قازاقستاندا «تازا قازاقستان» اكتسياسى اياسىندا @TazaQazBot Telegram چات-بوتى ءوز جۇمىسىن جالعاستىرىپ كەلەدى. بۇل – تۇرعىندارعا ەكولوگيا جانە اباتتاندىرۋ سالاسىنداعى ماسەلەلەردى تىكەلەي حابارلاۋعا مۇمكىندىك بەرەتىن ىڭعايلى تسيفرلىق سەرۆيس, دەپ حابارلايدى Egemen.kz.
اتالعان پلاتفورما 2024 جىلدىڭ ماۋسىمىندا ىسكە قوسىلعان. بۇگىندە ول مەملەكەتتىك ورگاندارمەن بايلانىس ورناتۋدىڭ ءتيىمدى قۇرالىنا اينالدى. ءوتىنىش جولداۋ ءۇشىن Telegram-دا چاتقا كىرىپ, تىركەلۋ, ماسەلەنىڭ فوتوسىن تىركەۋ, مەكەنجايىن كورسەتۋ جانە قىسقاشا سيپاتتاما بەرۋ جەتكىلىكتى. ءوتىنىم اۆتوماتتى تۇردە جاۋاپتى ورگاندارعا جىبەرىلەدى.
سەرۆيستىڭ باستى ارتىقشىلىقتارىنىڭ ءبىرى – اشىقتىق. پايدالانۋشى ءوتىنىشتىڭ ورىندالۋ بارىسىن تولىق باقىلاپ, جۇمىس اياقتالعان سوڭ فوتوەسەپ الىپ, ونىڭ ساپاسىن باعالاي الادى.
«تازا قازاقستان»: پوليتسيا 3 مىڭنان استام زاڭسىز قوقىس ءۇيىندىسىن جويدى
بارلىق وتىنىشتەر 21 سانات بويىنشا جىكتەلەدى. ولاردىڭ قاتارىندا اۋماقتى تازالاۋ, قوقىس شىعارۋ, جول جوندەۋ, جارىقتاندىرۋ, كوگالداندىرۋ جانە سۋ ايدىندارىن تازارتۋ سياقتى باعىتتار بار. بۇل جۇيە وتىنىشتەردى جەدەل سارالاپ, ءتيىستى قىزمەتتەرگە باعىتتاۋعا مۇمكىندىك بەرەدى.
2025 جىلدىڭ قورىتىندىسى بويىنشا چات-بوت ارقىلى 26 مىڭنان استام ءوتىنىش ءتۇسىپ, ونىڭ 24 مىڭنان استامى ورىندالعان. ەڭ كوپ سۇرانىسقا يە باعىت – اۋماقتاردى تازالاۋ.
ال 2026 جىلدىڭ العاشقى توقسانىندا 4 مىڭنان استام ءوتىنىش تىركەلىپ, ولاردىڭ باسىم بولىگى ورىندالعان.
«تازا قازاقستان»: ەلوردالىق كاسىپكەرلەرگە تازالىقتى ساقتاۋ جونىندە چەك-پاراقشالار تاراتىلدى
جالپى, @TazaQazBot سەكىلدى تسيفرلىق شەشىمدەر تۇرعىندار مەن مەملەكەت اراسىنداعى بايلانىستى نىعايتىپ, ماسەلەلەرگە جەدەل ارەكەت ەتۋگە, اكىمدىكتەر جۇمىسىنىڭ تيىمدىلىگىن ارتتىرۋعا جانە ەلدى مەكەندەردە ءتارتىپ ورناتۋعا ىقپال ەتۋدە.