بەيسەنبىدەن جۇماعا قاراعان ءتۇنى مەحيكوداعى ايگىلى «اتستەكا» ستاديونىندا فۋتبولدان ءححىىى الەم چەمپيوناتىنىڭ شىمىلدىعى ءتۇرىلدى. العاشىندا وسى جەردە جارىستىڭ اشىلۋ سالتاناتى ءوتتى. كەرەمەت شوۋعا ۇلاسقان شارا, جانتەبىرەنتەرلىك رەسمي ءراسىم, تاريحي ءتۋرنيردىڭ تۇساۋكەسەر كەزدەسۋىن تاماشالۋعا جانكۇيەر كوپتەپ جينالدى. 87 500 كورەرمەندى سىيدىرا الاتىن الىپ ستاديوندا ينە شانشار ورىن بولمادى.
ءدۇبىرلى دوپ دوداسىنىڭ العاشقى باسەكەسى مەكسيكا مەن وڭتۇستىك افريكا رەسپۋبليكاسى (وار) قۇرامالارى اراسىندا ءوتتى. ءبىر قىزىعى, بۇل كوماندالار وسىدان 16 جىل بۇرىن الەم چەمپيوناتىنىڭ تۇساۋكەسەر كەزدەسۋىندە كۇش سىناسقان ەدى. اتالعان جارىستىڭ 2010 جىلى افريكا قۇرلىعىندا ۇيىمداستىرىلعانىن جانكۇيەر- لەر جاقسى بىلەدى. وار استاناسى – يوحاننەسبۋرگتە وتكەن سول باسەكەدە تەڭ ەسەپ تىركەلدى – 1:1. مىنە, ەندى اراعا جىلدار سالىپ, ولاردىڭ جولى قايتا قيىستى.
«اتستەكاداعى» ايقاس باستالعان بەتتە راۋل حيمەنەستىڭ الاڭ يەلەرىن العا شىعارۋعا جاقسى مۇمكىندىگى بولدى. بىراق ونىڭ شىرەنە تەپكەن دوبىن رونۆەن ۋيليامس بۇرىشتاماعا بۇرىپ جىبەردى. كوپ كەشىكپەي بيىلعى چەمپيوناتتاعى العاشقى گولدىڭ قالاي سوعىلعانىن كوردىك. 9-مينۋتتا ءدال قاقپانىڭ الدىندا ورتالىق قورعاۋشىنىڭ اياعىنداعى دوپتى تارتىپ العان حۋليان كينونەس قاقىراتا سوققى جاسادى – 1:0.
ەكىنشى كەزەڭ باستالعاندا قارسى باعىتتاعى قاقپاعا قۇيىنداي جۇيتكىپ بارا جاتقان شابۋىلشىنى ەرەجەدەن تىس تاسىلمەن توقتاتقان يايا سيتحولەگە برازيليالىق تورەشى ۆيلتون سامپايو قىزىل قاعاز كورسەتتى. بۇل جاعداي ولارعا قيىنعا سوقتى. ونسىز دا ويىنى جۇرمەي جاتقان وار-دىڭ ودان كەيىن بەرەكەسى قاشتى. 67-مينۋتتا حيمەنەس اقىرى دەگەنىنە جەتىپ, ەكىنشى گولدىڭ اۆتورى اتاندى – 2:0. ماتچتىڭ سوڭىنا قاراي تاعى ەكى ويىنشى الاڭنان قۋىلدى. ولار – افريكالىق تحەمبا زۆانە مەن مەكسيكالىق سەسار مونتەس. ال تابلدوداعى ەسەپ وزگەرىسسىز قالدى.
تاڭ اتا «ا» توبىنداعى كەلەسى كوماندالار – وڭتۇستىك كورەيا مەن چەحيا قۇرامالارى ساپوپانداعى ستاديوندا جاسىل الاڭعا شىقتى. ءبىرىنشى تايمدا قوس كوماندا قانشا جانتالاسقانىمەن, ءبىر-ءبىرىنىڭ قاقپا كىلتىن تابا المادى. ناعىز «قىزىق» ۇزىلىستەن كەيىن باستالدى. تولاسسىز شابۋىلداردان كەيىن ۆلاديسلاۆ كرەيچي 59-مينۋتتا ەسەپ اشتى – 0:1. بىراق بۇل جاعداي ازيالىقتاردى قاناعاتتاندىرمادى. ولار دەرەۋ العا ۇمتىلدى. ەرەن ەڭبەك ەش كەتكەن جوق. ارادا 8 مينۋت وتكەندە حۆان ين بوم تارازى باسىن تەڭەستىرسە, 80-مينۋتتا و حەن گيۋ ءوز كومانداسىنا جەڭىس سىيلادى – 2:1.
ءسويتىپ, «ا» توبىندا 3 ۇپايدان ولجالاعان مەكسيكا مەن وڭتۇستىك كورەيا فۋتبولشىلارى العا شىقتى. وار مەن چەحيانىڭ قورجىنى بوس. كەشە تۇندە كورەرمەندەر «ۆ» توبىنداعى كانادا – بوسنيا مەن گەرتسەگوۆينا قۇرامالارى اراسىنداعى ويىندى تاماشالادى. بۇگىن «D» توبىنداعى اقش پەن پاراگۆاي, اۋستراليا مەن تۇركيا كۇش سىناسادى.