انالار – ۇلتتىڭ بايلىعى
قىزىلوردا وبلىسى اكىمىنىڭ كەڭەسشىسى, وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ ءتورايىمى راحيما قارجاۋبايقىزى احمەتوۆا بۇگىنگى ايەل-انا تىرلىگى جايلى اڭگىمەلەيدى.
– اڭگىمەمىزدى وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا جۇمىسىنىڭ ماقساتىنان باستاساق.
– كوميسسيانىڭ نەگىزگى ماقساتى – وتباسى مەن ايەل, بالا مۇددەسىن قورعاۋ, قوعامدى دامىتۋعا مۇددەلى, پروگرەسشىل, ۇرپاق بولاشاعىنا جاناشىر, وي-ءورىسى كەڭ ايەلدەردىڭ قاتارىن كوبەيتۋ. وسى رەتتە وبلىسىمىزدا رەسپۋبليكادا العاش رەت ۇيدەن وقىلاتىن ءمۇمكىندىگى شەكتەۋلى بالالارعا ارنالعان ارنايى “مۇمكىندىگى شەكتەۋلى بالالاردى قاشىقتان وقىتۋ” پيلوتتىق باعدارلاماسى ازىرلەنگەنىن اۋىز تولتىرىپ ايتۋعا بولادى. قىزىلوردا قالاسىنداعى مۇمكىندىگى شەكتەۋلى 34 بالاعا نوۋتبۋك سىيعا بەرىلدى. بارلىعى ينتەرنەت جەلىسىنە قوسىلىپ, جىل بويىنا تەگىن پايدالانۋعا مۇمكىندىك الدى. سونداي-اق, بالالاردىڭ ءومىرىن جاقسارتۋ ماقساتىندا بالالار جانە سابيلەر ۇيىندە تاربيەلەنۋدەن وتباسىلىق تاربيەگە كوشىرۋ تاجىريبەسىن رەسپۋبليكادا ءبىرىنشى بولىپ باستادىق. قازىرگى تاڭدا 337 بالانى 258 وتباسى پاتروناتتىق تاربيەگە الدى. پاتروناتتىق تاربيەگە 2009 جىلى 98,0 ملن. تەڭگە, 2010 جىلى 106,7 ملن. تەڭگە قاراستىرىلعان.
وبلىستىق كوميسسيا كوپبالالى وتباسىلارىن, ۇلگىلى وتباسىلارىن ماراپاتتاۋ ماقساتىندا “وتباسىم – ماقتانىشىم”, “اكەم – اسقار تاۋىم, انام – ءمولدىر بۇلاعىم” اتتى مەرەكەلىك قابىلداۋلاردى, “اق جاۋلىق”, “انالار – ۋاقىت پەن قوعامنىڭ التىن كوپىرى” اتتى باتىر انالارمەن باسقوسۋلاردى وتكىزۋدى داستۇرگە اينالدىردى.
وبلىستىق كوميسسيانىڭ ۇيىمداستىرۋىمەن ۇلى جەڭىستىڭ 65 جىلدىعىنا وراي سوعىس جەسىرلەرىنە الەۋمەتتىك قولداۋ كورسەتۋ ماقساتىندا “41-ءشى جىلدىڭ قالىڭدىقتارى” اتتى قايىرىمدىلىق اكتسياسى وتكىزىلدى. وسى رەتتە “تورعاي پەترولەۋم”, “پەتروكازاحستان”, “قور” مۇناي كومپانيالارىنىڭ قولداۋىنىڭ ارقاسىندا 80 مەن 91 جاس ارالىعىنداعى 35 جەسىر انالارعا 350 مىڭ تەڭگەنىڭ كولەمىندە مەرەكەلىك سىيلىقتار تاپسىرىلدى.
وتباسىنىڭ تومەن تۇرمىسى, بالانىڭ ءتارتىبى, اتا-انانىڭ پارىزى نەگە ازاماتتان سۇرالمايدى؟ ۇيرەنگەن ادىسپەن بارلىعىنا ايەلدى توپەلەيمىز. بالكىم, سوندىقتان بولار وتباسىنىڭ بەدەلىنىڭ ءتۇسۋى دە سوندىقتان بولار. زەرتتەۋلەر كورسەتكەندەي, بۇگىنگى جاستاردىڭ ەلەۋلى بولىگى باتىس ەلدەرىنە ەلىكتەپ تىركەلمەگەن نەكەدە تۇرادى. دەموگرافيالىق جاعداي ناشارلاۋدا. كوپتەگەن وتباسى جۇپتارى ءبىر بالامەن شەكتەلەدى. وتباسىنداعى بالالار تاربيەسىندە اكەلەردىڭ ىقپالى ازايدى. وسىنداي كۇردەلى ماسەلەلەردىڭ شەشىلۋىنە اتسالىسۋ وبلىستىق كوميسسيانىڭ مىندەتتەرى دەپ بىلەمىز.
– ەلباسىمىزدىڭ تىكەلەي ىقپالىمەن كوپ بالالى انالارعا دەگەن قامقورلىق قولى سوزىلىپ تا كەلەدى ەمەس پە؟!
– ايەل-انا تۋرالى ايتقاندا, ەڭ الدىمەن ءوزىڭىز ايتقانداي, باتىر انالاردى اۋىزعا الامىز. بەتكە ۇستارىمىز دا – سول انالار. وبلىستا 8 مىڭنان استام كوپبالالى انالار بار, ونىڭ ىشىندە 4332-ءسى باتىر انا. ولاردىڭ اراسىندا ەڭبەك ەرلەرى شىرىنكۇل قازانباەۆا مەن ءساليما جۇمابەكوۆا سىندى باتىر انالاردى ءبىز ارقاشان ماقتان ەتەمىز.
سىر ەلى قاشاندا كوپبالالى وتباسىلارىنىڭ بەرەكەلى مەكەنى بولىپ ەسەپتەلگەن. بۇل ءداستۇر زاماننىڭ قيىندىقتارىنا قاراماستان, قازىر دە ساقتالۋدا. سوڭعى ءۇش جىل كولەمىندەگى مالىمەتتەرگە زەر سالساق, بالا تۋ كورسەتكىشى ەكى ەسەگە وسكەن. وتكەن جىلدىڭ قورىتىندىسى بويىنشا, وبلىستا 99699 بالا ومىرگە كەلىپتى. ال, ءۇستىمىزدەگى جىلدىڭ ءوتكەن بەس ايىندا تەك قىزىلوردا قالاسىندا عانا 2484 بالا دۇنيە ەسىگىن اشقان. ولاردىڭ دەنساۋلىعى, جالپى جاعدايى ايتارلىقتاي. سوڭعى كەزەڭدەرى انالاردىڭ ومىرگە ەگىز, ۇشەم اكەلۋى ءجيى كەزدەسۋدە. بۇل كۇندەرى وبلىستىڭ 5 جاس وتباسىندا ۇشەمدەر ءوسىپ كەلەدى. وتكەن جىلى ەگىز بوسانعان انالار سانى 54 بولسا, بيىلعى جىلدىڭ وسى مەرزىمىنە دەيىن 15 انا بولىپ تۇر. ۇشەمدەر مەن ەگىزدەردىڭ انالارىنىڭ جاس شاماسى 25-37 جاس ارالىعىندا. وسى رەتتە, وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا ايەلدەردىڭ ومىرگە ۇرپاق اكەلۋ, دەنساۋلىعىن ساقتاۋ جونىندە ءتۇرلى اقپاراتتىق-ناسيحاتتىق شارالار, اتاپ ايتقاندا, قوعامدىق تىڭداۋلار, دوڭگەلەك ۇستەلدەر, قايىرىمدىلىق اكتسيالار وتكىزەدى.
– بۇگىندە ايەلدەردىڭ بيلىككە, ساياساتقا, كاسىپكەرلىككە بەتبۇرىس جاساۋى بەلەڭ الىپ كەلەدى.
– وبلىستىڭ مەملەكەتتىك بيلىك ورگاندارىندا قىزمەت اتقاراتىن ايەلدەردىڭ ۇلەس سالماعى 46 پايىزدى قۇراعانمەن, ولاردىڭ 7 پايىزى عانا شەشىم قابىلداۋ دەڭگەيىنە كوتەرىلگەن. قازىرگى تاڭدا ەكى ايەل عانا اۋدان اكىمدەرىنىڭ ورىنباسارلارى. جەرگىلىكتى ءماسليحاتتار حاتشىلارى اراسىندا بىردە-ءبىر ايەل جوق. وسى ساتتە كوپ نارسە ايەلدەردىڭ وزدەرىنە بايلانىستى بولىپ تۇر. شىعىس مەنتاليتەتى دەيمىز بە, جوق, قازاق ايەلدەرىنە ءتان ۇياڭدىق دەيمىز بە, ايتەۋىر قازاق ايەلدەرىنىڭ اراسىنان اسا بەلسەندىلىك تانىتىپ, بيلىككە ۇمتىلاتىندارىنىڭ سانى جوقتىڭ قاسى دەۋگە بولادى. قوعامدا, مەملەكەتتىك بيلىك قۇرىلىمدارىندا ايەلدەردىڭ كوبىرەك بولۋى, بيلىكتىڭ بايىپتى بولۋىنا, بۇگىنگى قوعامنىڭ ەسكەرىلمەگەن, ءمان بەرىلمەي جۇرگەن پروبلەمالارىنىڭ شەشىلۋىنە جول اشاتىنى انىق. سوندىقتان ىسكە جانى اشيتىن ەر-ازاماتتار ءبىلىمدى, ساياسي ساۋاتتى, الەۋمەتتىك تۇرعىدان العاندا بەلسەندى ايەلدەردىڭ وسۋىنە ۇركە قاراماي, كەرىسىنشە, ولارعا قولداۋ كورسەتسە ودان قوعامىمىز ۇتپاسا, ۇتىلماسى انىق.
– سوڭعى ساۋال ءسىزدىڭ ويىڭىزشا, بۇگىنگى وتباسى, تاربيەسىندە ەسكەرىلمەي جاتقان جايت نە؟
– نەسىن جاسىرامىز, قازاق وتباسىندا اتا-انا ءوز بالالارىنىڭ سەزىمدەرىنە, جىنىستىق تاربيەسىنە كوڭىل بولمەيدى. بۇل تاقىرىپ قازاق وتباسىندا جابىق تاقىرىپ بولىپ ەسەپتەلەدى. ەسەسىنە, وسى ماسەلەلەرگە بايلانىستى قاجەتتى ء“بىلىمدى”, “تاجىريبەنى” جاستارىمىز سىرتتان جينايدى. سول سەبەپتەن بولار, ماحاببات سەزىمىنىڭ قۇنسىزدانىپ كەتكەنى, وتاۋ قۇرۋدا, ومىرلىك جارىن ىزدەۋدە جاستارىمىزدىڭ جاۋاپسىزدىق تانىتاتىنى.
تاعى ءبىر ايتا كەتەتىن جايت, وتباسىندا اكەنىڭ ءرولىن كۇشەيتۋ كەرەك. ولاي دەيتىنىم, “اكەڭنەن سۇرا”, “اكەڭ بىلەدى” دەپ تاربيەلەپ وتىرعان وتباسىنىڭ ءتالىمىن كورگەن قىز ەرتەڭ ەرىن, ۇل-قىزىن سىيلايتىن بولادى.
– اڭگىمەڭىزگە راحمەت.
اڭگىمەلەسكەن ەركىن ءابىل.
قىزىلوردا.
بىزدە دارىگەر ءبىر قىز بار
قازاقستان رەسپۋبليكاسىنىڭ پرەزيدەنتىنىڭ ءىس باسقارماسىنىڭ مەديتسينالىق ورتالىعىنىڭ ەمحاناسى كۇندىزگى ستاتسيونارلىق ءبولىمىنىڭ مەڭگەرۋشىسى, جوعارى دارەجەلى تەراپەۆت ايگۇل ىسقاقوۆا ەڭبەگىمەن العىس ارقالاعان دارىگەردىڭ ءبىرى. ول قاراعاندى مەملەكەتتىك مەديتسينالىق ينستيتۋتىنىڭ ەمدەۋ فاكۋلتەتىن بىتىرگەن. الاتاۋ باۋرايىنداعى “الماتى”, كوكشەتاۋ وڭىرىندەگى “وقجەتپەس” شيپاجايلارىندا دارىگەر, ءبولىم مەڭگەرۋشىسى, باس دارىگەردىڭ ورىنباسارى قىزمەتتەرىن اتقاردى. 2001 جىلى استانا قالاسىنا قونىس اۋدارىپ, ۇلتتىق عىلىمي مەديتسينالىق ورتالىقتا ەڭبەك ەتتى. ايگۇل قازاق قىزىنا ءتان يبالى مىنەزىمەن, مادەنيەتتى دە پاراساتتى قارىم-قاتىناس جاساۋ ارقىلى الدىنا كەلگەن ادامنىڭ كوڭىلىن كوتەرىپ, جان-جۇرەگىنە جىلىلىق ۇيالاتادى.
ايتا كەتۋ كەرەك, داۋلەت يلياسوۆ دەگەن ناعاشى اتاسى ايگۇلدىڭ كىشكەنتاي كەزىندە: “مەن مال دارىگەرى بولسام, ايگۇل بالام ادام ەمدەيتىن ءدارىگەر بولادى” دەپ ونىڭ ماماندىق تاڭداۋىنا ىقپال ەتىپتى. بۇعان قوسا اناسى مارال داۋلەتقىزى, ناعاشى اعاسى ابىلحاكىم اقماعامبەت ۇلى دا تانىمال دارىگەرلەر. اۋلەتكە باق-بەرەكە اكەلگەن ماماندىق ايگۇلدى دە ابىرويعا بولەپ كەلەدى. مەديتسينا عىلىمدارىنىڭ كانديداتى ءدارەجەسىن الۋ ءۇشىن عىلىمي جۇمىستارمەن اينالىسىپ جۇرگەن ىزدەنۋشى. 30-دان استام عىلىمي جۇمىسى مەن مەتوديكالىق ەڭبەكتەرى جارىق كورگەن. كوپتەگەن رەسپۋبليكالىق جانە حالىقارالىق كونفەرەنتسيالارعا قاتىسىپ, ءوزى زەرتتەپ جۇرگەن تاقىرىپ بويىنشا ءسوز سويلەپ ءجۇر. قازاقستان جانە رەسەيدىڭ تەراپەۆتەر مەن نەفرولوگتار اسسوتسياتسياسىنىڭ مۇشەسى, زاپاستاعى وفيتسەر.
قازىر ايگۇل قايروللاقىزى جەتەكشىلىك جاسايتىن بولىمدە بىلىكتىلىگى جوعارى ماماندار ەڭبەك ەتەدى. سونىڭ ىشىندە تاجىريبەلى مەدبيكەلەر مايرا جاڭبىرشينا, بيبىگۇل تەڭسەلباەۆالار ءوز ىسىنە ۇقىپتى قارايتىن جاندار. اتالعان ەمحانانىڭ جەكە ماماندارى دا ەمدەلۋشىلەرگە قاجەتتى كەڭەستى بەرىپ وتىرادى. كەڭ دە جارىق بولمە بىرنەشە بولىكتەرگە بولىنگەن. دەگەنمەن, ءاربىر ەمحانانىڭ كىشىگىرىم ءتۇيتكىلدى ماسەلەلەرى بولادى. مۇندا بولمەنىڭ تارلىق ەتىپ تۇرعانى بايقالادى. بارلىق ەمدەلۋشى ۇلكەن ءبىر بولمەدە جاتادى, دارىگەرلەردىڭ جۇمىس ورنى دا وسىندا.
– ءبىزدىڭ بولىمدە مەملەكەتتىك قىزمەتكەرلەر كۇندىزگى ۋاقىتتا ەم الادى. سونداي-اق, بۇل مەديتسينالىق دياگنوستيكا جۇرگىزۋگە ارنالعان ءبولىم. بۇل جەردە ەمدەلۋشىلەردىڭ كوكتامىرىنا تامشىلاتىپ ءدارى قۇيۋ, بۇلشىق ەتكە ەم سالۋ جۇمىستارى جۇرگىزىلەدى. مەملەكەتتىك قىزمەتكەرلەر ءۇشىن وتە ءتيىمدى ەم الۋ ورنى. ءبىر جاعىنان ۋاقىت ۇتاتىن بولسا, ەكىنشىدەن, ەكونوميكالىق تۇرعىدان ءتيىمدى. ءارى جاۋاپتى قىزمەتتەگى ادامداردىڭ اۋرۋحانادا جاتپاي-اق, ارنايى دەمالىس الماستان ەمدەلۋى ءۇشىن ۇيىمداستىرىلعان. ءار ادامنىڭ دەنساۋلىعىنا بايلانىستى ءبىر اپتالىق نەمەسە ون كۇندىك ەمدەلۋ پايىزىن بەلگىلەيمىز. بىزدە مۋزىكا تەراپياسى دا قولدانىلادى. ادامدار ءارى ەم قابىلداپ جاتسا, ەكىنشى جاعىنان نەرۆ جۇيەسى دە تىنىعادى, – دەيدى ا.ىسقاقوۆا.
شىنىمەن دە, ەمحانا استانانىڭ سول جاعالاۋىندا ورنالاسقاندىقتان, بارلىق مەملەكەتتىك اكىمشىلىك ورگاندارعا دا جاقىن. ايتالىق, قىزمەتتەگى ادام كەيبىر اۋرۋىنا جەڭىل-جەلپى قاراپ, ەمدەلمەي جۇرە بەرەدى. اۋرۋحاناعا جاتقىسى كەلمەيدى. سوندايدا كۇندىزگى ءبولىم ولارعا كومەككە كەلەدى. بۇل اۋرۋدىڭ الدىن الۋمەن اينالىساتىن ءبولىم دەسەك, قاتەلەسپەيمىز. كۇن سايىن 35-40 ادام ءبىر ۋاقىتتا كەلىپ, ەمىن الىپ تۇرادى. ولار دارىگەرلەردىڭ قىزمەتىنە قۇرمەتپەن قارايدى. بويىنا قۋات العاندار اق جەلەڭدى ابزال جاندارعا ءاردايىم العىس ايتىپ, ريزاشىلىقتارىن ءبىلدىرىپ جۇرگەنىن ايتا كەتكەنىمىز ءجون.
ايباتىر سامىعوللا ۇلى, جۋرناليست.
استانا
باقىت دەگەنىمىز – بالانىڭ كۇلكىسى
دەيدى 38 جاسىندا “التىن القا” يەگەرى اتانعان ۇستاز-انا
ايەل-انا باقىتى دەگەن ۇعىم ءجيى ايتىلادى. وسى ءسوزدىڭ جالپى ماعىناسىنا وي جىبەرسەك, ونىڭ ۇشى-قيىرىنا جەتە الماسىڭ انىق. بۇل “باقىتتىڭ” بەلگىلى فورمۋلاسى, ءتۇرى مەن سيپاتى جوقتىعىنان بولار. دەمەك, ونى ايتۋ بار دا, ءتۇسىنۋ مەن ءتۇيسىنۋ جاعى باسقا. تاعدىردىڭ سىيىمەن ءومىر ءسۇرۋ, ونىڭ قيىندىعى مەن قىزىعىن كورۋدىڭ ءوزى دە باقىت ەكەنىن كوبىنە بىلە بەرمەيمىز. پايعامبارىمىزدىڭ حاديستەرىندە پەندەنىڭ تاقۋالىعى, ومىرگە دەگەن قۇشتارلىعى, ءبىر-بىرىنە دەگەن ادامي بيىك قاسيەتتەرىمەن ولشەنەتىنى ايتىلعان دەسەك, گۇلميرا يمانعاليەۆا شاڭىراعىن شاتتىققا بولەگەن ون ءبىر شىراعىنىڭ ورتاسىنداعى ءار ساعاتىن باقىتقا بالايدى, ەشبىر يگىلىكتەرمەن ولشەمەيدى.
قوس بۇرىمىن ساندەپ ءورىپ, ارمان قۋعان جاستىق شاعى بۇگىنگىدەي ەسىندە. پانفيلوۆ اۋدانىنداعى قوڭىرولەڭ ورتا مەكتەبىن ۇزدىك اياقتاعانداعى ارمانى دا اسقاق ەدى. بىردەن قازمۇۋ-ءنىڭ زاڭ فاكۋلتەتىنىڭ كەشكى بولىمىنە وقۋعا قابىلدانىپ, قارا قىلدى قاق جارعان زاڭگەر بولۋ ءۇشىن ستۋدەنتتىك كۇندەرىن باستاعان. قىزىنىڭ ەرتەڭگى كۇنىنە الاڭداعان كەيۋانا تۇنگى وقۋدى قالامادى. اناسىنىڭ دەگەنىنە كونگەن ول كەلەسى جىلى تاعى دا باعىن سىناۋ ءۇشىن اۋىلعا قايتا ورالادى.
تاعدىر دەگەن جازىلماعان كىتاپ. سول كەزدە ءومىرىنىڭ باسقا ارناعا بۇرىلاتىنىن گۇلميرا ءۇش ۇيىقتاسا دا ويلاماپتى. سارىتوبەلىكتەر دە ونىڭ العان بەتىنەن قايتپايتىن وتكىرلىگىنە, ەڭبەكقورلىعىنا سەنىپ “تۇبىندە وسى قىزدان جاقسى مامان شىعادى” دەپ سەنىم ارتقانىن دا ءالى كۇنگە ايتادى.
جاقسىعا كىم كوز سالماعان. قىزعا سىرتىنان قىزىققان چەشەن جىگىتى سۋلايمان ونى الىپ قاشىپ, شاڭىراعىنا كەلىن عىپ تۇسىرەدى. وزگە وتباسىنىڭ تابالدىرىعىن اتتاعان ونىڭ الدىندا ەكى تاڭداۋ – ءبىرى ءۇيىنە قايتا ورالۋ, ەكىنشىسى تۇسكەن شاڭىراعىنىڭ ءتۇتىنىن ءتۇزۋ شىعارۋ. قازاق قىزىنىڭ يبالىعى مەن تابالدىرىق اتتاعاننان كەيىنگى جاۋاپكەرشىلىگىن سەزىنگەندىكتەن, وزگە ۇلت وتباسىنداعى ونىڭ ءومىرى وسىلاي جالعاسىپتى.
قۋعىن-سۇرگىننىڭ قۇربانى بولىپ, قازاقتاردىڭ قوناقجايلىلىعى ارقاسىندا سارىتوبەلىكتەرگە باۋىر باسقان اتاسى حاساننىڭ ۇلتىمىزعا دەگەن ەرەكشە ىقىلاسى مەن تىلىمىزگە دەگەن قۇرمەتىن سەزىنە وتىرىپ, وتباسىنداعى ايەل قاۋىمىنا دەگەن تالاپپەن كەيبىر قاتاڭ سالت-ءداستۇردى جەڭىپ, ءبىر كەزدەرى الدىنا قويعان ماقساتىنا جەتۋ ءۇشىن تالپىنعان. وسىلايشا ومىرگە ءسابي اكەلە ءجۇرىپ, جاركەنتتەگى پەداگوگيكالىق ۋچيليششەنىڭ مەكتەپكە دەيىنگى ءبولىمىن ءبىتىرىپ, ەڭبەكتەن دە قول ۇزبەيدى.
جاس كەلىنشەك ءبىلىمىن ودان ءارى جەتىلدىرۋ ماقساتىندا الماتىداعى قىزدار پەداگوگيكالىق ۋنيۆەرسيتەتىنە 1991 جىلى سىرتتاي وقۋعا ءتۇسىپ, 1997 جىلى وتباسىنا جەتىنشى بالاسى كەلگەندە ديپلوم العان ول جاس ۇرپاق تاربيەسىنە بەلسەنە ارالاسىپ, تاجىريبەسىن ودان ءارى تولىقتىرادى.
– باقىتتى – بالالارىمنىڭ دەنى ساۋ, جاقسى ءبىلىم الىپ, قوعامنان ءوز ورنىن تاپقانىمەن ولشەيمىن. ەلىمىزدە كوپ بالالى انالارعا بارلىق جاعداي جاسالعان. سوعان وراي ولاردى ەڭبەكقور, كىشىپەيىل ەتىپ, ادالدىققا تاربيەلەۋ اتا-اناعا ۇلكەن مىندەت جۇكتەيتىنىن بىلەمىن. تۇڭعىشىم ميلانا تالدىقورعان قالاسىنداعى ءىلياس جانسۇگىروۆ اتىنداعى ۋنيۆەرسيتەتتىڭ پسيحولوگيا فاكۋلتەتىندە, ۇلىم رۋسلان جاركەنتتەگى گۋمانيتارلىق-تەحنيكالىق كوللەدجدى ءبىتىرىپ, ەڭبەك جولىن باستادى. ديانام الماتى قىزدار پەداگوگيكالىق ۋنيۆەرسيتەتىنىڭ بيولوگيا فاكۋلتەتىنە گرانتپەن وقۋعا قابىلدانىپ, ءبىلىم الۋدا. ناياتىم مەديتسينالىق كوللەدجدە, زەلىمحان №18 كاسىپتىك مەكتەپتە دانەكەرلەۋشى ماماندىعىن يگەرۋدە. ءبارى دە وقۋدا وزات. ولارعا ءوز ەلىن ءسۇيىپ, ونىڭ جارقىن بولاشاعى ءۇشىن ەڭبەك ەتۋ قاجەتتىگىن تۇسىندىرەمىن. وتباسىمىزدا ءبىر-بىرىمىزبەن قازاقشا سويلەسىپ, مەملەكەتتىك ءتىلدى ولاردىڭ جەتىك مەڭگەرۋىنە ەرەكشە نازار اۋدارۋدامىز, دەدى ۇستاز-انا.
ءيا, ايتسا ايتقانداي, 38 جاسىندا ون ءبىر بالانىڭ اناسى بولعان گۇلميرا تالاي قيىندىقتارعا كەزدەسىپ, بويىنداعى جىگەرلىلىگى ارقاسىندا باقىت دەگەن ءسوزدىڭ شۋاعىنا شومىلىپ كەلەدى. “التىن القالى” انا وبلىس اكىمى سەرىك ۇمبەتوۆكە جاعدايىن ايتىپ حات جولداسا, ماسەلە وڭ شەشىلىپ, جاركەنت قالاسىنداعى كوممۋنالدىق پاتەردەن كەڭ, ءارى جارىق باسپانا الۋىن ول ومىردەگى ۇلكەن قۋانىش دەپ قابىلداپتى. سونىمەن قاتار باسقا دا الەۋمەتتىك قاجەتتىلىكتەر شەشىمىن تاۋىپ كەلەدى.
“التىن القالى” انا قازىرگى كەزدە №6 مەكتەپ-ينتەرناتتا ورىس ءتىلى مەن ادەبيەتىنەن ساباق بەرەدى. ۇستاز شاكىرت جۇرەگىنە جول تاۋىپ, ءاردايىم ولاردىڭ ورتاسىنان تابىلۋدا. ءار بالانىڭ ومىرگە دەگەن كوزقاراسىنىڭ قالىپتاسۋىنا قوسىپ جۇرگەن انانىڭ, ۇستازدىڭ ۇلەسى دە مول. سونىمەن قاتار, ول بالالارىنىڭ باقىتى ءۇشىن كەزدەسكەن قيىندىقتاردى جەڭىپ, الداعى كۇندەرىنە ۇلكەن ۇمىتپەن قارايدى.
باقىت دەگەن كيەلى ءسوزدىڭ ماعىناسىن تەرەڭ ءتۇسىنىپ, ونى ءوز ومىرىمەن بايلانىستىرادى. ءار ادامنىڭ جانىندا كۇندەلىكتى بىرگە جۇرەتىن شۋاقتى شاعى بولاتىنىن وزگەلەرگە جەتكىزۋدى وتىنەدى. ايەل قاۋىمىنىڭ قولىنداعى بەرەكە مەن بىرلىك بىرىككەندە باقىتقا بالاناتىنىن دا جاسىرمايدى.
كۇمىسجان بايجان,
الماتى وبلىسى.