مادەنيەت مينيسترلىگى ءتىل كوميتەتى ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ ادىستەمەلىك ورتالىعىندا “مەملەكەتتىك ءتىلدى ۇيرەتۋدىڭ عىلىمي جانە ادىستەمەلىك ماسەلەلەرى” دەگەن تاقىرىپتا عىلىمي-پراكتيكالىق سەمينار ۇيىمداستىرىلدى. سەميناردىڭ ماقساتى, مەملەكەتتىك ءتىلدى مەڭگەرتۋ بارىسىنداعى ولقىلىقتاردىڭ الدىن الىپ, ءتىل ۇيرەتۋدىڭ ساپاسىن ارتتىرۋعا ىقپال ەتۋ.
اتالمىش ءىس شارادا ءتىل كوميتەتىنىڭ توراعاسى باۋىرجان وماروۆ ءسوز الىپ, مەملەكەتتىك ءتىلدى ۇيرەتۋدى جانداندىرۋدا جاڭاشا تالاپ, قارىمدىق قۇلشىنىس قاجەت. بارلىق وقۋ قۇرالدارىن ءتيىمدى پايدالانىپ, ولاردى جەتىلدىرۋ ماسەلەسىن دە قولعا الاتىن ۋاقىت جەتتى. بۇل ورايدا ادىسكەر مامانداردىڭ, ەڭ الدىمەن وزىق تەحنولوگيالاردى قولدانۋ ارقىلى ۇيرەتۋ ۇلگىلەرىن ازىرلەۋگە ۇمتىلۋى ءتيىس, دەپ, ەندىگى جەردە مەملەكەتتىك تىلگە سەلقوس قاراۋعا بولمايتىنىن اتاپ ءوتتى.
بۇل باسقوسۋعا وبلىستىق, قالالىق جانە وڭىرلىك ءتىل ۇيرەتۋ ورتالىقتارىنىڭ باسشىلارى مەن ادىسكەر-وقىتۋشىلارى, عالىمدار مەن ءتىل سالاسىنىڭ ماماندارى قاتىستى. ولار ءتىل ۇيرەنۋگە بايلانىستى قويىلىپ وتىرعان تالاپتى ەندىگى جەردە مۇلتىكسىز ورىنداۋ كەرەكتىگىن ايتىپ, الداعى ۋاقىتتا مۇنى بۇكىل جۇرتشىلىق بولىپ جۇزەگە اسىرۋ قاجەت, دەدى. اسىرەسە يننوۆاتسيالىق تۇرعىدان ءىستى جانداندىرۋ ماسەلەسىن دە قوزعاپ, ءتىلدى دەڭگەيلىك جۇيەدە ۇيرەتۋ ءىسىن, قازاقستاندىق جانە ەۋروپالىق ستاندارتتار نەگىزىندە قاراستىردى. ءبىر سوزبەن ايتقاندا, ەڭ الدىمەن مەملەكەتتىك قىزمەتكەرلەردىڭ مەملەكەتتىك ءتىلدى مەڭگەرۋ ماسەلەسىن العا شىعارىپ, تالاپتى كۇشەيتۋ, تالعامدى ارتتىرۋ جايىنا باسا نازار اۋداردى.
الۋا امانجولوۆا.