ءزىلزالا قۇرباندارىن ەسكە الۋ كۇنى دەپ جاريالاۋ تۋرالى شەشىمىن ماقۇلدادى.
ەلامان قوڭىر,
«ەگەمەن قازاقستان».
سۋرەتتى تۇسىرگەن
ورىنباي بالمۇراتوۆ.