حالىقتىڭ ارىز-شاعىمىنا, جاعدايىنا ءاتۇستى قارايتىن باسشى اتقاراتىن قىزمەتىنە لايىقتى ما؟ وسى ساۋال اتىراۋ وبلىستىق تارتىپتىك كەڭەس مۇشەلەرىن ءبىراز تولعاندىرعان سىڭايلى. ناقتى دەرەككە سۇيەنەر بولساق, جىلىوي اۋداندىق قۇرىلىس, ساۋلەت جانە قالا قۇرىلىسى ءبولىمىنىڭ باسشىسى ب.ساتيەۆكە تۇرعىنداردان جەر تەلىمىن سۇراعان 63 ارىز تۇسكەنىمەن, ولارعا ول ۋاقتىلى جاۋاپ بەرمەي قويعان. ول ءوزىنىڭ بۇل ارەكەتىن جاڭا الاڭداردىڭ دايىن ەمەستىگىمەن, ءتيىستى قۇجاتتاردىڭ تولىق بولماۋىمەن تۇسىندىرۋگە تىرىسىپ باقتى. الايدا, قاراۋىنداعى قىزمەتكەرلەر ونىڭ جاۋابىنا كەرەعار سەبەپتەردى العا تارتتى.
سوندىقتان ءۇش ايداي بۇرىن اتالعان لاۋازىمعا تاعايىندالعان شەنەۋنىكتىڭ بۇل ارەكەتىنە تارتىپتىك كەڭەس مۇشەلەرى بەيجاي قاراي المادى. ويتكەنى, ول مەملەكەتتىك قىزمەتشىلەردىڭ ار-نامىس كودەكسىنىڭ تالاپتارى مەن جەكە جانە زاڭدى تۇلعالاردىڭ ارىز-وتىنىشتەرىن قاراۋدىڭ ءتارتىبىن بۇزىپ, سىبايلاس جەمقورلىققا جاعداي تۋعىزاتىن قۇقىق بۇزۋشىلىق جاساپ وتىر. وسىعان بايلانىستى جىلىوي اۋداندىق قۇرىلىس, ساۋلەت جانە قالا قۇرىلىسى ءبولىمىنىڭ باسشىسى ب.ساتيەۆكە «لاۋازىمىن تومەندەتۋ» تۇرىندەگى تارتىپتىك جازا قولدانۋ ۇيعارىلدى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.