الماتى. 15 مامىر. قازاقستان رەسپۋبليكاسىنىڭ تۇڭعىش پرەزيدەنتى – ۇلت كوشباسشىسى قورىنىڭ ۇيىمداستىرعان XI «الەۋمەتتىك يدەيالار جانە جوبالار جارمەڭكەسى - 2015» بايقاۋى اياقتالدى. بۇل تۋرالى egemen.kz ءتىلشىسى حابارلادى.
بايقاۋعا 185 ۇكىمەتتىك ەمەس ۇيىمنان 203 الەۋمەتتىك جوبا كەلىپ تۇسكەن. قازىلار القاسى قوردىڭ قارجىلاي قولداۋىنا يە بولاتىن 4 نوميناتسيا بويىنشا 23 ۇزدىك جوبانى تاڭداپ الدى.
ايتا كەتەيىك, اتالعان جارمەنكە قوردىڭ قولداۋىمەن 2008 جىلدان باستاپ وتكىزىلىپ كەلەدى. وسى ۋاقىت ىشىندە وعان قازاقستاننىڭ بارلىق ايماقتارىنان 5 مىڭنان استام ۇكىمەتتىك ەمەس ۇيىم قاتىسقان.
بايقاۋدىڭ ماقساتى ەلىمىزدە ورىن الىپ وتىرعان الەۋمەتتىك ماڭىزدى پروبلەمالاردىڭ شەشۋ جولدارىن ۇسىنعان ۇكىمەتتىك ەمەس ۇيىمدار مەن باسقا دا قاتىسۋشىلاردىڭ جوبالارىن انىقتاپ, ولاردى كارجىلاندىرۋ. سونداي-اق, قور ەسەبىنەن ءاربىر سانات بويىنشا ۇزدىك جوبانى تاڭداپ جانە ىسكە اسىرۋ ءۇشىن گرانت ءبولۋ.
بيىلعى وتكىزىلگەن جارمەڭكەدە جاڭادان باستاۋ العان ۇيىمداردىڭ جوبالارى ستارتاپ رەتىندە 1 ميلليون تەڭگە مولشەرىندە قارجىلاندىرىلدى. ال تاجىريبەسى بار قاتىسۋشىلاردىڭ جوبالارىنا 3 ميلليون تەڭگە كولەمىندە قارجى بولىنبەك.
ايناش ەسالي
دەرەك, سۋرەت: egemen.kz.