اقىن, مەملەكەت جانە قوعام قايراتكەرى ولجاس سۇلەيمەنوۆ اقىن, قازاقستاننىڭ ەڭبەك ەرى مۇحتار شاحانوۆتىڭ دۇنيەدەن وتۋىنە بايلانىستى كوڭىل ايتۋ حاتىن جولدادى. اقىننىڭ حاتىن تومەندە تولىق ۇسىنىپ وتىرمىز, دەپ حابارلايدى Egemen.kz.
كورنەكتى اقىن, قوعام قايراتكەرى, قازاقستاننىڭ ەڭبەك ەرى, ۇلت رۋحانياتىنىڭ ءىرى تۇلعاسى مۇحتار شاحانوۆ دۇنيەدەن ءوتتى. ءبىز ءۇشىن ورنى تولماس اۋىر قازا.
مۇحتار شاحانوۆ – تەك پوەزيا الەمىندە عانا ەمەس, ۇلت تاعدىرىنا قاتىستى ەڭ كۇردەلى ماسەلەلەردە دە قايسار ءۇنىن جوعالتپاعان تۇلعا ەدى. ول ەل تاعدىرى سىنعا تۇسكەن كەزەڭدەردە ءاردايىم الدىڭعى شەپتەن تابىلىپ, ەلدىك مۇددە جولىندا تاباندى كۇرەس جۇرگىزدى. اسىرەسە جەلتوقسان وقيعاسى اقيقاتىن اشۋداعى قايسارلىعى مەن ادىلەت جولىنداعى باتىل ءۇنى حالىق جادىندا ماڭگى ساقتالادى. ونىڭ ارال قاسىرەتى جونىندەگى جانايقايى – ادامزات الدىنداعى ۇلكەن جاۋاپكەرشىلىكتىڭ كورىنىسى.
اقىن اماناتى ورىندالدى: مۇحتار شاحانوۆ تۋعان جەرىنىڭ توپىراعىنا جەرلەندى
1991 جىلعى 5 قازاندا قۇرىلعان قازاقستاننىڭ حالىق كونگرەسى پارتياسى – ەل تاعدىرىنا بەيجاي قارامايتىن, ليبەرالدى-دەموكراتيالىق باعىتتى ۇستانعان ساياسي كۇش بولدى. بۇل قوزعالىس كەزدەيسوق پايدا بولعان جوق, ول حالىقتىڭ شىنايى ۇنىنە اينالۋ ءۇشىن دۇنيەگە كەلدى. سول تۇستا مۇحتار شاحانوۆ ەكەۋمىزدىڭ وسى پارتياعا توراعالىق ەتۋىمىز – ۇلكەن جاۋاپكەرشىلىك ەدى. وسى تۇرعىدان العاندا, شاحانوۆ – ناعىز ساياساتكەر. ونىڭ ءاربىر ءسوزى حالىقتىڭ مۇڭىمەن ۇندەسىپ, جۇرەگىنەن شىققان شىنايى وي رەتىندە قابىلداندى.
مەملەكەت باسشىسى مۇحتار شاحانوۆتىڭ وتباسىنا كوڭىل ايتۋ جەدەلحاتىن جولدادى
مەن «نەۆادا-سەمەي» قوزعالىسى ارقىلى يادرولىق سىناق پوليگونىن جابۋعا ءۇن كوتەرسەم, مۇحتار شاحانوۆ ارال تراگەدياسىن توقتاتۋعا شاقىرىپ, تابيعات پەن ادامزات تاعدىرىنىڭ بىرتۇتاستىعىن دالەلدەدى. مارقۇمنىڭ وتباسى مەن تۋعان-تۋىستارىنا, بارشا قازاقستاندىقتارعا قايعىرىپ كوڭىل ايتامىن.
ولجاس سۇلەيمەنوۆ,
اقىن, قازاقستاننىڭ ەڭبەك ەرى,مەملەكەت جانە قوعام قايراتكەرى