كۇندەلىكتى ءومىر مەن تۇرمىستا ءارتۇرلى وقىس وقيعالار بولماي تۇرمايدى. تومەندەگى جايتتى دا سونىڭ قاتارىنا قوسقانىمىز ءجون. ورال قالاسىنداعى قۇرمانعازى كوشەسىنىڭ بويىندا ورنالاسقان ۇيلەردىڭ بىرىنەن قالالىق پەرزەنتحانانىڭ قابىلداۋ بولمەسىنە شۇعىل قوڭىراۋ شالىنادى.
ويتكەنى, وسىندا تۇراتىن جاس انانى تولعاق قىسىپ جاتىر ەكەن. قۇرامىندا دارىگەر جانە مەدبيكە بار جەدەل جاردەم توبى جوعارعى قاباتقا كوتەرىلەدى. ليفت زىرىلداپ جاقسى جۇمىس جاساپ تۇر ەكەن. كوپ كەشىكپەي تولعاق قىسقان انامەن بىرگە تومەن ءتۇسۋ ءۇشىن قايتادان ءبارى ليفتىگە كىرەدى.
ايتسە دە, ءدال وسى ساتتە ليفت ىستەن شىعىپ كەنەت توقتاپ قالادى دا ولار سونىڭ ىشىندە «قامالادى». ونىڭ ءىشى كوزگە تۇرتسە كورگىسىز, تاس تۇنەك قاراڭعىلىق ەكەن. توتەنشە جاعدايلار جونىندە وبلىستىق دەپارتامەنتتىڭ جەدەل قۇتقارۋشىلار توبىنا حابار بەرىلگەننەن كەيىن ولار وقيعا ورنىنا تەز جەتەدى. قۇتقارۋشىلار ارناۋلى كىلتتىڭ كومەگىمەن ءليفتىنىڭ قاۋسىرمالى ەسىگىن اشقان كەزدە ەسىك قابى تولعاتقان انا ۇستىنە تۇسەدى. ايتسە دە ونىڭ قاسىندا دارىگەر مەن ورتا مەديتسينا قىزمەتكەرى بولۋى وقيعانىڭ زارداپسىز اياقتالۋىنا اسەرىن تيگىزگەن. قۇتقارۋشىلارعا شۇعىل كومەگى مەن كاسىبي شەبەرلىگى ءۇشىن جەدەل جاردەم دارىگەرلەرى شىنايى ريزاشىلىعى مەن العىس سەزىمدەرىن ءبىلدىردى.
تەمىر قۇسايىن,
«ەگەمەن قازاقستان».
ورال.