ۇكىمەت باسشىسىنىڭ سولتۇستىك وبلىستارعا ساپارىنان وسىنداي وي تۇيدىك
ەلىمىزدەگى وتكەن اپتاداعى ەلەۋلى وقيعالاردىڭ ءبىرى ەلباسى تاپسىرماسى بويىنشا قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆتىڭ سولتۇستىك وبلىستارعا جاساعان جۇمىس ساپارى بولدى. بۇل ساپاردىڭ ماڭىزى مەن ماقساتى تۋرالى وسىنىڭ الدىندا گازەتىمىزدەگى “ۇكىمەت” بەتىندە جازعانبىز. سولتۇستىك وبلىستارداعى مەنشىكتى تىلشىلەرىمىز دە بۇل ساپاردىڭ بارىسىمەن وقىرماندارىمىزدى ەگجەي-تەگجەيلى تانىستىرعان بولاتىن. دەگەنمەن, وسى تاقىرىپقا قايتا ءبىر ورالىپ, قورىتىندى ءتۇيۋدى ءجون سانادىق.
پرەمەر-مينيستر ەلىمىزدىڭ استىقتى وڭىرلەرىنە جاساعان بۇل ساپارىندا يندۋستريالىق-يننوۆاتسيالىق جوبالاردىڭ جۇزەگە اسۋ بارىسىمەن, وبلىستارداعى ءبىلىم بەرۋ, دەنساۋلىق ساقتاۋ سالالارىنىڭ جاعدايىمەن, حالىقتى اۋىز سۋمەن, كوگىلدىر وتىنمەن قامتۋدىڭ جانە ينفراقۇرىلىمدىق نىساندار مەن ينجەنەرلىك جەلىلەردىڭ جاي-كۇيىمەن تانىسىپ قانا قويماي, سونىمەن قاتار, وڭىرلەر تۇرمىس-تىرشىلىگىنە اسەرى بار پروبلەمالارعا دا ءۇڭىلدى. ءار وڭىردە بىرنەشە كەڭەستەر وتكىزىپ, وڭىرلەر باسشىلارىمەن, ماماندارمەن ءبىرلەسە وتىرىپ, تولعاقتى ماسەلەلەردىڭ شەشىمىن تابۋ جولدارىن جەرگىلىكتى جەردىڭ وزىندە تالقىلادى. وسىعان سايكەس ءتيىستى مەملەكەتتىك ورگاندارعا تاپسىرما بەردى. ءسويتىپ, بىرقاتار ماسەلەلەر ۇكىمەتتىڭ جەدەل ارالاسۋىمەن شەشىمىن تاباتىن بولدى. مۇنىڭ ءوزى ۇكىمەت باسشىسىنىڭ جۇمىس ءستيلىنىڭ ءوزىندىك ءبىر قىرىن ايگىلەگەندەي بولدى.
كوكشەتاۋدا, وبلىستىق اكىمدىكتە پرەمەر-مينيستر كارىم ءماسىموۆتىڭ توراعالىعىمەن وتكەن وسىنداي ۇلكەن كەڭەس, ءوڭىردىڭ اعىمداعى جانە الداعى ۋاقىتتاعى وزەكتى ماسەلەلەرىن شەشۋگە ارنالدى.
– ەلباسىنىڭ تاپسىرماسىنا سايكەس اقمولا وبلىسىنا كەلىپ وتىرمىز. ءبىز ەلىمىزدى يندۋستريالاندىرۋدىڭ جاڭا مىندەتتەرىن شەشۋ ۇستىندەمىز. بۇل اركىمنەن جاۋاپكەرشىلىكتى تالاپ ەتەدى. ەندىگى ارادا ءبىز قازاقستاننىڭ سولتۇستىك وڭىرلەرىن سۇيىتىلعان گازبەن جابدىقتاۋ ءىسىن قولعا الۋدى جوسپارلاپ وتىرمىز,– دەدى ۇكىمەت باسشىسى.
وبلىس اكىمى سەرگەي دياچەنكو حابارلاما جاساپ, ەڭ اۋەلى ءوڭىردىڭ ەكونوميكالىق جانە الەۋمەتتىك جايىمەن تانىسۋعا كەلگەن ۇكىمەت باسشىسىنا شىنايى ريزاشىلىعىن ءبىلدىردى.
– ءبىز ۇكىمەتتىڭ قامقورلىعى مەن كومەگىن ءاردايىم سەزىنىپ كەلەمىز. ۇكىمەتتىڭ قولداۋىمەن كوكشەتاۋ جانە ستەپنوگور قالالارىن سۋمەن جابدىقتاۋدىڭ, بۋراباي كۋرورتتى ايماعىنىڭ ينفراقۇرىلىمىن دامىتۋ, استانانىڭ سەرىكتەسى رەتىندە دامىتىلاتىن قوسشى اۋىلىنىڭ الەۋمەتتىك-ەكونوميكالىق ماسەلەلەرى وڭتايلى شەشىلە باستادى, – دەدى وبلىس اكىمى.
قازىرگى ۋاقىتتا اقمولا وبلىسىنىڭ الەۋمەتتىك-ەكونوميكالىق جاعىنان دامۋى تۇراقتى دەۋگە بولادى. بيىلعى جىلدىڭ التى ايىنىڭ قورىتىندىسى بويىنشا ونەركاسىپ ءونىمى كولەمى ناقتىلى يندەكسى 118,5 پايىزدى قۇرادى. قازاقستاندى يندۋستريالىق-يننوۆاتسيالىق جەدەل دامىتۋ باعدارلاماسىنا سايكەس 2010 جىلى اقمولا وبلىسى بويىنشا 74,8 ميلليارد تەڭگەنىڭ 9 جوباسى اياقتالۋى كەرەك. وسى جوبانىڭ قازىرگى ۋاقىتتا تەڭ جارتىسى جۇزەگە اسىرىلدى. كوكتەمگى دالا جۇمىستارى ءوز دارەجەسىندە وتكىزىلدى. قازىر اۋىل شارۋاشىلىعى قىزمەتكەرلەرى ەگىن وراعىنا جان-جاقتى دايىندىق جۇمىستارىن جۇرگىزىپ جاتىر. اۋىل شارۋاشىلىعىن جانار-جاعار مايمەن قامتاماسىز ەتۋدە قيىنداپ وتىرعان ماسەلە جوق.
ۇكىمەت باسشىسىنىڭ الدىنا وبلىس اكىمى س.دياچەنكو مىنا وزەكتى ماسەلەلەردى قويدى. ەڭ اۋەلى استانانى اينالا بىتكەن وبلىستىڭ 19 ەلدى مەكەنىنىڭ ينفراقۇرىلىمىن جاقسارتۋ قاجەت. بۇل ەلدى مەكەندەردەگى حالىقتىڭ سانى سوڭعى جىلدارى 2 ەسەگە وسكەن كورىنەدى. سوندىقتان دا ەلوردانىڭ ىرگەسىندەگى ەلدى مەكەندەردى سۋمەن, ەلەكتر قۋاتىمەن جابدىقتاۋ قيىنداپ بارادى. بالاباقشالار جەتىسپەيدى. وسى 19 ەلدى مەكەندە تۇراتىن حالىقتىڭ 80 پايىزى استانا قالاسىنا قاتىناپ جۇمىس ىستەيدى. ەندىگى ارادا استانانىڭ ماڭايىنداعى ەلدى مەكەندەردىڭ الەۋمەتتىك ماسەلەلەرىن شەشۋگە ۇكىمەت تاراپىنان ناقتىلى كومەك كەرەك.
بۋراباي كۋرورتتى ايماعىنىڭ ماسەلەسىن ايتا كەلىپ, وبلىس باسشىسى وسىنداعى “لەسنايا پوليانا” اۋدانىنداعى تۇرعىن ءۇي قۇرىلىسىن جەدەل اياقتاۋعا كوڭىل ءبولىنۋ قاجەتتىگىن ايتتى. ويتكەنى, ۇلەسكەرلەردىڭ ەسەبىنەن سالىنىپ جاتقان بۇل تۇرعىن جايلاردىڭ قۇرىلىسى ۇزاققا سوزىلىپ كەتتى. كوكشەتاۋ قالاسىن جىلۋمەن جانە ىستىق سۋمەن قامتاماسىز ەتۋ ءۇشىن شاعىن جىلۋ ەلەكتر ورتالىعىن سالۋ, وبلىس ورتالىعىنىڭ جولدارىن جوندەۋ ماسەلەسىن شەشۋگە قاجەتتى قارجىنى 2011-2015 جىلدارداعى رەسپۋبليكالىق بيۋدجەتكە ەنگىزۋ ماسەلەسى ايتىلدى. قازىر كوكشەتاۋ قالاسى بويىنشا بالالاردىڭ 42 پايىزى عانا بالاباقشامەن قامتىلعان. الداعى ۋاقىتتا كەم دەگەندە 20 بالاباقشا سالىنۋى كەرەك.
وبلىس اكىمى س.ا.دياچەنكونىڭ بۇل ۇسىنىستارىن ماقۇلداي كەلىپ, ۇكىمەت باسشىسى وزدەرىنىڭ تاراپىنان قولداۋ بولاتىندىعىن ايتتى. الايدا, بۇل ماسەلەلەردى شەشۋ ءۇشىن ىشكى رەزەرۆتەردى ىسكە قوسۋ ماسەلەسىن كوتەردى. ينۆەستورلاردىڭ كەلۋىنە بارلىق جاعداي جاسالۋى كەرەك. بالاباقشا ماسەلەسىن شەشۋدەگى قاراعاندى وبلىسىنداعى جۇمىستىڭ وڭ تاجىريبەسىنە جوعارى باعا بەرگەن ۇكىمەت باسشىسى بۇل ورايدا بيزنەستىڭ الەۋمەتتىك جاۋاپكەرشىلىگىن تاعى ءبىر ەسكە سالدى. كوكشەتاۋداعى “كاماز-ينجينيرينگ” سەرىكتەستىگىندە اۋرۋحاناسى مەن ەمحاناسى جوق ەلدى مەكەندەرگە ءدارىگەرلىك قىزمەت كورسەتەتىن جىلجىمالى “اۋرۋحانالار” جاساۋعا كومەك كورسەتىلەتىندىگىن جەتكىزدى.
قازاقستان رەسپۋبليكاسىنىڭ مۇناي جانە گاز ءمينيسترى ساۋات مىڭباەۆتىڭ سوزىنە قاراعاندا, قازىرگى ۋاقىتتا قازاقستاندى رەسەي فەدەراتسياسىنىڭ جانە ءوز ەلىمىزدەگى باتىس ايماقتىڭ گاز كوزدەرىنەن جابدىقتاۋ ماسەلەسى شەشىلىپ جاتىر. ەندىگى ارادا سولتۇستىك ءوڭىرلەردى گازبەن جابدىقتاۋدىڭ وزەكتى ماسەلەسىن شەشۋگە ءتيىستىمىز. بۇل وڭىرلەردى گازبەن جابدىقتاۋدىڭ ەكى جولى بار. بىرەۋى – رەسەيدەن گاز قۇبىرىن تارتۋ. بۇل ارزانعا تۇسەدى. ويتكەنى, گاز قۇبىرى قىسقا جولمەن كەلەتىن بولادى. الايدا, گاز قۇبىرى تارتىلعاننان كەيىن كورشى مەملەكەت اراسىنداعى قاتىناسىمىز قالاي بولادى؟ مىنە, وسىنى دا ويلاۋىمىز كەرەك. ەلىمىزدىڭ باتىسىنان سولتۇستىك وڭىرگە ۇزىندىعى 1500 كيلومەترلىك گاز قۇبىرىن تارتۋعا ءتيىستىمىز. ارينە, وسىنشاما ۇزىندىقتاعى قۇبىر تارتۋ اسا قىمباتقا تۇسەدى. مىنە, ءبىز وسى ەكى جولدى تاڭداۋعا ءتيىستىمىز, دەدى.
پارلامەنت سەناتىنىڭ دەپۋتاتى ەدىلباي يمانقۇلوۆ ءسوز الىپ, ەلىمىزدى گازبەن جابدىقتاۋ ماسەلەسى بويىنشا ۇكىمەتپەن بىرلەسىپ, دوڭگەلەك ۇستەل باسىندا پىكىر الىسۋ بولعاندىعىن, بۇگىنگى كەڭەس سول ۇسىنىسقا ۇكىمەتتىڭ قۇلاق اسقاندىعى دەپ ريزاشىلىعىن ءبىلدىردى. كەڭەستە سولتۇستىك قازاقستان وبلىسى اكىمىنىڭ ورىنباسارى سامات ەسكەندىروۆ, قوستاناي وبلىسى اكىمىنىڭ ورىنباسارى ۆ.ۆ.مەيستەر, اقمولا وبلىسى اكىمىنىڭ ورىنباسارى قوسمان ايتمۇحامەتوۆ ءسوز سويلەپ, وسى وڭىرلەردى گازبەن جابدىقتاۋدىڭ قازىرگى جايىمەن تانىستىرىپ, تولعاندىرىپ وتىرعان ماسەلەلەرگە ۇكىمەت باسشىسىنىڭ نازارىن اۋداردى.
كەڭەستى قورىتىندىلاعان ۇكىمەت باسشىسى كارىم ءماسىموۆ اقمولا, سولتۇستىك قازاقستان, قوستاناي وبلىستارىندا يندۋستريالىق-يننوۆاتسيالىق جوبالاردىڭ ويداعىداي جۇزەگە اسىرىلىپ جاتقاندىعىن ايتىپ, بۇل ءىستى ونان ءارى جاقسارتۋ قاجەت ەكەندىگىن اتاپ كورسەتتى. سولتۇستىك وڭىرلەردى گازبەن جابدىقتاۋ ماسەلەسىن شەشۋمەن ۇكىمەت تۇبەگەيلى اينالىساتىن بولادى. بۇل ورايدا ۇكىمەت باسشىسى مۇناي جانە گاز ءمينيسترى ساۋات مىڭباەۆقا وسى سولتۇستىك وڭىرلەردى گازبەن جابدىقتاۋدىڭ جوباسىن جاساپ, ۇكىمەتتە قاراۋ ءۇشىن ۇسىنۋدى تاپسىردى. مينيستر بۇل ۇسىنىستىڭ ەكى اپتانىڭ ىشىندە ءازىر بولاتىندىعىن ايتتى.
قازىرگى كۇنى اقمولا, سولتۇستىك قازاقستان, قوستاناي وبلىستارىنىڭ قاي-قايسىسىندا بولماسىن, بۇكىل ەلىمىزدەگى سەكىلدى تىرشىلىك ارناسى قىزۋ قايناپ جاتىر دەپ ايتۋعا بولادى. بيىلعى جىلدىڭ وزىندە وسى وبلىستاردا كوپتەگەن ينۆەستيتسيالىق جوبالار ىسكە قوسىلۋ ۇستىندە. پرەمەر-مينيستر ساپار بارىسىندا وسىنداي كوپتەگەن نىسانداردا بولىپ, ولاردىڭ جۇمىس جاعدايىمەن, وڭىرلىك دامۋعا تيگىزەتىن اسەرىمەن تانىستى. ماسەلەن, اقمولا وبلىسىنا ساپارىندا ءوڭىردىڭ ونەركاسىپتىك وشاعى ىسپەتتەس ستەپنوگور قالاسىنداعى “قازفوسفات-حيميالىق زاۋىتى” جاۋاپكەرشىلىگى شەكتەۋلى سەرىكتەستىگىندە بولعانىندا وسى زاۋىتتا ورىن الىپ وتىرعان نەگىزگى پروبلەما – تەحنيكالىق كۇكىرت قىشقىلىنىڭ جوقتىعىنا ەرەكشە نازار اۋدارىپ, وسى ماسەلەنى جەدەلدەتىپ شەشۋ جونىندە مەملەكەتتىك ورگاندارعا ءتيىستى تاپسىرمالار بەردى. ويتكەنى, بۇل كوكەيكەستى ءماسەلە شەشىمىن تاپقان جاعدايدا تاعى دا 400 ادامدى جۇمىسقا قابىلداۋعا بولادى ەكەن.
ستەپنوگوردا كەلەسى جىلى جىلىنا 180 مىڭ توننا كۇكىرت قىشقىلىن شىعارۋعا قۋاتى جەتەتىن “قازاتومونەركاسىپتىڭ” كۇكىرت قىشقىل زاۋىتى ىسكە قوسىلۋى ءتيىس. ال “ستەپنوگور تاۋ كەن-حيميا كومبيناتى” جشس-ىنە قاراستى گيدرومەتاللۋرگيا زاۋىتىندا جىلىنا 3200 توننا تابيعي ۋران, 75,8 توننا موليبدەن وندىرۋگە بولادى. وسى جەتىستىككە جەتۋ ءۇشىن سالىققا قاتىستى ماسەلەلەر شەشىمىن تابۋى ءتيىس ەكەن. ال “ەسىل اگرو” جشس-ىندە 1200 ساۋىن سيىرى وسىرىلەتىن جاڭا تەحنولوگيالارمەن جۇمىس ىستەيتىن جاڭا كەشەن قۇرىلىسى جۇزەگە اسىرىلۋدا. “ست اۆتوسەرۆيس” جشس وسىنداعى اۋىل شارۋاشىلىعى قۇرىلىمدارىن جاڭا تەحنيكالارمەن, قوسالقى بولشەكتەرمەن, سەرۆيستىك قىزمەتپەن قامتاماسىز ەتپەك.
سولتۇستىك قازاقستان وبلىسىندا يندۋستريالىق-يننوۆاتسيالىق باعىتتا جالپى قۇنى 27 ميلليارد تەڭگەنى قۇرايتىن 13 جوبا جۇزەگە اسىرىلۋدا. ونىڭ 4-ءۋى اگروونەركاسىپ كەشەنى سالاسىنا, 6-ۋى ماشينە جاساۋ جانە قۇرىلىس ماتەريالدارى وندىرىسىنە, 2-ءۋى مەتاللۋرگيا, 1-ءۋى حيميا ونەركاسىبىنە تيەسىلى. بۇل جوبالاردىڭ 9-ى بيىل پايدالانۋعا بەرىلەتىن بولسا, سونىڭ 6-ۋى ءبىرىنشى جارتى جىلدىقتىڭ وزىندە ىسكە قوسىلىپ ۇلگەرىلدى.
ال قوستاناي وبلىسىنىڭ قوستاناي اۋدانىندا جاقىندا عانا “قاراسۋ-ەت” قاساپحاناسى مەن وڭدەۋ كەشەنى اشىلعان بولاتىن. بۇل كاسىپورىن جىلىنا 4,5 مىڭ توننا ەت وندىرە الادى.
مىنە, وسى جوبالاردىڭ قاي-قايسىسى بولماسىن وڭىرلىك دامۋدا وزىندىك ورنى بار.
ۇكىمەت باسشىسى وبلىستاردا بولعان ساپارىندا نەعۇرلىم پروبلەمالىق ماسەلەلەرگە دە كوبىرەك نازار اۋدارعاندىعىن جوعارىدا ايتتىق. سولاردىڭ بىرقاتارى سۋمەن جابدىقتاۋ, كارىزدىك جۇيەلەردى جەتىلدىرۋ ماسەلەسىنە قاتىستى. ماسەلەن, “كوكشەتاۋ جىلۋ” مەملەكەتتىك كوممۋنالدىق كاسىپورنى وسى اتتاس قالا تۇرعىندارىن جىلۋمەن قامتاماسىز ەتۋ ماقساتىندا قىزمەت ەتەدى. بۇل كاسىپورىننىڭ پروبلەماسى – ەلەكتر قۋاتىنىڭ تاپشىلىعى. سوعان بايلانىستى سمەتالىق جوباسى 3,9 ميلليارد تەڭگە تۇراتىن ەلەكترمەن قامتۋدىڭ جاڭا ورتالىعى ىسكە قوسىلعان جاعدايدا قالا تۇرعىندارىنا بەرىلەتىن جىلۋ مەن ىستىق سۋدىڭ باعاسى ەداۋىر دارەجەدە ارزانداي تۇسپەك.
وسىنداي پروبلەما قىزىلجار وڭىرىنە دە ءتان دەۋگە بولادى. ءماسەلەن, پەتروپاۆل قالاسىنىڭ سولتۇستىك بەتكەيىندەگى سۋ تورابى قىرىق جىلدان بەرى جوندەۋ كورمەپتى. جاعداي وسىلاي جالعاسا بەرسە, ەكولوگيالىق قاۋىپتىڭ ۋشىعا تۇسەتىندىگى انىق. جوبانىڭ ءبىرىنشى كەزەگى جۇزەگە اسقانىمەن, قارجى تاپشىلىعىنا بايلانىستى ءارى قاراي جالعاسىن تاپپاي قالعان.
وسىنداي پروبلەمالار “قوستاناي سۋ” مەملەكەتتىك كوممۋنالدىق كاسىپورنىندا دا بار ەكەن. قوستاناي قالاسى جەر استى سۋىن پايدالاناتىن. قازىر تۇرعىندار مەن كاسىپورىندارعا بەرىلەتىن سۋدىڭ 80 پايىزى اشىق سۋ قويماسىنان, قالعانى سكۆاجينالاردان الىنادى. سونىمەن قاتار, قوستاناي قالاسى نەگىزىنەن تابيعي گازبەن جىلىتىلادى. ول قالاعا كورشى ەلدەن جەتكىزىلەدى. بۇل جاعدايدىڭ ءوزى ءتاريفتىڭ كوتەرىلۋىنە اسەر ەتىپ وتىر. وسىعان بايلانىستى ءتاريفتى تۇراقتاندىرۋ ءۇشىن سۋبسيديا ءماسەلەسىن قاراستىرعان ءجون بولار ەدى.
ساپار بارىسىندا ۇكىمەت باسشىسى جەرگىلىكتى ماماندار ارقىلى ءىستىڭ ءمان-جايىمەن تەرەڭىرەك تانىسا كەلە, ولاردى شەشۋ جولدارىن قاراستىردى. ولاردىڭ قايسىبىرى الداعى ۋاقىتتا ۇكىمەتتە قارالاتىن بولسا, ەندى بىرىنە قارجىلاي كومەك كورسەتىلەتىن بولدى.
سولتۇستىك قازاقستان وبلىسىنا ءتان بولىپ وتىرعان تاعى ءبىر پروبلەما – ەلەۆاتورلاردا جاتقان بىلتىرعى استىققا قاتىستى. الدا جاڭا ەگىن وراعى كەلە جاتىر. دەمەك, بۇرىنعى استىقتى تەزدەتىپ وتكىزۋ نەمەسە باسقا ورىندارعا ورنالاستىرۋ ماسەلەسى شەشىمىن تابۋى قاجەت. وسىعان وراي ۇكىمەت باسشىسى اۋىل شارۋاشىلىعى ءمينيسترى اقىلبەك كۇرىشباەۆقا 400 مىڭ توننا استىقتى ەلىمىزدىڭ باتىس وڭىرلەرىنە جەتكىزىپ ورنالاستىرۋ ماسەلەسىن شەشۋدى تاپسىردى. وسى وڭىرلەردە بىرنەشە جاڭا ەلەۆاتوردىڭ سالىناتىنىن, كۇزدىڭ جاڭا استىعىن كىدىرىسسىز قابىلداۋ ءۇشىن بارلىق جاعدايدىڭ جاسالاتىنىن مالىمدەدى.
ساپار بارىسىندا ۇكىمەت باسشىسى دەنساۋلىق ساقتاۋ, ءبىلىم بەرۋ مەكەمەلەرىنىڭ جاي-كۇيىنە ەرەكشە نازار اۋداردى. ماسەلەن, اعىمداعى جىلى كوكشەتاۋ قالاسىنداعى جاڭا قان ورتالىعى ىسكە قوسىلماق. بيىلعى جىلى وسى ورتالىق ءۇشىن بيۋدجەتتەن 2 ميلليارد 031 ميلليون تەڭگە بولىنسە, ونىڭ 1 ميلليارد 97 ميلليون تەڭگەسى يگەرىلدى. وسى جەردە ۇكىمەت باسشىسى دەنساۋلىق ساقتاۋ سالاسىنىڭ ماماندارىمەن اشىق اڭگىمە وتكىزىپ, سالانىڭ قازىرگى احۋالىن بارىنشا سۇراستىرىپ ءبىلدى. كەزدەسۋ سوڭىندا دەنساۋلىق ساقتاۋ سالاسىنىڭ قىزمەتكەرلەرى مەن ماماندارى ءوز ىستەرىنە جاۋاپكەرشىلىكپەن قاراپ, حالىقتىڭ سەنىمىنەن شىعا ءبىلۋ قاجەتتىگىن ايتتى. ولاردىڭ قىزمەتتەرىنە ساتتىلىك تىلەدى.
قوستاناي وبلىسىنا ساپار بارىسىندا كەدەن ماسەلەسىنە كوبىرەك كوڭىل ءبولىندى. بۇل وبلىس بىزبەن بىرگە كەدەن وداعىن قۇرىپ وتىرعان رەسەيمەن كورشىلەس ورنالاسقان. سوندىقتان اتالعان ءىستىڭ ءساتتى باستالۋى كەدەن ىسىنە كوپ قاتىستى. پرەمەر-مينيستر وسى وبلىستاعى “قايراق” كەدەن بەكەتىندە بولعان كەزىندە: “مەن كەدەن وداعىنا كىرۋىمىزگە بايلانىستى ەلباسىنىڭ تاپسىرماسىمەن رەسەي شەكاراسىنداعى “قايراق” بەكەتىنىڭ جۇمىسىن ءوزىم كورىپ, تانىسۋ ءۇشىن كەلدىم. جاڭا تالاپتاعى جۇمىس جامان ۇيىمداستىرىلماعان سەكىلدى. ادامدار كەدەن وداعى بەرگەن تيىمدىلىك پەن قولايلىلىقتى سەزىنۋگە ءتيىس. ءىستىڭ و باستاعى ماقساتى دا وسى”, – دەدى.
قورىتا ايتقاندا, ۇكىمەت باسشىسىنىڭ ەلىمىزدىڭ سولتۇستىك ءوڭىرلەرىنە جاساعان ساپارى تابىستى بولدى. بۇل ساپار وڭىرلەردىڭ العا قويعان ستراتەگيالىق جوبا – جاڭا يندۋستريالاندىرۋ باعىتىنا سايكەس دامي باستاعاندىعىن كورسەتىپ بەرسە, ەكىنشى جاعىنان العاندا, جەرگىلىكتى, بىراق ماڭىزى زور پروبلەمالاردىڭ شەشىمىن تابۋىنا ىقپال ەتەتىندىگى ايقىن.
سۇڭعات ءالىپباي.