قازاقستان مەن ارمەنيا اراسىندا جاڭا اۋە رەيستەرى ىسكە قوسىلدى. ەندى ەل تۇرعىندارى الماتىدان ەرەۆانعا تىكەلەي قاتىناي الادى, دەپ حابارلايدى Egemen.kz.
كولىك مينيسترلىگىنىڭ مالىمەتىنشە, 12 ماۋسىمنان باستاپ قازاقستاننىڭ اۋە تاسىمالى نارىعىنا ارمەنيانىڭ جاڭا اۋە كومپانياسى – «FlyOne Armenia» قوسىلدى.
اۋە تاسىمالداۋشى ەرەۆان – الماتى باعىتى بويىنشا اپتاسىنا ەكى رەت, دۇيسەنبى جانە جۇما كۇندەرى تىكەلەي تۇراقتى جولاۋشىلار رەيستەرىن ورىندايدى. سونىڭ ناتيجەسىندە قازاقستان مەن ارمەنيا اراسىنداعى اۋە رەيستەرىنىڭ جيىلىگى اپتاسىنا 3 رەيستەن 5 رەيسكە دەيىن ارتادى.
«مينيسترلىك ۇشۋ باعىتتارىنىڭ گەوگرافياسىن كەڭەيتۋ مەن حالىقارالىق رەيستەر سانىن ارتتىرۋ بويىنشا جۇيەلى جۇمىس جۇرگىزىپ كەلەدى. قازاقستان مەن ارمەنيا اراسىنداعى جاڭا اۋە قاتىناسىنىڭ اشىلۋى ەكى ەل اراسىنداعى ساۋدا-ەكونوميكالىق, ىسكەرلىك, ينۆەستيتسيالىق, تۋريستىك جانە مادەني ىنتىماقتاستىقتى ودان ءارى دامىتۋعا ىقپال ەتەدى», دەلىنگەن كولىك مينيسترلىگىنىڭ حابارلاماسىندا.
ۆەدومستۆو حالىقارالىق اۋە باعىتتارىن كەڭەيتۋ جۇمىستارىن الداعى ۋاقىتتا دا جالعاستىراتىنىن مالىمدەدى.
ەسكە سالا كەتەيىك, بۇعان دەيىن FlyArystan كومپانياسى جازعى دەمالىس ماۋسىمىنا وراي اتىراۋدان باتۋميگە تىكەلەي رەيس اشتى. سونداي-اق كومپانيا جاقىندا استانا مەن اقتاۋدان باتۋميگە تىكەلەي رەيستەر قاتىنايتىنىن مالىمدەدى.