شاعان شىڭى شىڭدادى

تاڭعى سالقىنمەن باس­تالعان فەستيۆالعا ءار وڭىردەن كەلگەن سپورتشىلار, تۋريستەر, جاستار, وتباسىلار جينالدى. تاۋدىڭ ەتەگىن ەرەكشە سەرگەكتىك پەن كوتەرىڭكى كوڭىل كۇي كەرنەدى. قاتىسۋشىلاردى وبلىس اكىمىنىڭ ورىنباسارى مارلەن كولباەۆ قۇتتىقتاپ, فەستيۆالدىڭ ماڭىزىنا توقتالدى.

«Shagan Fest» – ادامنىڭ تابيعاتپەن بايلانىسىن تەرەڭ­دەتەتىن, تاۋ ءتۋريزمىن دامىتۋعا سەرپىن بەرەتىن ەرەكشە جوبا. وسىنداي شارالار ارقىلى جاس­تاردى بەلسەندى ءومىر سالتىنا باۋلىپ قانا قويماي, تۋعان جەردىڭ تابيعاتىن قادىرلەۋگە ۇندەيمىز. بۇگىنگى ءىس-شارا – تەك شىڭعا شىعۋ ەمەس, ەرىك-جىگەردى شىڭداۋ, بىرلىكتى نىعايتۋ, ءوز مۇمكىندىگىڭدى سىناۋ. جەتىسۋدىڭ تابيعاتى – حالقىمىزدىڭ باعا جەتپەس بايلىعى. ونى قورعاۋ – ءبارىمىزدىڭ ورتاق مىندەتىمىز»,  دەدى ول.

شىنىندا, وڭىردە كەيىنگى جىلدارى تاۋ ءتۋريزمى قارقىندى دامىپ كەلەدى. بۇعان وبلىستىڭ تابيعي الەۋەتى, كوركەم تاۋلارى, تازا اۋاسى مەن بىرەگەي لاندشافتارى ۇلكەن مۇمكىندىك بەرىپ وتىر. جوڭعار الاتاۋىنىڭ باۋرايىنداعى كورىكتى شاتقالدار, بيىك شىڭدار, سارقىراعان وزەندەر مەن الپىلىك شالعىندار جەرگىلىكتى تۇرعىنداردىڭ پاناسىنا اينالدى. ءتىپتى ەلىمىزدىڭ تۇكپىر-تۇكپىرىنەن كەلەتىن ساياحاتشىلاردىڭ قىزىعۋ­شىلىعىن ارتتىرىپ وتىر. اسىرەسە «Shagan Fest» سەكىلدى اۋقىم­دى فەستيۆالداردىڭ ۇيىم­داستىرىلۋى ايماقتاعى تاۋ ءتۋريزمىنىڭ جاڭا دەڭگەيگە كوتە­رىلگەنىن كورسەتەدى.

«بىزگە بۇل ۇلكەن جاڭالىق بولدى. فيتنەس-ستۋديادا جاتتىعىپ جۇرگەندە فەستيۆال تۋرالى ەستىدىك. العاشىندا ازداپ قوبالجىدىق. بىراق ۇيىمداستىرۋشىلار قا­ۋىپ­سىزدىك ەرەجەلەرىن ەگجەي-تەگجەيلى ءتۇسىندىرىپ, باعىت جو­نىندە نۇسقاۋلىق وتكىزدى. جول بويىنداعى تابيعاتتىڭ سۇلۋلىعى شارشاعانىڭدى ۇمىتتىرادى ەكەن. شىڭعا جەتكەن ساتتەگى سەزىمدى سوزبەن جەتكىزۋ قيىن», دەيدى رەسەيلىك ساياحاتشى اندرەي اسيتوۆ.

فەستيۆالدىڭ باستى با­سىمدىعى – ونىڭ كوپشىلىككە قولجەتىمدىلىگىندە. جالپى ۇزىندىعى شامامەن 13 شاقى­رىمدى قۇرايتىن مارشرۋت كوركەم تابيعاتىمەن عانا ەمەس, سالىستىرمالى تۇردە جەڭىل سوقپاعىمەن دە ەرەكشەلەنەدى. سول سەبەپتى تاجىريبەلى الپينيستەرمەن قاتار, بالالارىن ەرتكەن وتبا­سىلار, ەگدە جاستاعى تۇرعىندار دا قالىس قالمادى. 

جول بويىندا قاتىسۋشىلاردى تاڭعاجايىپ كورىنىستەر قارسى الدى. بيىكتەگەن سايىن كوكجيەككە سوزىلعان جوتالار, سامال جەلمەن تەربەلگەن ءالپى شالعىندارى مەن بۇلتقا ورانعان اسقار شىڭدار ەرەكشە اسەر سىيلادى. تابيعاتتىڭ تىنىسىن سەزىنگەن ءار ادام ءۇشىن بۇل ساپار فيزيكالىق سىناقتان بۇرىن رۋحاني سەرپىلىسكە اينالدى. فەستيۆالعا قاتىسقان سپورت ارداگەرى, «Temiradam» اتاعىنىڭ بەس دۇركىن يەگەرى باقىتجان بەكتەنوۆ شاعانعا كوتەرىلۋدىڭ ءمانى ەرەكشە ەكەنىن ايتتى.

«تاۋ ادامدى تاربيەلەيدى. بيىككە كوتەرىلگەن سايىن سەن ءوزىڭنىڭ السىزدىگىڭدى جەڭەسىڭ, ەرىك-جىگەرىڭدى شىڭدايسىڭ. مۇنداي فەستيۆال­دار جاستاردى سپورتقا باۋ­ليدى, تابيعاتتى سۇيۋگە ۇيرەتەدى. ءار شىڭ – جاڭا ومىرلىك ماقساتتىڭ بەلگىسى. سوندىقتان بۇگىنگى جورىق ءار ادامعا كۇش-قۋات, شابىت سىيلايدى دەپ سەنەمىن. ونىڭ ۇستىنە, جەتىسۋدىڭ تاڭعاجايىپ تابيعاتىن الەمگە پاش ەتۋگە تاپتىرماس مۇمكىندىك», دەدى ول.

تاۋ ءتۋريزمىنىڭ دامۋى ءوڭىر ەكونوميكاسىنا دا سەرپىن بەرەتىنى داۋسىز. بۇل سالا شاعىن جانە ورتا بيزنەستىڭ دامۋىنا, جاڭا جۇمىس ورىندارىنىڭ اشىلۋىنا ىقپال ەتەدى. جەرگىلىكتى تۇرعىندار قوناقۇي, تاماقتانۋ, گيد قىزمەتى, ۇلتتىق ونىمدەر ساتۋ سياقتى كاسىپتەردى دامىتىپ, تۋريزم ارقىلى تابىس تابۋعا مۇمكىندىك الىپ وتىر. وعان دالەل رەتىندە تالدىقورعان جوعارى پوليتەحنيكالىق كوللەدجىنىڭ وقىتۋشىسى اندرەي گەرمان مىنانداي قىزىق وقيعاسىمەن ءبولىستى.

«بۇل جەرگە ەكىنشى رەت كەلىپ وتىرمىن. وسىنداي فەستي­ۆالداردىڭ اتموسفەراسى مۇلدە بولەك بولادى. مۇندا ادامدار ورتاق ماقساتپەن جينالادى. ءبىرى سپورتتى باعىت تۇتىپ كەلسە, ءبىرى تابيعات اياسىندا دەمالۋدى قالايدى. بىراق ءبارىن بىرىكتىرەتىن نارسە – تاۋعا دەگەن سۇيىسپەنشىلىك. بۇعان دەيىن شەتەلدىك دوستارىممەن وسىندا 3-4 كۇن قونىپ, سەرۋەندەگەنبىز. جەرگىلىكتى شارۋالاردىڭ قىمى­زىن ءىشىپ, قۇرت-مايىن ساتىپ الىپ, دوستارىممەن قازاقتىڭ داستۇرىنە قانىققانبىز. تاۋعا بىرگە كوتەرىلۋدىڭ ءوزى ادامدى جاقىنداستىرادى», دەيدى ول.

فەستيۆال بارىسىندا تەك سپورتتىق بەلسەندىلىكپەن شەكتەلمەي, قاتىسۋشىلارعا ءتۇرلى مادەني, ويىن-ساۋىق الاڭدارى ۇيىمداستىرىلدى. اشىق اسپان استىنداعى كاراوكە الاڭى, ارنايى فوتوزونالار, دەمالىس ورىندارى كوپشىلىكتىڭ كوڭىلىنەن شىقتى. شىڭ باسىنا جەتكەن ءاربىر قاتىسۋشىعا ارنايى مەدال تابىس­تالىپ, ەستەلىك رەتىندە ەرەكشە سىي جاسالدى.

ءىس-شاراعا تۋريستىك ۇيىمدار مەن كلۋبتار دا بەلسەندى اتسالىستى. اتاپ ايتقاندا, «يستو­كي», «جوڭعاريا» تۋريستىك كلۋب­تارىنىڭ تاربيەلەنۋشىلەرى جاس تۋريستەرگە باعىت-باعدار بەرىپ, جورىق مادەنيەتىن ناسيحاتتادى. ۇيىمداستىرۋشىلاردىڭ ايتۋىنشا, مۇنداي كلۋبتاردىڭ قاتىسۋى جاستار اراسىندا تاۋ تۋريزمىنە دەگەن قىزىعۋشىلىقتى ارتتىرا تۇسەدى.

ودان كەيىن فەستيۆالدىڭ ماڭىزدى بولىگى ەكولوگيالىق اكتسيامەن جالعاستى. «جەتىسۋ جاستارى» كمم ديرەكتورىنىڭ مىندەتىن اتقارۋشى ارناي بايجۇرىنوۆ باستاعان ەرىكتىلەر تاۋ بوكتەرىن قوقىستان تازارتۋعا كىرىستى.

«تابيعات بىزگە سۇلۋلىق پەن قۋات بەرەدى. سوندىقتان ونى تازا ساقتاۋ – ءار ازاماتتىڭ پارىزى. ءبىز بۇگىن تەك شىڭدى باعىندىرىپ قانا قويماي, تابيعاتتى قورعاۋدىڭ ناقتى ۇلگىسىن كورسەتىپ وتىرمىز. ەكولوگيالىق مادەنيەت وسىنداي ارەكەتتەردەن باستالادى», دەدى ول.

شاعان شىڭىنا كوتەرىلگەن جۇزدەگەن ادامنىڭ جۇزىنەن قۋانىش پەن ماقتانىش سەزىمى انىق بايقالدى.  سەبەبى «Shagan Fest 2026» فەستيۆالى جەتىسۋدىڭ تۋريستىك الەۋەتىن تاعى ءبىر مارتە كورسەتتى. ايبىندى تاۋلار مەن كوركەم تابيعات اياسىندا وتكەن شارا ىشكى ءتۋريزمدى دامىتۋعا سەرپىن بەرىپ, ادامداردىڭ تۋعان جەرگە دەگەن سۇيىسپەنشىلىگىن ارتتىردى. شاعان شىڭى تاعى دا تالاي جاننىڭ ارمانىن اسقاقتاتىپ, جاڭا بەلەستەرگە جەتەلەيتىن رۋحاني مەكەن بولارى ءسوزسىز.

بۇگىندە جەتىسۋ تاۋلارى – تابيعات, ساياحاتسۇيەر قاۋىمنىڭ قالاۋلى, تارتىمدى باعىتى. الداعى ۋاقىتتا حالىقارالىق دەڭگەيدەگى فەستيۆالدار مەن تۋريستىك جوبالاردىڭ كوبەيۋى ءوڭىردىڭ الەۋەتىن ودان ءارى ارتتىرا تۇسەدى. جەتىسۋدىڭ اسقار تاۋلارى تەك تابيعاتتىڭ كوركى ەمەس, ەل ءتۋريزمىنىڭ دامۋىنا جول اشاتىن ماڭىزدى ورتالىقتاردىڭ بىرىنە اينالادى.

جەتىسۋ وبلىسى